¹ Omɛ susu nɔ okpɔ bo do wlan onu xeni jɔ lokpo-lokpo lɛye le cɛncɛn mitɔn, ² dogbɔn onu xena omɛ tintan xeni nyi kunuɖetɔ lɛye ɖɔ na mi, bo gɔ nyi xwedotɔ Jesutɔn. ³ Ewɛzɔn, nyɔ cangba, e jlo un na ma do din odo na tlintlin sɔn bibɛnu a bo do wlan otan adodwe jijɔhun xena we. ⁴ Un jlo ɖɔ a mɔ nukunnu jɛ e go ɖɔ okplan xena a yi lɛye bo le taji. ⁵ Hwexenu na Elodu nyi xɔlu le Jude, mɔpɛ ɖe nɔ nyi Zakali, bo le mɔpɛ gbɛta Abya tɔn mɛ. Asyɛ sɔn Aalɔn we kuukanmɛ,bo nɔ nyi Elizabɛti. ⁶ Ye mɛ awe lɛye nyi dodonɔ le Mawu nukɔn,bo nɔ setonu na Mawu we osɛn lɛye ganji. ⁷ A mɔ ye ma ji ovi ti gɛ, ɖo Elizabɛti nyi ajikponɔ,wɛ le hwenɛlɔnu,oxwe yetɔn ka o su. ⁸ Gbeɖokpo Zakali le wa Mawuzɔn xɔn,ɖo ⁹ hwenu ogbɛta etɔn tɔn wɛ wa ɖi,ɖena akɔnu yetɔn byɔ ɖo ha,do gbɔn akɔdida mɛ wɛ ye nɔsɔ omɛ le,akɔdida lɔ jɛ e ji na e na do byɛ Mawu we oxo lɔ mɛ a bo do san avɔ na Mawu ¹⁰ Hwexenu na e le san avɔ lɔ xɔn le Mawu we oxɔ lɔ mɛ, omɛ lɛye kpokpo le oɖɛ mɛ le gaji. ¹¹ Wɛnzangun Mawutɔn wa e de le avɔsankpe lɔ we aɖusi mɛ. ¹² Na Zakali do mɔ wɛnzangun lɔ,e caka le eɖe mɛ,bo gɔ kpo obu kpo. ¹³ Wɛnzangun lɔ ɖɔ ni ɖɔ :Zakali nɔ kpɔn ɖi obu gɛ ɖo Mawu se oɖɛgbe tɔwe.Asiwe Elizabɛti na ji ovi sunnu lokpo na we,wɛ a ɖo nyikɔ ni-i ɖɔ Jaan. ¹⁴ E na nyi awajijɛ kpo nyɔna kpo na we,wɛ omɛ susu na mɔ jijwɛ do jiji etɔn go. ¹⁵ Ɖo e na nyi omɛ ɖaxo le Mawu nukɔn, wɛ e ma le nu vɛɛn kpo ahan gigla ti xɔn gɛ. Sɔn dɔmɛ onɔ tɔn gbɔn wɛ e na gɔ kpo gbigbɔ Mawu tɔn kpo le. ¹⁶ Wɛ Izlayɛlitɔ susu na wa sɛn aklunɔ xeni nyi Mawu yetɔn lɔ. ¹⁷ E na wa zɔn zɔnlin gbɔn gbigbɔmɛ le Mawu nukɔn kpodo acɛ Eli tɔn kpo, a bo do dɔn oji ovitɔye tɔn wa vikpɛye de, a bo na na ogufɔntɔ lɛye a ɖo onunyinywɛ, a bo do jla otogun Mawutɔn ɖo. ¹⁸ Zakali ɖɔ na wɛnzangun lɔ ɖɔ : Naɖe wɛ e na jɔ ɖo ? Ɖo un o kpo nyɔxo, wɛ asyi we oxwe can o su. ¹⁹ Wɛnzangun lɔ yi ogbe ni¬-i bo ɖɔ : Nyɔ wɛ nyi Gabliyɛli, omɛ xe le Mawu nukɔn.Ye ɖo un ɖoxlan na ma do do owɛn jijɔhun xena we. ²⁰ Odin, a trɔ onu makɛnɔ, bo ma gɔ le ɖɔ oxo xɔn kaka jɛ gbexegbe na oxo ce lɔ na wa cicɛ mɛ le ohwe etɔn nu gɛ. ²¹ E kpaca otogun lɔ na Zakali do dɛɛn le avɔsinsan we oxɔ lɔ mɛ. ²² Hwexenu na e wa tɔn,e ma gɔ kpego le ɖɔ oxo na ye xɔn gɛ, wɛ ye wa mɔ nukunnu jɛ e mɛ ɖɔ e bo mɔ ɖiɖexlɛ ɖe le avɔsinsan we oxɔ lɔ mɛ.E trɔ onumakɛnɔ, bo nɔ jlɛ onu lɛye na ye kpo alɔ kpo. ²³ Xena e blo ozɔn kpo,e sɔn yi xwegbe etɔn. ²⁴ Zaanɖe asyɛ Elizabɛti mɔ xoxo.E nɔ bibɛmɛ na osun atɔɔn bo le ɖɔ le eɖe mɛ xɔn ɖɔ : ²⁵ Onu xena Mawu blo na un e ɖye ; e blo fɛnu na un bo do ɖe unnya na un le gbɛtɔ lɛye nukɔn. ²⁶ Hwexenu na xoxo etɔn blo sunzan ayizɛn,Mawu sɔ wɛnzangun Gabliyɛli ɖoxlan toxo ɖaxo Galile tɔn mɛ xena ye nɔ ɖɔ Nazalɛti, ²⁷ le nyɔnu xeni le alɔji bon yi hwannyi xa omɛ xena ye nɔ yɔ ɖɔ Jozɛfu,bo sɔn hwɛndo Davidi tɔn mɛ.Nyɔnu le alɔji nɛ lɔ nɔ nyi Mali. ²⁸ Wɛnzangun lɔ e de bo ɖɔ ni ɖɔ : Un do ogbe na we Mali ; yɔ mɛ xena Mawu blo fɛnu ɖaxo na.Mawu le okpɔ xa we. ²⁹ Do gbɔn ogbe dido nɛ mɛ, e caka bo wa le kanse xɔn ɖɔ : Ogbedido bɔ tɔn ha ɖye ? ³⁰ Wɛnzangun lɔ yi ogbe ni-i bo ɖɔ :Mali, nɔ kpɔn so dinkan gɛ ɖo Mawu blo fɛnu na we. ³¹ E ɖye, a ji ovi sunnu lokpo bo na ɖo nyikɔ ni-i ɖɔ Jesu. ³² E na nyi omɛ ɖaxo wɛ ye na yɔ-ɛ ɖɔ ovi Mawu oji tɔn. Aklunɔ na sɔ oga zinkpwe Davidi tɔn ni-i. ³³ E na ɖu xɔlu le Jakɔbu we xwegbe kakaa do yi,wɛ xɔlu ɖuɖu etɔn ma le vɔ xɔn gbeɖe. ³⁴ Mali ɖɔ na wɛnzangun lɔ ɖɔ : Naɖe onu nɛ lɔ na jɔ ɖo, ɖo un ma sɛkpɔ sunnu kpɔn gɛ ? ³⁵ Wɛnzangun lɔ ɖo e go ni-i,bo ɖɔ : Gbigbɔ Mawu tɔn na jɛ jiwe wɛ hɔnhlɔn ɖaxo ɖe na cɔn we.E wɛ zɔn ovi xena a ji,na nyi ovi mimɛ,ye na yɔ-ɛ ɖɔ Mawu we ovi. ³⁶ E ɖye, Elizabɛti can xeni tɔn sɔn xwedo tɔwe gbe can mɔ xoxo le nyɔxomɛ etɔn, xoxo etɔn o blo sunzan ayizɛn,e yɔ na ye ylɔ ɖɔ ajikponɔ. ³⁷ Ɖo onuti ma glo Mawu gɛ. ³⁸ Mali ɖɔ : Mɛsɛntɔ nyɔnusi Mawutɔn wɛ un nyi.Onu xena a ɖɔ na un lɔ ni wa cicɛ mɛ do ji e.E nɛ godo,wɛnzangun lɔ lɛ le e de. ³⁹ Hwenɛnu,Mali hwlɛndo bo yi toxo ɖe mɛ le Jude we tomɛ. ⁴⁰ E ɖyɛ Zakali we oxwegbe bo do ogbe na Elizabɛti. ⁴¹ Xena Elizabɛti se Mali we ogbedido,ovi lɔ hwan le dɔmɛ ni-i.Elizabɛti gɔ kpo gbigbɔ Mawu tɔn kpo. ⁴² E bɛ axwa ɖaxo ɖe dido bo ɖɔ: "Donanɔ wɛ a nyi le nyɔnu lɛye kpokpo mɛ wɛ ovi xena a ji lɔ can nyi donanɔ. ⁴³ Naɖe e nyi ɖo na aklunɔ ce we onɔ na do wa dye? ⁴⁴ Ɖo na un do se ogbedido tɔwe kpowun e jan wɛ ovi xeni le dɔmɛ ce do hwan kpo jijwɛ kpo. ⁴⁵ Nyɔnanɔ wɛ nyi nyɔnu xe di onu do Mawu go,ɖo onu xena Mawu nɔ ɖɔ do e go nɔ wa cicɛ mɛ do e ji. ⁴⁶ E wɛ Mali ɖɔ:" E ɖye okla ce le kpa susu na Mawu xɔn, ⁴⁷ oji ce bo le jijwɛ mɛ do Mawu hwlɛngantɔ cego. ⁴⁸ Ɖo nyɔ ozɔnwavi xeni ma nyi onuti gɛ ji wɛ e kɔ nukun etɔn do.E wɛ zɔn bɛ sɔn odin gbɔɔn do sɔn omɛ lɛye sese na nɔ yɔ ɖɔ nyɔnanɔ. ⁴⁹ Ɖo Mawu hɔnhlɔn nɔ,blo onu ɖaxo-ɖaxoye na un mimɛ wɛ nyikɔ etɔn nyi! ⁵⁰ Dɔŋuɖunu kpɔn na mɛ etɔn le tɛgbɛ na omɛye xe nɔ ɖo sisi ni-i lɛye. ⁵¹ E ɖe hɔnhlɔn etɔn sɔ xlɛ omɛye xena oji yetɔn gɔ kpo goyiyi,e gba ye do. ⁵² E ɖe okpo le agɔ na xɔluye, bo kɔ omɛ xeye ni nɔ sɔ yeɖe hwe do yi oji. ⁵³ Mawu nɔ blo onu jijɔhun susu na omɛye xeni le xovɛ lɛye, a bo nya kɔbɔtɔye asigba-alɔgba. ⁵⁴ E wa gɔ alɔ na Izlayɛli xeni nyi ozɔnsɔ na mɛ tɔ etɔn,a bo do ɖe dɔŋuɖunu kpɔn na mɛ etɔn sɔ xlɛ-ɛ. ⁵⁵ Ɖi ɖena e ɖɔ ɖo na dagbo mitɔn lɛye ɖo ha,bo ɖɔ na Ablaxamu kpodo jijimɛvi etɔn lɛye kaka do yi mavɔ-mavɔ. ⁵⁶ Mali nɔ Elizabɛti kɔn na sunzan atɔn ha,e nɛ godo,e wa sɔn yi oxwe etɔn gbe. ⁵⁷ Odin,ovi jiji Elizaibɛti tɔn we ogan xo,e bo ji ovi sunnuglo lokpo. ⁵⁸ Omɛye xeni le oxwekpali etɔn kpo do xwedo etɔn we omɛye mɔ ɖɔ Mawu bo kpɔn dɔŋuɖunu ni-i wɛ ye jɔ oji xɛ-ɛ. ⁵⁹ Xena ovi lɔ ɖo azan cantɔn, ye wa bo na do gbo ada ni-i.Ye jlo na na otɔ Zakali we nyikɔ wi-i. ⁶⁰ Vɔ onɔ bo gbɛ bo ɖɔ:"Nyikɔ etɔn na nyi Jaan. ⁶¹ Ye bo ɖɔ ni-i ɖɔ:"Omɛɖe ma le xwedo tɔwe mɛ bo ɖo nyikɔ nɛ ha gɛ." ⁶² Ye blo alɔ na ovitɔ lɔ bo do kɛn-ɛ se ɖɔ naɖe wɛ a jlo na yɔ-ɛ ɖɔ. ⁶³ E bo byɔ oxwlɛkpo lokpo xeji na ye nɔ wlan onu do.E bo wlan ɖɔ:"Jaan wɛ nyi nyikɔ etɔn." E bo kpaca do omɛ lɛye kpokpo. ⁶⁴ Tintan lokpo,onu Zakali tɔn hun wɛ e jɛ oxo ɖiɖɔ ji,bo jɛ Mawu kpikpa ji. ⁶⁵ Obu ɖaxo ɖe jɛ omɛye xeni le oxwekpali etɔn ye ji wɛ omɛye xeni le Jude we otomɛ lɛye kpokpo jɛ oxo lɔ ɖiɖɔ ji. ⁶⁶ Omɛye xeni se onu ni jɔ nɔ le kan ayi do onu lɔ go xɔn;ye nɔ le ɖɔ xɔn ɖɔ:"A ni ha wɛ ovye lɔ na nyi?" Le dandan mɛ ɖo Mawu we alɔ le e ji. ⁶⁷ Zakali,otɔ lɔ gɔ kpo Mawu we gbigbɔ kpo,e jan wɛ e do jɛ oxo xena Mawu ɖɔ ni-i ɖiɖɔ ji: ⁶⁸ "Donanɔ wɛ nyi Mawu aklunɔ,Izlayɛli we Mawu,e wa alɔgɔ na otogun etɔn,bo gɔ tlun okan ni-i. ⁶⁹ E na mi hwlɛngantɔ sinsyɛnxu ɖe le Davidi xe nyi ozɔnwatɔ etɔn mɛ. ⁷⁰ Oxo nɛ lɔ wɛ Mawu o ɖɔ le osan xoxo gbɔn ɖɔɖayinyitɔ mimɛ etɔn lɛye we onu mɛ.E ɖɔ ɖɔ ⁷¹ Nyɔ, na hwlɛn mi gan le kɛntɔ mitɔn lɛye we alɔmɛ, a bo gɔ yi mi le alɔmɛ na omɛ ɖekpokpwe xeni gbɛ owan mitɔn. ⁷² Le mɔ ha wɛ Mawu kpɔn dɔŋuɖunu na dagbo mitɔn lɛye ɖo,bo gɔ wa flin okancica mimɛ etɔn lɔ. ⁷³ Ajɔgbe nɛ lɔ wɛ e fyan na Ablaxamu xeni nyi myetɔ bo ɖɔ ni-i ɖɔ, ⁷⁴ na hwlɛn vikpɛ tɔwe lɛye gan le kɛntɔ yetɔn ye we alɔmɛ na ye a do sɛn -un obu maɖi-maɖi, ⁷⁵ ye na nyi omɛ mimɛ, a bo nyi omɛ jijlɔ le nukun ce mɛ tɛgbɛ-tɛgbɛ. ⁷⁶ Zakali gɔ ɖɔ ɖɔ yɔ ovi ce,ye na yɔ we ɖɔ Mawu ɖaxo we oxoɖɔɖanyitɔ.A zɔn zɔnlin le nukɔn na Mawu lɔ a bo do jla omɔ etɔn ji ɖo. ⁷⁷ a blo na otogun etɔn a do nyɔ-ɛ ɖɔ e bo ja a do wa hwlɛn ye gan gbɔn ohwɛsɔkɛ mɛ le onu nyinyla yetɔn lɛye biblo mɛ. ⁷⁸ Mawu mitɔn gɔ kpo dɔŋuɖunu kpo dɔmɛnywɛ kpo.E ta kinklɛn etɔn do mi ji sɔn oji ɖi ɖena ohwe we kinklɛn nɔ ta ɖo ha. ⁷⁹ Kinklɛn nɛ lɔ nɔ ta do omɛ xeni le zinvlu mɛ bo le ɖi obu na oku xɔn ji.E bo na jɔ omɔ na afɔ mitɔn gbɔn fifawe omɔ ji." ⁸⁰ Jaan lɔ le hwɛn le gbaza mɛ kpodo gbigbɔ mɛ xɔn.E wa yi ci gbetotlomɛ gbɔɔn do jɛ gbegbe xena e wa ɖe eɖe sɔ xlɛ Izlayɛli we otogun.