¹ Jesu yɔ xodotɔ etɔn wyawe lɛye xɔ kpli bo na ye acɛ, na ye na do nya gbigbɔ mawe lɛye, bo na nɔ gbɔ azɔn lɛye kpokop, kpodo omɛ ɖekpokpwe xena lanmɛ ma le ganji na gɛ. ² Nyikɔ omɛ sɔɖoxlan wyawe lɛye tɔn ɖye: Tintan tɔn, Simɔ xena ye nɔ ylɔ ɖɔ Piyɛ, kpodo nɔvyɛ Andle kpo; Jaki kpodo Jaan kpo bo nyi Zezbede we vi kpɛye. ³ Filipu kpodo Batelemi kpo, Toma kpodo Matye takwɛ jɔtɔ lɔ kpo,Jaki Alufe we vyɛ, kpodo Tade kpo; ⁴ Simɔ ohwɛ yi na oto tɔ kpodo Juda Isikayɔti xena wa sa Jesu lɔ kpo. ⁵ Ye mɛ wyawe nɛ lɛye,Jesu sɔ ye sɔ xɔ ɖoxlan bo kplan onu ye ɖɔ:Mi nɔ kpɔn omɛ xeni ma nyi Jwifunu lɛye de gɛ,mi nɔ kpɔn ka ɖyɛ Samalitɔye ɖe we oto ɖe mɛ gɛ; ⁶ amɔ Izlayɛli vikpɛye xeni ci ɖi lɛngbɔ bubu ha lɛye de wɛ mi na yi. ⁷ Mi jla le omɔ lɛye ji ɖɔ:Axɔluɖuta Mawu tɔn o sɛkpɔ. ⁸ Mi gbɔ azɔn na azɔnnɔ lɛye,mi fɔn omɛ kuku lɛye,mi lɛ gudunɔ lɛye do wewe,a bo nya gbigbɔ mawe lɛye,vɔvɔ wɛ mi yi,miye can mi na vɔvɔ. ⁹ Mi nɔ kpɔn hɛn sika gbɔɔn do hɛb kɔbɔ kaka a do hɛn cɛnjigan ɖe do kɔbɔ hɛnnu ɖe mɛ gɛ o; ¹⁰ mi nɔ kpɔn hɛn awu hɛnnu ti gɛ,mi nɔ kpɔn hɛn awu awe gɛ,mi nɔ kpɔn hɛn fɔkpa gɛ,mi nɔ kpɔn hɛn okpo gɛ,ɖo ozɔnwatɔ do na yi ozɔn kwa etɔn. ¹¹ Na mi jɛ toxo ɖaxo ɖe mɛ alo gletoxo ɖekpokpwe mɛ,mi din omɛ xeni jɛxa bo na yi mi,enɛ mi na nɔ e de gbɔɔn do yi hwexenu na mi na wa sɔn. ¹² Na mi ɖyɛ oxwe ɖe gbe,mi ɖɔ fifa ni nɔ oxwe lɔ gbe; ¹³ na fifa jɛxa omɛ xeni le oxwe nɛ lɛye gbe lɔ,be fifa mitɔn ni bo nɔ ye ji,vɔ na e ka ma jɛxa ye gɛ,fifa mitɔn ni bo gɔ lɛkɔ xodo mi. ¹⁴ Na ye ma yi gɛ,alo ye ma ɖoto oxo mitɔn lɛye gɛ,mi lɛ le oxwe lɔ gbe,toxo nɛ lɔ mɛ,a bo xuxu afɔkɔ mitɔn lɛye. ¹⁵ Ma ɖɔ oxojɔxo na mi: le ohwɛdida zangbe,otodindɔn toxo nɛ lɔ tɔn,na xugan Sodɔmu kpodo Gomɔɔ tɔn kpo. ¹⁶ Eɖye,un le sɔ mi ɖoxlan ɖi lɛngbɔ ha le ohlaye mɛ,mi bo nɔ aceji ɖi odan ha,a bo nyi omɛ fifa ɖi hɔnne lɛye ha. ¹⁷ Mi cɔ miɖe do gbɛtɔ lɛye go,ɖo ye na wa dɔn mi do yi ohwɛ nukɔn lɛ,a bo ɖo o ba na mi le okplitɛn yetɔn lɛye; ¹⁸ ye na wa dɔn mi do yi otokplantɔ lɛye de,kpodo axɔlu lɛye kpo we nukɔn,ɖo nyɔ wutu,na mi na do ɖe kunnu na-un,le ye lɛye kpodo omɛ xeni ma nyi Jwifunu lɛye kpo we nukɔn. ¹⁹ Vɔ, hwexenu na ye na wa wle mi a bo sɔ xɔ yi jo,mi nɔ kpɔn jɛ tagba ɖena mi na ɖɔ oxo do kpodo oxo xena mi na ɖɔ lɔ ga gɛ o,oxo xena mi na ɖɔ,ye na sɔ do ayixa mɛ na mi le oganxixo nɛ lɔ mɛ; ²⁰ ɖo miye tesu mɛ ja ɖɔ oxo lɔ gɛ,gbigbɔ myetɔ tɔn wɛ na le ɖɔ oxo lɔ gbɔn mi ji xɔn. ²¹ Nɔvi-nɔvi na sa yeɖe na oku,ovitɔ bo na sa ovyɛ na oku,vikpɛye na fɔn ogu do omɛjitɔ etɔn lɛye,a bo zɔn dɔ ye ni hu ye. ²² Omɛ lɛye kpokpo na gbɛ owan na mi, ɖo nyikɔ ce wutu,vɔ omɛ xeni do vivɛnu gbɔɔn do yi vivɔnu lɔ na mɔ hwlɛngan. ²³ Na ye do aya na mi le toxo de mɛ,mi si a bo sɔn yi toxo obu mɛ.Ma ɖɔ oxojɔxo na mi,mi ma le gbɔn Izlayɛli we toxo lɛye kpokpo mɛ hwɛkpo na nyɔ gbɛtɔvi lɔ do lɛkɔ wa gɛ. ²⁴ Onukplanvi ɖe mɔ nɔ hugan onukplanmɛtɔ etɔn gɛ,ozɔnwavi ɖe ka mɔ nɔ hugan oga etɔn gɛ. ²⁵ Na onukplanvi ɖe na kpego na nyɔ onu wi kaka a bo ɖi cica etɔn ha,be e o kpe,lemɔha ke oizɔnwavi ɖo na le ɖi oga etɔn ha,ɖo na ye yɔ omɛ xeni kpa acɛ na oxwe lɔ ɖɔBɛlizebulu,nɛmu-nɛmu wɛ na nyi omɛ xeni le oxwe lɔ gbe lɛye tɔn! ²⁶ Mi bo nɔ kpɔn ɖi obu na gbɛtɔ lɛye gɛ,ɖo onu ti ma le hwihwla tɛn wɛ e ma wa le jɛ govɛ xɔn kpɔn gbeɖe xɔn gɛ,lemɔha ke onu ti ka ma le bibɛtɛn na ye ma wa le mɔ-ɛ xɔn kpɔn gbeɖe xɔn gɛ. ²⁷ Oxo xena un le ɖɔ na mi le zinvlu mɛ,mi ɖɔ-ɛ le weziza nu,oxo xena ye na ɖe okpa do ɖɔ na mi,mi jla na omɛ lɛye sese a se. ²⁸ Mi nɔ kpɔn ɖi obu na omɛ xeni na hu gbaza,vɔ e ka ma kpega na hu alindɔn lɔ gɛ,amɔ mi ɖi obu na Mawu xeni ɖo acɛ xena dɔn alindɔn lɔ kpodo gbaza lɔ kpo do ozomaci mɛ. ²⁹ Wizi-wizi awe ma le kɔbɔ ti ji nɛ?Coganco,lokpo yetɔn ka mɔ nɔ ku adavo Mawu yetɔn lɔ we ojlo mɛvo gɛ. ³⁰ Vɔ miye,oɖa xeni le ota na mi lɛye kpokpo wɛ nyi xixlɛ. ³¹ Ewɛzɔn,mi nɔ kpɔn gɔ ɖi obu gɛ,ɖo mi vɛ na Mawu hugan wizi-wizi. ³² Omɛ ɖekpokpwe xeni na ɖe kunnu na-un le gbɛtɔ lɛye we nukun mɛ,ɖɔ miye bo nyi omɛ ce nyɔ can gba na ɖe kunnu ni le atɛye xeni le osɛxwe we lɔ we nukun mɛ,ɖo e yɔ cangba nyi omɛ ce; ³³ vɔ omɛ ɖekpokpwe xeni na gbɛ-un le gbɛtɔ lɛye we nukun mɛ,nyɔ can na gbɛ-ɛ le atɛye xeni sɛxwe lɔ we nukun mɛ gba,ɖɔ un bo ma nywɛ gɛ. ³⁴ Mi nɔ kpɔn bu-i ɖɔ fifa bɛ un bo hɛn do wa anyizan lɔ ji gɛ,un ma hɛn fifa do wa gɛ,vɔ ohi wɛ un hɛn do wa. ³⁵ Ɖo un wa,a do hɛn mima do wa na ovi sunnuglo kpodo otɔ kpo mɛ,ovi nyɔnusi kpodo onɔ kpo mɛ,ovisi kpodo aswɔnɔ kpo mɛ; ³⁶ omɛ tesu we oxwegbe we omɛ lɛye wɛ na nyi kɛntɔ omɛtɔn. ³⁷ Omɛ xeni na nyi owan na otɔ alo onɔ hugan nyɔ,ma jɛxa na nyi ce gɛ,wɛ omɛ ni gɔ na nyi owan na vikpɛ etɔn lɛye hugan nyɔ ma gɔ jɛxa na nyi ce gɛ; ³⁸ na omɛ ɖe ma kɔ akluzu gban etɔn bo xodo-un gɛ,be omɛ nɛ ma jɛxa na nyi xodotɔ ce gɛ. ³⁹ Omɛ xeni jlo na hwlɛn ogbɛ etɔn gan,na bu-i,omɛ xeni ka jlo na bu ogbɛ etɔn do nyɔ wutu,na mɔ ogbɛ etɔn yi. ⁴⁰ Omɛ xeni yi miye,nyɔ wɛ e yi,omɛ xeni ka yi nyɔ,omɛ ni sɔ-un sɔ xɔ ɖoxlan lɔ wɛ e nyi. ⁴¹ Omɛ xeni nyi ɖɔɖanyiɖɔtɔ Mawu tɔn,ɖi ɖɔɖanyiɖɔtɔ Mawu tɔn ha,na mɔ ɖɔɖanyiɖɔtɔ lɔ ajɔ yi,omɛ xeni ka yi dodonɔ ɖi dodonɔ ha wutu,na mɔ dodonɔ nɔ we ajɔ yi. ⁴² Wɛ omɛ ɖekpokpwe xeni na na osin fifa glasin lokpo vɔvɔ omɛ xeni ma nyi xodotɔ ce lɛye gɛ,le oxojɔxo mɛ un le ɖɔ na mi ɖɔ,e ma le ba ajɔ etɔn kpo xɔn kpɔn gbeɖe gɛ.