¹ Le osan xoxo mi ci ɖi omɛ kuku ha do toliVivɛ mitɔn wutu kpo ohwɛ huhu mitɔn wutu. ² Onu e nɛ lɛye mɛ wɛ mi nɔ jo miɖe do na le osan,a bo nɔ se otonu na omɛ xeni kpa acɛ na ogbɛ xe,gbigbɔ maweye we oga xeye ni le jɛhɔn mɛ.Gbigbɔ maweye we oga nɛ lɔ le wa ozɔn le odin le omɛ xeye ni gbɛ otonu sise na Mawu mɛ xɔn. ³ Mimɛ sesekpo can o ci ɖi onumaɖitɔ e nɛ lɛye ha san.Mi nɔ zɔn zɔnlin gbɔn agbaza we ojlo nyinyla lɛye mɛ.Mi nɔ blo agbaza kpodo linlin mitɔn lɛye we ojlo.Gbɔn ninɔmɛ lemɔhatɔn lɔ mɛ,e na wɛ xomɛsin Mawutɔn le ote kpɔn mi ɖi omɛɖe lɛye ha. ⁴ Amɔ Mawu gɔ kpodo jɔmyɔ kpo do gbɔn wanyinyi ɖaxo na e ɖo na mi wutu. ⁵ Wɛ miye ni o ku gbɔn ohwɛ huhu mitɔn lɛye mɛ,e na wɛ mi lɛkɔ wa ogbɛ xa Klisi lɔ.Gbɔn fɛnu Mawu tɔn mɛ wɛ mi mɔ hwlɛngan le. ⁶ Lokpo xena mi nyi xa Jesu le,e zɔn wɛ Mawu fɔn miye kpo e kpo wa ogbɛ na mi a do ɖu axɔlu xa-ɛ le sɛxwe. ⁷ Mawu blo dɔmɛnyɛ etɔn nɛ lɔ na mi le Jesu Klisi mɛ a bo do ɖe fɛnu ɖaxo etɔn xena ye ma kpego na sɔ jlɛ do nu ɖe go gɛ sɔ xɔ xlɛ jijimɛvi xeye na wa jɔ le osɔ godo lɛye. ⁸ Le oxojɔxomɛ, gbɔn fɛnu mɛ wɛ mi mɔ hwlɛngan le,do gbɔn yise mɛ,miye tesu mɛ blo enɛ lɔ gɛ,onunina Mawu tɔn wɛ. ⁹ E ma nyi ozɔn xeye na mi nɔ wa go mɛ e sɔn gɛ,e nɛ,omɛɖe ma gɔ sɔ do le nyi go xɔn gɛ. ¹⁰ Le oxojɔxo mɛ,Mawu wɛ blo mi do lokpo xena mi blo xa Klisi wutu,e da mi na ozɔn jijɔhun xeye na e wa ɖo anyi lɛye na miye can a do blo ye. ¹¹ E wɛ zɔn,mi nɔ flin onu xena mi nyi san.Mi ma nyi Jwifuvi jiji ye gɛ,Jwifuye bo nɔ yɔ mi ɖɔ omɛ xeye ni ma gbo ada gɛ,a bo yɔ yeɖe ɖɔ omɛ xeye ni gbo ada ye.Vɔ-ɔ adagbigbo e nɛ lɔ,agbaza mɛ we onu wɛ e nyi,gbɛtɔ wɛ ka sɔ alɔ etɔn bo do blo-e. ¹² Mi ɖo nukun e go ɖɔ le hwenɛ lɔ nu, mi ma nyɔ Jesu Klisi lɔ wi-i gɛ,mi ma ka nyi Izlayɛli we otoviye gɛ.Mi nyi jonɔ le akpagbe we okan cica lɛye mɛ. Mi ma kan do nuti ji na osɔ ni ja gɛ.Mi ma le xa Mawu le ogbɛ lɔ mɛ gɛ. ¹³ Vɔ odin,do gbɔn lokpo xena mo nyi xa Jesu Klisi mɛ,mi omɛ xeye ni o le dindɛnnu na Mawu san lɛye wa sɛkpɔ-ɛ dogbɔn Klisi lɔ we ohun mɛ. ¹⁴ Le xojɔxo mɛ,Klisi lɔ wɛ hɛn fifa wa na mi,bo sɔ omɛ ni nyi Jwifu kpodo omɛ ni ma nyi Jwifu gɛ do blo togun lokpo,e wɛ adokpa xeni nyi okɛn bo ma ye mɛ,e hɔ-ɛ dogbɔn oku etɔn mɛ. ¹⁵ E hu acɛ na Jwifuye we osɛn kpodo ogbeɖiɖe etɔn lɛye kpo onu xe ji na ye na zɔngbɔn ye,e nɛ,gbɔn e yɔ ji,omɛ xeni nyi Jwifunu kpo omɛ xeni ma nyi Jwifunu gɛ a tlɔzun otogun yɔyɔ lokpo gee.Lemɔha wɛ e hɛn fifado wa ɖo. ¹⁶ Dogbɔn oku xena e ku le atinsoga ji mɛ e sɔ ye mɛ awe lɛye do blo gbaza lokpo gee bo caye do okpɔ xa Mawu.Lemɔha wɛ e gu okun na okɛn le atinsoga ji ɖo. ¹⁷ E wa do fifa we owɛn na mi omɛ xeye ni le dindɛnnu na Mawu lɛye kpodo omɛ ni sɛkpɔ-ɛ lɛye kpo, ¹⁸ e yɔ lɔ ji wɛ akpa awe lɛye na gbɔn,e wɛ le gbigbɔ mimɛ lokpo lɔ mɛ,omɔ hun na mi na mi a do yi Mawu otɔ lɔ we nukɔn. ¹⁹ E le lemɔha,mi ma gɔ nyi jonɔ alo ohwɛnzɛtɔye gɛ,amɔ mi yi nyi onu lokpo lɛye xa omɛ ni ɖo mima leMawu we hwɛndo mɛ. ²⁰ Mi trɔ zun oxɔ xe we dodwe ni nyi mɛsɔɖoxlan kpodo ɖɔɖanyiɖɔtɔ Mawu tɔn ha.Jesu tesu nyi okpɛn adodwe lɔ. ²¹ E yɔ ji wɛ oxɔ lɛye kpokpo nɔ flɔn anyi do,bo nɔ yi ji,enɛ lɔ nɔ do nyi oxwe mimɛ na Aklunɔ. ²² Do gbɔn e yɔ ji wɛ miye can nyi okpɛn xena ye do gba oxɔ lɔ we akpaxwe ɖe lɛye;e nɛ mi omɛ sese na nyi nɔtɛn na gbigbɔ Mawutɔn.