¹ Nyɔ Pɔlu xeni nyi omɛɖiɖe ɖoxlan Jesu klisi dogbɔn Mawu we ojlo mɛ,wɛ wlan wema xe ɖoxlan yisenɔ xeye ni le Efɛzi bo le ogbeji le Klisi Jesu mɛ lɛye. ² Na fifa kpodo jɔmyɔ kpo ni nɔ mi ji do gbɔn Mawu mye tɔ kpodo Jesu klisi Aklunɔ mitɔn mɛ. ³ Okpɛ na Mawu xeni nyi otɔ na Jesu Klisi mitɔn.E yɔ wɛ dona mi gbɔn gbigbɔ mɛ do gbɔn Klisi mɛ le sɛxwe tomɛ! ⁴ Mawu yɔ mi gbɔn Jesu mɛ sɔn ogbɛ dida hwenu gbɔn na mi a do nyi omɛ mimɛ,xego na ohwɛ ɖe ma le gɛ le nunkun mɛ ni-i. ⁵ Mawu o can mi ɖo anyi ɖi ovi ha do gbɔn Jesu Klisi ji ɖi ɖena e jlo ɖo ha le wanyiyi etɔn mɛ. ⁶ E wɛ zɔn, mi a kanfu Mawu na fɛnu ɖaxo etɔn xena e blo na mi gbɔn ovi vɛna-vɛna etɔn Jesu Klisi ji. ⁷ Le e yɔ Jesu lɔ mɛ,mi mɔ okantun-tun gbɔn ohun etɔn mɛ,le e yɔ lɔ ke mɛ,Mawu sɔ ohwɛ huhu mitɔn lɛye sɔ ke mi do ɖena fɛnu etɔn lɔ su ɖo go. ⁸ Fɛnu nɛ lɔ wɛ e ma do mi ji bo do na mi onunyinywɛ xeni sɔgbe kpo zinzin xeni sɔgbe kpo. ⁹ Onu hwihwla xewe oxo xena e o ɖɔ xoxoxo gbɔn ojlo etɔn mɛ,e na wɛ mi mɔ nukunnu jɛ e go le Klisi mɛ dogbɔn dɔmɛnywɛ etɔn mɛ. ¹⁰ Tito o nɛ lɔ,Mawu blo wɛ e na wa cicɛmɛ le ohwe etɔn nu,e wɛ nyi ɖɔ e na kpli onu lɛye kpokpo,xeye ni le sɛxwe kpo xeye ni le anyi zanji lɛye do agɔ na oga lokpo,e wɛ nyi Klisi lɔ. ¹¹ Le Klisi mɛ ye yɔ mi ɖɔ oguɖutɔye.E nɛ lɔ o nyi ɖiɖɔ ɖanyi bo le titomɛ na omɛ xeni nɔ blo onu kpokpo do ɖe na eyɔ tesu jlo ɖo ha. ¹² E nɛ,mi omɛ xeye ni nyi tintan lɛye,bo sɔ nukunɖiɖo mitɔn ɖo Klisi ji lɛye na do Kanfu Mawu do ɖena e klo ɖo. ¹³ Klisi lɔ mɛ ke wɛ miye can se oxo xojɔxo tɔn lɔ le,owɛn nywɛ xeni hwlɛn mi gan lɔ.E yɔ lɔ ke ji wɛ mi kan do,Mawu bo sɔ gbigbɔ ɖedovotɔn xe we akpagbe na e do lɔ do ɖo josi mi. ¹⁴ Gbigbɔ ɖedovo tɔn lɔ,wɛ nyi ganjɛ e go kpatakli na mi ɖɔ mi ye bo na yi cinɔ lɔ,e wɛ zɔn mi a kanfu wi-i do ɖena e klo ɖo go. ¹⁵ E wɛ zɔn xena nyɔ can un se ɖena mi ɖi onu do Aklunɔ Jesu go ɖo,kpo owanyiyi xena mi ɖo na yisenɔ lɛye ɖo, ¹⁶ un ma gɔn okpɛ dido na Mawu kpodo oɖɛ xixo do ota mitɔn mɛ gbeɖe gɛ. ¹⁷ E nɛ,Aklunɔ mitɔn Jesu klisi we Mawu otɔ gigonɔ na do na mi,gbigbɔ onunyinywɛtɔn xe nɔ ɖe omɛ xena e nyi sɔ xlɛ na mi a do nywɛ ganji, ¹⁸ ni na na kinklɛn etɔn a ta do oji mitɔn lɛye mɛ,nami a do nyɔ nukunɖiɖo xena e yɔ mi na lɔ,a bo gɔ nyɔ ɖena gigo we cinɔ xena mi na ɖo mima le e mɛ xa yisenɔ lɛye klo ɖo. ¹⁹ Mi na gɔ nyɔ ɖena hɔnhlɔn etɔn xeni le wa ozɔn le mimɛ yisenɔ lɛye mɛ xɔn,klo bo le ota na onukpokpo ɖo hɔnhlɔn e nɛ lɔ wɛ Mawu ɖe xlɛ kpo acɛkpikpa kpo. ²⁰ Le Klisi mɛ bo do fɔn-ɛ sɔn oku le omɛkukuye mɛ,bo sɔ flɔn anyi le aɖusi mɛ etɔn le sɛxwe, ²¹ Klisi lɔ le ota na acɛkpikpa ɖekpokpwe,xɔluɖuɖu ɖekpokpwe kpo nyikɔ ɖekpokpwe xena ye na gbɛ yɔle ogbɛ egbetɔn xe mɛ kpodo ogbɛ xeni ja mɛ. ²² Mawu sɔ onu lɛye kpokpo sɔ xɔ ɖo Klisi we acɛ mɛ,bo ze sɔ xɔ do nukɔn na agun lɔ wɛ e nyi wɛ nyi oga ɖaxo. ²³ Agun Mawu tɔn lɔ,gbaza Klisi tɔn wɛ,wɛ Klisi xeni kpacɛ na ogbɛ lɔ sese,agun mɛ wɛ e ɖe kpokpo xlɛ le.