¹ Teofili, wema tɛye tantyɛn ke ko wlan lɔ oxo do onu ke Yesu ta wiwa kpo onu ke e kplan ye wu. ² Gbun do jɛ, gbe ke gbe Ye kuɛ sɔ sɔn yi jiŋukusin. Vɔ gbɔxwe e na do sɔn, e do ɛwɛn gbɔn gbigbɔ kinkɛn, na ɛmɛ didɔn itɔn ke e can ye. ³ Ke na Yesu ku bo fɔn vɔ, e ɖe iɖe sɔ xlɛ ɛmɛ didɔn ye, bo ɖe xlɛ gbɔn walɔ susu mɛ bio he mɔ le ɛgbɛ. Le onyihihɔn kan ɖe mɛ, eɖe iɖe bo sɔ xlɛ ye bo nɔ lɔ oxo na ye sɔn Mawu we xɔluɖuɖu wu. ⁴ Le gbe ɖokpo, ke i kpo ye kpo le kpɔkpɔ e tɛn ogbe do eji bo lɔ na ye bio mi ka mɔ tɛ yi le Jeluzalɛmu wu, vɔ mi nɔ ote kpɔn onu gbe ke Mawu do na ye, ke we oxo na elɔ bio:« Mi se le nu ye bio ⁵ Jaan nyinylɔn ɛmɛ ye do ɛsi mɛ vɔ mi ye-ɔ ye na nyrɔn mi do gbigbɔ kinkɛn mɛ le azan viɖe mɛ» ⁶ Ke yi kpo ye kpo le kpɔ kpɔ ye kinse bio:« Xwetɔ, siɛ wɛ o jra xɔluɖuxwe Israyɛli tɔn ɖo?» ⁷ Yesu bo ɖo e wu na ye bio:« Ɔn nyi mi ye hɔn-ɛ na nyɔn azan gbun a do nyɔn gan ke mɛ e na Mawu te te ɔ ɖo gbɔn do ɛcɛ itɔn mɛ. ⁸ Vɔ, mi na yi hɔnhlɔn ɖe, gbigbɔ kinkɛn na jɛ ote do mia ji mi bo na nyi kunuɖe tɔ tɛ ye le Jeluzalɛmu, Jwide kpo Samali, gbun do yi nyixo we vivɔ nu.» ⁹ Ke na Yesu lɔ oxo xin ye na ye vɔ, ke Yesu kpɔn jiŋukusin dodan nɔ ye koɛ sunwo bo bwi ŋumɛ na ye. ¹⁰ Ke na ye gbɛ kpɔn jiŋukusin nɔ zɔnɖokpo, ɛmɛ ɔwe ɖe ye do awu owe pe pe pe bo tɛ va ye kɔn, ¹¹ bo lɔ na ye bio:« Mi Galile we ɛmɛ ye, eni jɔ na mi do le bwɛ bo kpɔn jiŋukusin nɔ? Yesu xin ke na sin Jiŋukusin, emɔ ke wɛ e mɔ na jɛ ote ɖo.» ¹² Ye bo trɔ kɔ bo sɔn nyi olivu we oto ji, e bo kpɔ Jeluzalɛmu wu le ɖi kpɛnti ɖokpo ha. ¹³ Ke na ye xɛ sanhun ji le ɖi ke na ye nɔ wasi ɖo san ha. Ye ɛmɛ ke nɔ blɛ xɛn Pyɛ, Jaan, Jaki, Andle, Filipu, Toma, Batelemi, Mantiye, Jake Alufe wde viɔ, Simɔ Zelɔtu kpo Jwidi Jake we viɔ. ¹⁴ Ye mɛ bi ye wasi ɖokpo bo do vivɛnu le ɛɖɛ xixo mɛ, kpo nyɔnnusi ye, Mali ye su onɔ kpo Yesu nɔnviɔ ye. ¹⁵ Le azan xɛn gbe Pyɛ site le ɛmɛ kantɔn ye mɛ, bo lɔ bio: ¹⁶ « Nɔnvi ye, e le vivɛ ɖe bio onu ke ye wlan do nyi ye ɖo na jɔ, le ɖi ke na gbigbɔ kinkɛn lɔ-ɛ gbɔn Davidi we numɛ do Jwidasi wu ɖo ha, ɛmɛ ke ɖo omɔ na mɛ ke wle Yesu ye. ¹⁷ Ɖo e nyi mia we ɛmɛ ɖokpo bo yi odan ke mi wa nɔ we ɔxɔtu. ¹⁸ (Ɛgbɛ huanje xin-ɔ e xɔ ogble kpo ɛdɛn nylan itɔn we ɔxɔtu, le blɛ-ɔ ihwe jɛ nyi, bo gba, iwe oɖɔviɛ bi bo tɔn. ¹⁹ Jeluzalɛmu we ɛmɛ ye nyɔn onu ke jɔ ye bo na ŋkɔ ogle do ye we ogbe mɛ bio " Hakeldama" yi we gɔmɛ wɛ nyi "Ɛhun we ogle") ²⁰ I wɛ dɔn ye wlan do ohan jiji we wema mɛ bio: " Mi jo ogle itɔn do na nɔ vovo, na ɛmɛ ti ni ko mɔ nɔ e mɛ. Ɛmɛ bu ni yi tɛnxo itɔn. ²¹ E le vivɛ ɖe, bio ɛmɛ-ɔ ni nyi ɛmɛ ke nɔ zɔn kpo mi le xwetɔ we ŋumɛ nɔ san, ²² Sɔn Jaan we ɛmɛ nyinyrɔn gbun do jɛ gbe ke gbe na ye kuɛ le mia mɛ,, ɛmɛ nyi kunu ɖe tɔ, kpo yi we fɔn sɔn ɛmɛ kuku ye mɛ.» ²³ Ye sɔ ɛmɛ ɔwe ɖote, Jozɛfu ke ye nɔ yɔ bio Banabasi, ke ye mɔ nɔ yɔ bio Jwisitwisi kpo Matiasi. ^{24 25 26} Ye xo ɛɖɛ bo lɔ bio:« Lɔ Xwetɔ, ke nyɔ ayixa ye, ɖe ɛmɛ ke o can le ɛmɛ ɔwe ke ye mɛ, a do yi tɛnxo le odan ke nyi ɛmɛdidɔn we dan ke Jwidasi jo do bo do si ofi ke nyɔ ni.» Ye wasi ovo ɖiɖe e bo ve jɛ Matiasi ji ye bo sɔ-ɛ bɔ do ɛmɛ didɔn we ɖokpo ye wu.