¹ Nyɔ Pɔlu xeni nyi ozɔnwavi kpodo Jesu Klisi we omɛɖeɖoxllan wɛ wlan wema xe.Mawu zɔn-un ɖoxlan a bo do dɔn omɛ xeye na e can lɛye do wa yise mɛ,a bo gɔ do na na ye a nyɔ oxojɔxo çlɔ wi-i a do zan ogbɛ xeni na ɖo sisi na Mawu. ² Ye na do le nukun ɖiɖo mɛ na obɛ mavɔ mavɔ ixe we akpagbe na Mawu xeni mɔ nɔ ɖo awo gɛ lɔ do hwɛkpo ogbɛ lɔ wa jɔ. ³ Hwexenu na ogan etɔn xo,Mawu ɖe oxo etɔn xlɛ.Oxo e nɛ lɔ wɛ e sɔ do asi na-un wɛ un le jla xɔn ɖi ɖena Mawu hwlɛngantɔ mitɔn na ogbe etɔn ɖo ha. ⁴ Un wlan wema xe ɖoxlan we,Titu ovi ce oxojɔxo tɔn le yise xena mi ɖo do okpɔ mɛ.Mawu otɔ,kpo Klisi hwlɛngantɔ mitɔn ni na we fɛnu kpo fifa. ⁵ Un jo we do Klɛti we oto imɛ na a do blo tito xeni kpo,a bo gɔ ɖo agun mɛxoye do toxo lokpo-lokpo mɛ ɖi ɖena nyɔ tesu ɖe ogbe etɔn ɖo na we ɖo ha. ⁶ Ye ma ɖo na mɔ onu nyinyla ɖe,a bo ɖɔ do agunmɛxo go gɛ,agunmɛxo ɖo naɖe nyɔnu lokpo gee,wɛ vikpɛ yetɔn lɛye ɖo na nyi yisenɔye,ye ma wa le do onu nyinyla alo otonu ma se we ohwɛ ɖe na ye xɔn gɛ. ⁷ Le oxojɔxo mɛ,xena e nyi ɖɔ onujikpɔntɔ Mawutɔn wɛ nyi agunkplantɔ,ye ma ɖo na mɔ onu nyinyla ɖe a bo ɖɔ do e go gɛ,e ma ɖo na nɔ kan ogbe na omɛ gɛ, e ka ma le nyi aɖidotɔ,ovunxotɔ,omɛxoɖutɔ,gbɔɔn a do nyi omɛ xe nɔ jo e ɖe do na ahan nunu xɔn gɛ o. ⁸ E ɖo na yi jonɔ ganji,a bo yi owan na oonu jijɔhun,a bo nɔ bu tamɛ hwɛkpo a blo onu a bo nyi omɛ jijlɔ,omɛ mimɛ,abo nɔ ɖu le e ɖe ji. ⁹ Oxo xe ji na ye na kan do,bo sɔgbe xa okplan lɔ,go wɛ e na tɛ do taŋu.Hwenɛnu,e na kpego bo na do akpakpa lanmɛ na omɛ dogbɔn onukpinkplan adodwe lɔ mɛ,a bo do ɖexlɛ omɛ xeye ni nɔ le lɛ ota tɔ ote na oxo lɔ xɔn lɛye ɖɔ ye bo le ofɛn mɛ. ¹⁰ Le oxojɔxo mɛ,omɛ susu le,le otaji,le yisenɔ Jwifunuye mɛ,bo nyi ogufxɔntxɔye,omɛblɛɖutɔye kpo oxovlo ɖɔtɔye. ¹¹ A ɖo na su onu yetɔn,ye nɔ gba oxwedo blebuye,wɛ okplan xeni ma jɛ xa gɛ,ye nɔ na a bo do xo omɛye ɖu. ¹² Omɛ lokpo le ye mɛ,bo nyi ɖɔɖanyiɖɔtɔ yetesutɔn,e ɖɔ mɔsin:"Klɛtitɔye,awo wɛ ye nɔ ɖo tɛgbɛ,kanlin danuwatɔye,aɖiɖɔnɔye,adɔnɔye wɛ ye nyi." ¹³ Oxo e nɛ lɔ,oxojɔxo wɛ e nyi.E wɛzɔn,nɔ gbɛ onu na ye titeŋugbe na ye a do ɖo yise ɖi ɖena e jɛ iɖo ha. ¹⁴ E nɛ,ye ma gɔ do wa le tɛ do Jwifunu lɛye we hwenuxo ma nyɔ ota na ye kpo omɛ xeye ni lɛ godo do oxojɔxo lɛye we osɛnye go xɔn gɛ. ¹⁵ Onu sese nɔ nyi mimɛ na omɛ xeye ni le mimɛ ji lɛye.Vɔ omɛ xeye ni do oɖu lɛye,bo ma kan do Jesu ji gɛ lɛye,onuti ma mɛ na ye gɛ,ɖo susu yetɔn lɛye kpo ayixa yetɔn lɛye do oɖu. ¹⁶ Ye nɔ le ɖɔ xɔn ɖɔ miye lɛye bo nyɔ Mawu wi-i vɔ,dogbɔn ozɔn yetɔn lɛye mɛ,ye nɔ ɖexlɛ ɖɔ ye bo gbɛ-ɛ.Ye nyi ogufɔntɔye,ogbɛ yetɔn xyawu wɛ ye ma kpego bo na blo onu jijɔhun ti gcɛ.