¹ Le hwenɛnu, Seza Ogwisi ɖe osɛn ɖe tɔn ɖɔ otovi kpokpo bo na do nyikɔ wema mɛ le hlɔma we oto ɖaxo mɛ. ² Nyikɔ dido wema mɛ tintantɔn nɛ lɔ nyi biblo le hwexenu na xɔluɖaxo hlɔmatɔn sɔ kilinuwisi do ɖo oga le Sili we kansinmɛ. ³ Otovi ɖekpokpwe ɖo na yi oto etɔn mɛ a bo do wa yi do nyikɔ wema mɛ. ⁴ Jozɛfu can lɛ le toxo Nazalɛti tɔn mɛ le Galile we kansinmɛ,bo wa yi Bɛtelexɛmu we toxo mɛ le Jude.Ɖo Bɛtelexɛmu wɛ ye ji-i le.E bo tɔn sɔn Davidi we okunkan mɛ. ⁵ E yɔ Mali xeni nyi hwannyi etɔn kpo na wa yi do nyikɔ wema mɛ.Le hwenɛnu lɔ,xoxo o le Mali si. ⁶ Hwexenu alin ɖuɖu jɛ Mali ji wɛ ovi jiji we ogan etɔn ya. ⁷ Mali ji ovi sunnuglo lokpo,xeni nyi ovi tintan etɔn.Vɔ,ye ma wa mɔ tɛnmɛ ti na ye gɛ,wɛ onɔ gbɔjwɛ butu avɔ do-e,bo sɔ-ɛ sɔ mlɔ anyi do onu xe mɛ na ye nɔ na onuɖuɖu kanlin ye do. ⁸ Le kansin nɛ lɔ mɛ,ogbɔkplantɔ ɖe lɛye le bo nɔ le cɔ ogbɔ yetɔn lɛye le ozan mɛ xɔn. ⁹ Wɛnzangun Mawutɔn ɖe ze do nukunmɛ na ye wɛ gigo Mawutɔn tlɔ do ye kpo kinklɛn ɖe kpo,obu ɖaxo ɖe jɛ ye ji. ¹⁰ Wɛnzangun Mawutɔn lɔ ɖɔ na ye ɖɔ:"Mi nɔ kpɔn ɖi kpɔn obu gɛ ɖo owɛn jijɔhun ɖe wɛ un hɛn wa na mi,owɛn xeni na hɛn ojijwɛ ɖaxo wa na otogun Mawutɔn lɔ sese. ¹¹ Le egbe zanmɛ,ye ji hwlɛngantɔ na mi le toxo Davidi tɔn mɛ.Ovi lɔ wɛ nyi Aklunɔ Klisi. ¹² Ɖena mi na nyɔ-ɛ ɖo e ɖye:Mi na mɔ ovivu mɛyɛ ɖe wɛ ye butu avɔ do-e,ye bo sɔ-ɛ sɔ mlɔ anyi do onu xe mɛ na ye nɔ na onuɖuɖu kanlinye do." ¹³ Le zɔnlokpo,wɛnzangun Mawutɔn wɔbu-wɔbu ɖe wa bo bɔ do wɛnzangun tintantɔn lɔ go.Ye jɛ gigo kpikpa na Mawu ji ɖɔ: ¹⁴ "Gigo kpo kanfu wɛ nyi Mawutɔn le sɛxwe,fifa wɛ nyi omɛ xeye na e yi owan na le anyizanji." ¹⁵ Xena owɛnzangun Mawutɔn lɛye lɛ le ye de bo sɔn yi sɛxwe,ogbɔkplantɔ lɛye ɖɔ na yeɖe ɖɔ:"Mi a yi Bɛtelexɛmu a bo do wa yi kpɔn onu xeni jɔ,onu xena Aklunɔ xlɛ mi." ¹⁶ Ye hwlɛndo bleŋu bo sɔn yi otota lɔ mɛ bo do wa yi mɔ Mali kpo Jozɛfu kpo,ye mɔ ovivu mɛyɛ lɔ can le anyimimlɔ le onu xe mɛ na ye nɔ na onuɖuɖu kanlinye lle mɛ. ¹⁷ Xena ye mɔ do lemɔha vɔ,ye jla onu xena ye se do ovi lɔ go lɛye. ¹⁸ Onu xena ogbɔkplantɔ lɛye ɖɔ do ovi lɔ go, kpaca do omɛ ɖekpokpwe xeni se oxo lɔ. ¹⁹ Vɔ, Mali nɔ le flin onu e nɛ lɛye xɔn,a bo le bu otamɛ do e go xɔn. ²⁰ E nɛ godo,ogbɔkplantɔ lɛye lɛkɔ,bo sɔ gigo kpo kanfu na Mawu do onu xena ye se,bo mɔ wutu.Ɖo onu lɛye jɔ pɛpɛpɛ ɖi ɖena wɛnzangun Mawutɔn lɔ ɖɔ ɖo ha. ²¹ Azan cantɔn gɔ xeni nyi jijizan Jesu tɔn,sɔgbe wɛ ye na do gbo ada ni-i.Ye ɖo nyikɔ ɖɔ Jesu ɖi ɖena wɛnzangun Mawutɔn lɔ o ɖɔ na Mali ɖo le osan ha hwɛkpo e do mɔ xoxo etɔn. ²² E nɛ godo,ogan wa xo na Mali kpo Jozɛfu kpo na do sla wu ɖi ɖena osɛn Mɔyizi tɔn ɖɔ ɖo ha,wɛ ye kplan ovi lɔ do yil Mawu we oxwegbe le Jeluzalɛmu a bo do wa yi sɔ-ɛ sɔ xlɛ Mawu lɔ. ²³ Ye blo do lemɔha lɔ,ɖo Aklunɔ Mawu lɔ we osɛn ɖɔ mɔsin:"Ye na ɖe ovi sunnuglo tintan sese ɖo ovo na Mawu." ²⁴ Ye ɖo na sɔ kpanuhwle awe kpo hɔnnɛ awe a bo do san avɔ na Mawu ɖi ɖena osɛn lɔ byɔ ɖo ha. ²⁵ Vɔ, le hwenɛ lɔ nu dahwe ɖe le Jeluzalɛmu wɛ ye nɔ yɔ-ɛ ɖɔ Simenyɔ.Dahwe nɛ lɔ nyi omɛ jijlɔ,bo nɔ ɖo sisi na Aklunɔ Mawu.E le ote kpɔn omɛ xeni na wa hwlɛn Izlayɛli gan.Gbigbɔ Mawu tɔn bo le e ji. ²⁶ Gbigbɔ Mawuotɔn lɔ o ɖe xlɛ-ɛ osan ɖɔ e bo ma le ku xɔn gbɔɔn do wa jɛ hwexenu na e bo na mɔ hwlɛngantɔ Aklunɔ Klisi xena Mawu bo na sɔ ɖoxlan lɔ. ²⁷ Gbigbɔ Mawutɔn kplɛn-ɛ do yi Mawu we oxwegbe.Le hwenɛ lɔ nu,Jozɛfu kpo Mali kpo kplan Jesu do wa Mawu we oxwe lɔ gbe na ye a do blo onu xena osɛn lɔ byɔ ɖɔ ye ni bo blo ni-i. ²⁸ Simenyɔ yi Jesu do alɔ etɔn mɛ, bo do okpɛ na Mawu ɖɔ: ²⁹ "Aklunɔ,odin akpagbe xena a do na-un,wa cicɛ mɛ.A hɛn a yi ozɔnwatɔ tɔwe we gbigbɔ le fifa mɛ. ³⁰ Ɖo nukun ce mɔ hwlɛngan xenan a na mi. ³¹ Hwlɛngan xena a jla ɖo le gbɛtɔ lɛye sese we nukunmɛ. ³² E wɛ nyi weziza xeni na ɖe nyikɔ tɔwe sɔ xlɛ omɛ kpokpo le ogbɛ lɔ mɛ. ³³ Oxo xena Simenyɔ le ɖɔ do ovi lɔ go xɔn kpaca do Jozɛfu kpo Mali kpo,e bo na ye ojijwɛ ɖaxo ɖe. ³⁴ Simenyɔ xo fifa we oɖɛ na ye bo ɖɔ na Mali ɖɔ:"Do ovi xe lɔ go,omɛ susu na jɛ anyi le Izlayɛli we oto mɛ.Lemɔha lɔ ke wɛ Izlayɛli vikpɛ bu ye,na fɔn cite.E na nyi josido Mawutɔn wɛ omɛye na fɔn ogu do e ji. ³⁵ E na ɖe onu hwihwla xeni le ayixa mɛ na gbɛtɔye agbaŋugba,yɔ Mali a nyɔ-ɛ ɖɔ ɖi ɖena ohi onu awe nɔ nɔ gbo omɛ ɖo ha,lemɔha ke wɛ vivɛsise na wa gbo ojikan na we ɖo. ³⁶ Nyɔnu ɖɔɖanyiɖɔtɔ ɖe can le,ye nɔ yɔ-ɛ ɖɔ:Ana,xeni nyi Fanuwɛli we ovi bo tɔn sɔn Azɛ we akɔta mɛ.Nyɔnu lɔ o hwɛn taŋu sɔn nyɔnuvi mɛ etɔn gbɔɔn wɛ e ɖe asu,e yɔ kpo aswɔ kpo bo nɔ okpɔ na oxwe canwe. ³⁷ Nyɔnu e nɛ lɔ,aswɔ ku,wɛ e tlɔ zun okposi bo ma gɔ ɖe asu ti gɛ.Nyɔnu lɔ o ɖo oxwe kanwe nukun ɛnɛ,e ka mɔ nɔ le dɛn le Mawu we oxwegbe gbeɖe gɛ,e nɔ le sɛn Mawu xɔn okle kpo ozan kpo gbɔn onu bibla kpo oɖɛ xixo kpo mɛ xɔn. ³⁸ Xena e yɔ can wa Mawu we oxwe lɔ gbe le oganxixo e nɛ lɔ mɛ pɛpɛpɛ,e jɛ okpɛ dido na Mawu ji do ovi lɔ wutu.E gɔ wa jɛ ovi lɔ we oxo ɖiɖɔ na omɛ ɖekpokpwe xeni le ote kpɔn Mawu ɖɔ e bo na hwlɛn Jeluzalɛmu we toxo gan. ³⁹ Xena Jozɛfu kpo Mali kpo blo onu xeye na osɛn Mawutɔn lɔ byɔ sese vɔ,ye lɛkɔ bo sɔn yi Nazalɛti toxo yetɔn lɔ mɛ,le Galile. ⁴⁰ Ovi lɔ le hwɛn xɔn, bo le ɖo hɔnhlɔn xɔn,e gɔ kpodo onunyinywɛ wɛ fɛnu Mawutɔn le okpɔ xa-ɛ. ⁴¹ E jɛ oxwesɔ-oxwesɔ,Jozɛfu kpo Mali nɔ yi Jeluzalɛmu bo do wa yi ɖu dindinwayi we oxwe. ⁴² Xena Jesu ɖo oxwe wyawe, ye kplan-ɛ do yi Jeluzalɛmu ɖi ɖena ye o nɔ blo ɖo le osan ha,a bo do wa yi ɖu dindinwayi we oxwe lɔ. ⁴³ Xena ye ɖu oxwe lɔ vɔ,Jozɛfu Mali kpo le sɔn yi xwegbe yetɔn xɔn,vɔ ye ma nyɔ-ɛ ɖɔ Jesu ci Jeluzalɛmu lɔ gɛ. ⁴⁴ Ye bu-i ɖɔ Jesu bo le omɛye kpo ye kpo ni zɔn kpɔkpɔ do wa yi Jeluzalɛmu mɛ ha.Xena ye zɔn zɔnlin na anyihinhɔn lokpo vɔ,ye wa jɛ Jesu dindin ji le omɛ yetɔn kpo hadwe yetɔn lɛye kpo de. ⁴⁵ Xena ye ma mɔ-ɛ gɛ,ye gbɔjwɛ lɛkɔ sɔn Jeluzalɛmu lɔ,a bo do, wa yi din-i. ⁴⁶ Azan atɔngɔ gbe etɔn,ye wa yi mɔ-ɛ le Mawu we oxwe lɔ gbe, wɛ e flɔn anyi xa osɛnkplan-omɛtɔye mɛ,bo le ɖo oto ye xɔn,bo le kan oxo ye se xɔn. ⁴⁷ Zinzin etɔn kpo oxo ɖo e go etɔn lɛye xo avo do omɛ xeye ni le ɖo oto wi-i xɔn lɛye. ⁴⁸ Xena Mali kpo Jozɛfu kpo wa yi mɔ-ɛ le flɛn,e kpaca do ye wɛ onɔ ɖɔ ni-i ɖɔ:"Awo!ovi ce,a ni wutu wɛ a do blo lemɔha xa mi?Ojikan mitɔn ɖebla gbo,ɖo atɔwe kpo nyɔ kpo le din we xɔn vɛna-vɛna." ⁴⁹ Jesu ɖo e go na ye ɖɔ:"A ni wutu wɛ mi do le din-un xɔn?Alo mi ma nyɔ-ɛ ɖɔ un ɖo na kpe nukun do ozɔn atɛye tɔn go gɛ wɛɛ?" ⁵⁰ Vɔ, ye ma mɔ nukunnu jɛ oxo xena Jesu ɖɔ na ye lɔ go ganji gɛ. ⁵¹ Jesu xo do-ye,bo lɛkɔ sɔn yi Nazalɛti,bo se otonu na ye.Mali nɔ flin onu e nɛ lɛye sese xɔn e bo le oji mɛ ni-i. ⁵² Jesu le hwɛn xɔn wɛ, onunyinywɛ le jɛ onunyinywɛ ji xɔn, onu etɔn le nyɔ le nukunmɛ na Mawu kpo gbɛtɔye kpo xɔn.