¹ Oxwe wyɛnɛ godo,un lɛ kɔ yi Jeluzalɛmu,nyɔ kpo Banabasi kpo,un gɔ dɔn Titi can, ² un yi flɛn ɖo Mawu ɖe xlɛ un ɖɔ un bo na yi.Xena un yi,nyɔ kpo agun nukɔntɔ lɛye kpo kpli,wɛ owɛnɖagbe xe-un jla nao omɛ xeni ma nyi Jwifuye gɛ,un tinmɛ na ye,ɖo un jlo ɖɔ ozɔn xena un blo san lɔ kpo xena un le blo odin xn lɔkpo ni kpɔn nyi onu vɔvɔ gɛ.

.

³ Titu xe kpodo nyɔ kpo zɔn lɔ,Glɛkinu wɛ e nyi,e ka ma ɖɔ mye bo na gbo ada dandan gɛ. ⁴ Klisi sɛntɔ awo nɔ ɖe lɛye byɔ mimɛ,bo jlo na gbo ada ni,co ye ka ma gbo ni gɛ.Ye jlo na din odo na ɖe ni le xa Klisi lɔ,bo jlo na lilɛ mi,wɛ mi na gɔ tlɔ zun kannu mɔ na Jwifu ye we walɔ. ⁵ Mi ka ma ɖi ke na ye tesu le nukun xwixwe lokpo mɛ tesu gɛ.Mi ka ma blo onu xena ye le din lɔ gɛ,na wɛnɖagbe tesu lɔ a do ci ayixa mɛ na mi. ⁶ Vɔ,xeni nyi omɛ xeye ji na nukun letɔn le oxojɔxo mɛ,onu xena ye o nyi mɛ le vivɛɖe na-un gɛ ɖo Mawu mɔ nɔ can omɛ le omɛ mɛ gɛ,omɛ nukun le e ji nɛ lɛye ma zin onu bu ɖe do ji ye gɛ. ⁷ Ye tlɛ mɔ ɖɔ Mawu bɛ bo sɔ owɛn nywɛ lɔ jijla sɔ do asi na omɛ xeye nyi Jwifunu lɛye gɛ ɖi ɖena e sɔ Jwifuye do asi na Piyɛ ɖo ha. ⁸ Ɖo omɛ xeni sɔ Piyɛ do ɖo omɛɖeɖoxlan Jwifuyetɔn, e yɔ ke wɛ sɔ-un do ɖo omɛ xeye ma nyi Jwifuye gɛ we omɛɖeɖoxlan. ⁹ Jaki,Sefasi,kpo Jaan xeye na ye nɔ mɔ ɖi gundotinha le agun lɔ mɛ,ye mɔ onu jɛ e go ɖɔ Mawu bo sɔ ozɔn kpatakli xe lɔ do asi na-un,e wɛ ye na alɔ nyɔ kpo Banabasi kpo bo do ɖexlɛ ɖɔ mi bo le okpɔ,e nɛ, miye na yi omɛ xeye ni ma nyi Jwifunu gɛ de wɛ ye na yi omɛ xeye ni nyi Jwifunuye de. ¹⁰ Onu xena ye le din do min si xɔn kpoŋu wɛ nyi ɖɔ miye ni bo nɔ flin ayanɔ lɛye e nɛ lɔ go wɛ un nɔ kpe nukun do bo nɔ blo. ¹¹ Vɔ,hwexenu na Sefasi wa Antyɔcu,un gbɛ onu ni-i le omɛye mɛ,ɖo oxo etɔn gble. ¹² Ɖo hwɛkpo na omɛ xeye na Jaki zɔn ɖoxlan lɛye na wa Sefasi nɔ ɖu onu xa yisenɔ xeye ni ma nyi Jwifunu gɛ lɛye,vɔ na omɛ lɛye wa wa,e nɔ wa yi ci ovo na ye,wɛ e mɔ gɔ ɖu onu lɔ xa ye gɛ ɖo e nɔ le ɖi obu na yisenɔ Jwifunuye xeye ni nɔ ɖɔ ɖɔ ye bo ɖo na gbo ada ye xɔn. ¹³ Nɔvi yisenɔ Jwifunu gbokpwe lɛye can jɛ,yɛmɛnu e nɛ lɔ wiwa ji ɖi e yɔ ha,gbɔɔn ye bo dɔn Banabasi tesu can do yɛmɛnu wiwa yetɔn nɛ lɔ mɛ. ¹⁴ Vɔ,xena un mɔ ɖɔ ye bo ma le zɔn do owɛn nywɛ lɔ we oxojɔxo lɔ ji xɔn ganji gɛ,un ɖɔ na sefasi le omɛ kpokpo we nukunmɛ ɖɔ:"Na yɔ omɛ xeni nyi Jwifunu ma kpego bo le zan ogbɛ ɖi Jwifunu ha gɛ,naɖe wɛ a ɖu le omɛ xeye ni ma nyi Jwifunuye gɛ ji ɖo ɖɔ ye ni bo zan ogbɛ ɖi Jwifunuye ha ɖo? ¹⁵ Miye,Jwifuvi jijiye wɛ mi nyi,mi ma nyi onunyinyla blo tɔ xeye ni ma nyi Jwifunu ye gɛ. ¹⁶ Co ganke,mi nyɔ-ɛ ɖɔ e bo ma nyi osɛn nyinyi bo mɛ bo zɔnb wɛ ye nɔ do nyi omɛ jijlɔ le Mawu we nukɔn gɛ, a mɔ dogbɔn yise ɖiɖo do Jesu Klisi ji jan wɛ.E ma nyi gbɔn osɛn nyinyi mɛ gɛ,ɖo Mawu mɔ nɔ sɔ omɛɖe do mɔ omɛ jijlɔ gbɔn osɛn nyinyi mɛ gɛ. ¹⁷ Odin,na mi jlo ɖɔ Mawu a mɔ mi ɖi omɛ jijlɔ ha gbɔn Klisi ji, wɛ e wa nyi ɖɔ onunyinyla blo tɔ wɛ wa sɔ miye can do mɔ,be Klisi lɔ na nyi ozɔnwavi na onunyinyla wɛɛ?Gbeɖe kpɔn. ¹⁸ Ɖo na e nyi ɖɔ osɛn xena un gba wɛ un gɔ wa le vɔ blo ɖo xɔn, be nyɔ tesu wɛ tlɔ zun osɛn ji daletɔ. ¹⁹ Vɔ,le osɛn lɔ we akpa ji,onukuku wɛ un nyi na osɛn lɔ,a bo do nɔ ogbɛ na Mawu.Ye ka-un do atinsoga ji xa Klisi. ²⁰ Odin,e ma gɔ nyi nyɔ wɛ le ogbɛ gɛ,Klisi wɛ le ogbɛ le nyɔ mɛ.Ogbɛ xena un le le odin le agabaza mɛ,un le zan-ɛ xɔn gbɔn yise na un do ɖo ovi Mawutɔn ji,e yɔ xeni yi owan na-un,bo sɔ eɖe sɔ na do ota ce mɛ. ²¹ Un ma gbɛ fɛnu Mawutɔn lɔ gɛ,ɖo na e nyi ɖɔ osɛn lɔ wɛ na zɔn na ye nɔ do nyi ome jijlɔ wɛ,be vɔvɔ wɛ Klisi ku.