¹ Nyɔ Pɔlu kpo Timɔte,mi omɛ xeye ni nyi ozɔnwatɔ Jesu Klisi tɔn le do ogbe ɖoxlan mi xɔn.Un wlan wema e xe lɔ ɖoxlan yisenɔ sese xeye ni le Jesu Klisi mɛ le Filipu we otomɛ kpo nukɔnnɔtɔ yetɔn lɛye,kaka wa jɛ omɛ xeye nɔ wa ozɔn xa agunnukɔntɔ lɛye ji: ² Mawu miyetɔ kpo Aklunɔ Jesu Klisi ni na mi fɛnu kpodo fifa kpo! ³ Na un gbɛ flin mi le hweɖekpokpwe hwenu,un nɔ do okpɛ na Mawu ce, ⁴ na un le xo oɖɛ xɔn do ota mitɔn mɛ xɔn le hweɖekpokpwe hwenu,un nɔ xo-e kpo xomɛhunhun kpo, ⁵ un nɔ blo lemɔha lɔ do alɔgo xena mi nɔ gɔ na Mawu we oxo jijla wutu sɔn gbexegbe gbɔɔn na mi yise kaka wa jɛ egbe. ⁶ Un kan do e ji ɖɔ Mawu xeni bɛ ozɔn jijɔhun e nɛ lɔ le cɛncɛn mitɔn,na gɔ gbɛn do e nu kaka do yi vivɔnu le gbexegbe na Jesu Klisi wa. ⁷ E nyɔ ganji ɖɔ ma ɖo linlin lemɔha tɔn do mi omɛ lɛye sese go,ɖo mi le ayixa ce mɛ,lemɔhake,le hwexenu na un le ogankpamɛ,alo hwexenu na un le hwlɛn ota na owɛn ɖagbe lɔ xɔn,na ni a do lido,fɛnu xena Mawu blo na-un,e ke wɛ e blo na miye cangba. ⁸ Ɛɛn,Mawwu tesu nyɔ-ɛ ɖɔ un bo yi owan na mimɛ lɛye sese ɖi ɖena Jesu Klisi yi owan na mi ɖo ha. ⁹ Oɖɛ ce xena un nɔ xo na mi,wɛ nyi ɖɔ:Owan xena mi yi na miɖe,ni gɔ yi nukɔn hugan lemɔha,a bo ɖo onunyinywɛ kpo nukunnu mimɔ jɛ onu mɛ xeni sɔgbe kpo. ¹⁰ E nɛ mi ma do mɔ nukunnu jɛ onu xeye ni le vivɛɖe lɛye go,a bo nyi omɛ mimɛ kpo omɛ xeye go na ye mɔ nɔ mɔ oxo ti do gɛ na Jesu Klisi we azan lɔ, ¹¹ e nɛ,mi na na sinsyɛn ogbɛ jijlɔ zinzan tɔn we okun susu xeni nɔ sɔn Jesu Klisi de do wa,wɛ e na nyi gigo kpo kanfu na Mawu. ¹² Anɛyevi lɛye mi,un jlo ɖɔ mia nyɔ-ɛ ɖɔ onu xeni jɔ do jiye wɛ tlɛ zɔn wɛ owɛn ɖagbe lɔ gɔ do yi nukɔn. ¹³ Ɖo e nɛ lɔ wɛ zɔnna omɛ xeye ni le otoga lɔ we oxwegbe sese kpo ofi gbokpwe lɛye kpokpo do nyɔ-ɛ ɖɔ Jesu Klisi na nyɔ bo le sɛn-ɛ xɔn lɔ bɛ bo zɔn na un bo do le ogankpamɛ, gɔ do bɔ do e go,ogan kpamɛ xena un le lɔ, ¹⁴ e zɔn wɛ nɔvi yisenɔ susu kan do Jesu ji.E bo na wɛ ye ɖe oji taŋu,bo nɔ jla Mawu we oxo lɔ,obu ma ɖi. ¹⁵ Le oxojɔxo mɛ,omɛ ɖe lɛye le,bo sɔ awuhwinhwan kpo onudindɔn we ayixa do le jla Jesu we oxo lɔ xɔn,vɔ omɛ ɖe lɛye le jla-ɛ xɔn kpo ayixa jijɔhun kpo. ¹⁶ Omɛ e nɛ lɛye nɔ le blo-e xɔn kpo owanyiyi,ɖo ye nyɔ-ɛ ɖɔ owɛn ɖagbe xena un le hwlɛn ota na xɔn lɔ bɛ bo zɔn na un bo do le ofi e xe, ¹⁷ omɛ ɖiyɛ lɛye le jla Mawu we oxo lɔ xɔn kpo onudindɔn we ayixa kpo,susu yetɔn ma mɛ gɛ,ye le bu-i xɔn ɖɔ miye a bo do vivɛsise ce ji na nyɔ le ogankpamɛ. ¹⁸ Vɔ,e ma wa onuti gɛ,kpɔn,na e gɔ do nyi ayixa nyinyla ji o,alo ayixa jijɔhun ji o,Jesu lɔ jan wɛ ye le jla xɔn.E vivi na-un bo na gɔ vivi na-un kaka do yi. ¹⁹ Ɖo un nyɔ-ɛ ɖɔ dogbɔn oɖɛ mitɔn mɛ kpo alɔgɔ gbigbɔ Jesu Klisi tɔn mɛ,onu e nɛ lɛye kpokpo na hɛn hwlɛngan wa na-un le vivɔnu. ²⁰ Un le ote,bo le nukunɖiɖo mɛ vivɛɖe ɖo onuti ni nɔ kpɔn do ŋunya-un gɛ.Vɔ,un gbɛ le kando e ji xɔn titeŋugbetɔn ɖi ɖena un o nɔ kan do e ji ɖo tɛgbɛ ha ɖɔ un ku o,un le ogbɛ o,gbɛzan ce na kpa gigo na Klisi lɔ; ²¹ ɖo nyɔ,Klisi wɛ nyi ogbɛ ce,oku bo nyi ale na-un. ²² Vɔ na e nyi ɖɔ ogbɛ xena na nɔ le gbɛmɛ fi xe na na na ozɔn xena na wa na na gɔ ɖo ale susu,be un ma gɔ nyɔ xena na gɔ sɔ gɛ. ²³ Un mɔ ɖɔ onu awe e nɛ lɛye wɛ le dɔn-un xɔn,un jlo na lɛ le ogbɛ xe lɔ mɛ,a bo wa yi ci Klisi kɔn,e nɛ lɔ na nyɔ na-un taŋu; ²⁴ vɔ,e le vivɛɖe taŋu na ma nɔ ogbɛ do miye wutu. ²⁵ Un do kando e ji nɛ lɔ,bo nyɔ-ɛ ɖɔ un bo na nɔ anyi,a bo nɔ okpɔ xami omɛ sese,na mi a do ɖo nukɔn yiyi,a bo gɔ mɔ jijwɛ le yise mɛ. ²⁶ E nɛ,na un lɛ okɔ wa mide,mi na do kpego a bo do go le Klisi Jesu mɛ do nyɔ wutu. ²⁷ Onu xena mi ɖo na blo jan wɛ nyi ɖɔ,mi zan ogbɛ xeni sɔgbe xa oxo Mawutɔn lɔ.E nɛ,na un wa mide bo na kpɔn mi,alo na un ma wa gɛ,ma se ɖɔ miye bo gbɛ le ote gliŋu le gbigbɔ lokpo mɛ,bo le zan ayixa lokpo do le fun ahwan xɔn do ota na yise xeni flɔn anyi do owɛn ɖagbe lɔ ji. ²⁸ Mi nɔ kpɔn jo mide do na kɛntɔye a do obu na mi le onuti mɛ gɛ.Ɖo e nɛ lɔ wɛ na nyi ɖexlɛ na ye ɖɔ bubu we omɔji bɛ ye bo le,vɔ miye bo mɔ hwlɛngan.Mawu we ozɔn wɛ nyi e nɛ lɛye, ²⁹ ɖo Mawu na mi fɛnu,e ka ma nyi ɖɔ mi a do kan do Klisi ji kɔkɔlɔkɔ mɛ gɛ,vɔ a bo gɔ do ɖu aya do ota etɔn mɛ, ³⁰ a bo gɔ do fun ahwan lokpo nukunmɛ xena mi mɔ un le fun xɔn xe,mi bo nyɔ-ɛ ɖɔ ahwan e nɛ lɔ jan wɛ un gbɛ kpo le fun xɔn.