¹ Lɔ ovi tɛye, do hɔnhlɔn ɖiye le ɛfɛnu ke nan le Kliso Yesu mɛ. ² Nan onu ke o se le kɔn ye ɔ le kunnu ɖetɔ susu we ŋkɔn, sɔ nan ɛmɛ ke ji nan okan do, bo nan kpewu bo nan kplan ɛmɛ bu ye. ³ Leɖi Yesu Kliso we sɔja adodwe ha , kpe ofun kpo. ⁴ Sɔja ni lɛ le bo le ahwan mɛ nan ɛgbɛ mɛ buɛ we onu ye na va jɛŋu ni, na e jro nan nyɔn hwɛn na yiwe oga. ⁵ E mɔn ha ke, odun do tɔ ɖe ɔn kpewu nan ɖu oji nan ɔn zɔn do ɖiɖo ye ji. ⁶ Ogle lɛ tɔ ke nɔn wa odan sisyɛn xu ɖe wɛ nɔn nyi ɛmɛ tantyɛn ke nan nɔn ɖe ɛji nuku. ⁷ Bu tamɛ nywɛɖe sɔn oxo ke ko lɔ nan we nɔn wu, ɖo xwetɔ nan nan ona kpɔn onu jɛ emɛ. ⁸ Flin Yesu Kliso, ke na ye ji sɔn Davidi we okun kanmɛ, ke na fɔn sɔn ɛmɛ kuku ye mɛ, leɖi ɛwɛn nywɛn jijra oxo tɛye tɔn ha, ⁹ ke dɔn nan ko ɖu aya nɔn gbun bo va le gankpamɛ leɖi ɛmɛ hutɔ ha. Vɔ Mawu we oxo ɔ ɔn le caba mɛ. ¹⁰ Ko kpe ofun xinye nɔn do ɛmɛ cican ye ta, ye ye can a do kpewu a kpɔn hwlɛngan ke na le Yesu Kliso, kpodo gigo manvɔ-manvɔ. ¹¹ Kpɔn oxo vive ɖe xɛn nyi eke:«Nan mi ku kpodwe ɔ, mi mɔn le ɛgbɛ kpoe. ¹² Nan mi le ote gliŋ, mi nan va ɖu oga kpoe. Nan mi mɔɔn onu xui ɔ i can nan mɔɔn nu wu mi ye can,. ¹³ Nan mi nyi ɛmɛ ma nɔn ogbe ji, e lɔ nan nɔn ogbe ji, ɖo ɔn kpewu nan mɔɔn onu iɖe.» ¹⁴ Yi eji a bo flin onu kiye nan ye nɔn. Ɖe ogbe tɔ ye le Mawu we ŋkon bio ye mɔn ka mɔn nɔn wa ojrɛ do oxo ye wu, ɖo yɔn nɔn hɛn onu ti do va, vɔ e nɔn hɛn gugu do va nan ɛmɛ ke na se nɔn ye. ¹⁵ Jɛ gbagba nan nyi ɛmɛ vivɛ le Mawu we ŋukɔn, leɖi odan watɔ ke nan oŋu ɔn nan kpɛn ha, vɔ o mɔn jra oxojɔxo nywɛnɖe. ¹⁶ Zɛ nan oxo gugu ye, ke nan nɔn ɖe ɛmɛ tɛyi le Mawu wu. ¹⁷ Ye we oxo ye ɔ e nɔn gbakpe leɖi ɔdɔn nyinylan ha. Imene kpo Filɛti ye le ɛmɛ e mɔn ha tɔn ye mɛ, ¹⁸ ɛmɛ ke na din le oxo jɔ xo ɔ wu, ye nɔn lɔ nɔn lɔ bio fifɔn sɔn oku ɔ e mɔn jɔ va yi saan, a bo caka ɛmɛ ɖeye we xɔse do ewu. ¹⁹ Ganke ɔ, dodoe sisyɛn xu ke Mawu do gun e le ote sisyɛn xu. Onu winwlan ke bo le ewu:«Xwetɔ nyɔn ɛmɛ itɔn ye», nan:«ɛmɛ ɖekpokpoe ke lɔɛ lɔ bio he mɔn nyɔn xwetɔ ɔ ɖo nan jo onu nyinylan do.» ²⁰ Le dɔkunɔn we oxwegbe ɔ, ɔn nyi sika we agban kpo oho we agban ɖoɖyo hwɛn le, vɔ otin we agban ye can le , okɔ we agban ye can bo le; ɖe ye ɔ ye nɔn zan ye le oganxixo o nywɛn ye mɛ, vɔ ɖeye le ɔ ye ɔn nɔn zan ye. ²¹ Nan e nyi bio ɛmɛɖe e kɔn iɖe wu le onu nyinylan wiwa mɛ, ye na zin, ye nan sɔɛ ɖo ɔlɔ ji le ovo, leɖi agban jɛŋu ha, ke le vivɛ ɖe nan Xwetɔ ɔ, bo le ogbe sisɔ nan odan o nywɛn ye bi. ²² Si hwanjevi mɛ we onu jijro ye, xodo jijɔɛ nyiynyi, yise, owan nyi-nyi, fifa, kpo ɛmɛ kena yɔ xwetɔ sɔn oji kinkwɛn mɛ. ²³ Vɔ gbɛ oklenɔn kpodo onu man nyɔn tɔ we oxo kanse ye, ɖo o nywɛn lɔ bio ye nɔn hɛn ojrɛ do va. ²⁴ Odansɔvi Xwetɔ tɔn ɔn ɖo na nɔn wa ojrɛ; vɔ do gbɔnvo ɔ, e ɖo nan nyi owan nan ɛmɛ bi, a bo nɔn ogbe sisɔ nan onu kpinkplan a bo nɔn ku hun. ²⁵ E ɖo nan kplan onu wu ɛmɛ ke na ci ote do ewu ye kpo ɛmɛɖe sɔ hwe kpo. Mawu na va nan omɔn nu kpinkpɔn wu ye na ye a do trɔ jimɛ a bo nyɔn oxojɔxo ɔ. ²⁶ Ye hɛn na va nyi ɛmɛ nywɛn bu, a bo tɔn le lɛgba we ganmɔn ke nan wle ye bo ṣɔ ye sɔ ɖo ojlo yitɔn gɔ.