¹ Nyɔ Pɔlu xeni nyi omɛɖiɖe ɖoxlan Klisi Jesu tɔn gbɔn ojlo Mawutɔn mɛ, kpo nɔvi le ² yisemɛ Timɔte le do ogbe ɖoxlan mi xɔn. Yisenɔ xeni le Kolɔsu lɛye, xeye ni nyi nɔvi ogbejinɔtɔ lɛye le Klisi mɛ wɛ un wlan wema xe ɖoxlan. Mawu mi ye tɔ lɔ ni na mi fɛnu kpo fifa. ³ Mi nɔ do okpɛ na Mawu xeni nyi Alunɔ mitɔn Jesu Klisi we otɔ gbɔn oɖɛ xena mi nɔ xo tɛgbɛ do ota mitɔn mɛ. ⁴ Ɖo mi se ɖena mi ɖo onuɖiɖi do Jesu Klisi go ɖo, bo gɔ se ɖena mi yi owan na yisenɔ lɛye sese ɖo. ⁵ Onuɖiɖi e nɛ lɔ kpo owanyiyi nɛ kpo wɛ nyi nukunɖiɖo mitɔn xena Mawu sɔ ɖo anyi na mi le sɛxwe. Mi se nukunɖiɖo lɔ we oxo le hwexenu na ye jla wɛnɖagbe lɔ na mi. ⁶ Wɛnagbe nɛ lɔ wa kaka mide ɖiɖena e le syɛn okun xɔn le ogbɛ lɔ mɛ kpokpo ɖo bo le gbakpe xɔn ɖo ha, lemɔha lɔ ke wɛ e le blo le mide xɔn sɔn azan tintan xe gbe na mi se bo nyɔ fɛnu Mawutɔn lɔ oxo jɔ xotɔn. ⁷ Ekpaflasi xeni nyi ozɔngbɛ mitɔn vɛna-vɛna wɛ kplan onu e nɛ lɔ mi, ozɔn watɔ gbejinɔtɔ Jesutɔn wɛ e nyi bo le wa ozɔn do otɛn mitɔ mɛ xɔn, ⁸ Owanyiyi xena gbigbɔ mimɛ sɔ do mi mɛ, e o ɖɔ oxo etɔn na mi. ⁹ E wɛ zɔn, miye can, sɔn gbexegbe gbɔɔn na mi se oxo nɛ lɛye, mi ma gɔn oɖɛ xixo do ota mitɔn mɛ kpɔn gbeɖe gɛ. Mi nɔ byɔ Mawu ɖɔ ni bo blo na miye a bo nyɔ ojlo etɔn ganji, a bo na mi onunyinywɛ xe kpegan kpo zinzin ɖo gbɔn gbigbɔ mimɛ ji. ¹⁰ E nɛ, mi na do zan ogbɛ gbɔn ojlo Aklunɔ tɔn mɛ, a bo nyɔ kpinkpɔn ni-i le onu ɖekpokpwe mɛ, a bo nɔ blo ozɔn jijɔhun ɖekpokpwe, a bo le nyɔ Mawu do eji xɔn. ¹¹ Mawu ni do hɔnhlɔn mi le onu ɖekpokpwe mɛ gbɔn hɔnhlɔn gigo tɔn etɔn mɛ na mi a nɔ do do vivɛnu, a bo nɔ kunhun le xwlekpɔn ɖekpokpwe mɛ kpo ayajijɛ. ¹² Mi nɔ do okpɛ na Mawu otɔ lɔ xeni blo wɛ mi do kpego ɖo mima le cinɔ yisenɔ lɛye tɔn le axɔluɖuto weziza tɔn lɔ mɛ. ¹³ E hwlɛn mi gan le zinvlu we acɛ gɔ, bo kɔ mi sɔ do ovi etɔn vɛna-vɛna we xɔluɖuɖu mɛ. ¹⁴ Ovi etɔn lɔ mɛ wɛ mi mɔ okantuntlun le, e bo sɔ onu nyinyla mitɔn lɛye sɔ kɛ mi. ¹⁵ Klisi lɔ wɛ nyi Mawu xena mi ma le mɔ xɔn gɛ we ninɔmɛ. Klisi lɔ o le hwɛkpo onu dida ɖekpokpwe wa jɔ. ¹⁶ Ɖo e yɔ ji wɛ Mawu gbɔn bo do blo onu kpokpo le anyizan ji kpodo ojinukunsin. Onu xena nkun nɔ mɔ wɛ alɔ xena nukun mɔ nɔ mɔ gɛ wɛ, hɔnhlɔn gbigbɔn mɛ tɔn lɛye wɛ, xɔluɖuɖu lɛye wɛ, acɛ kpikpa lɛye wɛ ogaɖuɖu lɛye wɛ, onu kpokpo wɛ Mawu blo gbɔn e ji, e bo blo ye ni-i. ¹⁷ E ka o le hwɛkpo onu nɛ lɛye wa jɔ. E yɔ lɔ wɛ onu e nɛ lɛye kpokpo gbɔn bo do le ote. ¹⁸ E yɔ wɛ nyi ota na agbaza xeni nyi agun lɔ. E yɔ wɛ nyi titɔ e ji, e yɔ ke wɛ gɔ nyi omɛ xeni fɔn tintan le omɛ kuku ye mɛ, a bo do nyi tintan le onu kpokpo mɛ. ¹⁹ Ɖo, Mawu sɔ ogbeta a bo do nɔ ovi etɔn lɔ mɛ blebu. ²⁰ E na gɔ do jɛ okpɔ xa onu kpokpo gbɔn ovi etɔn lɔ ji, onu xeni le anyizan ji o, xeni le sɛxwe o, a bo blo wɛ fifa na nɔ anyi gbɔn ovyɛ we ohun xeni kɔn ɖo anyi le atin soga ji mɛ. ²¹ Le osan, mi dɛɛn do Mawu, bo nyi kɛntɔ ni-i gbɔn susu nyinyla mitɔn lɛye kpo onu nyinyla wiwa mitɔn lɛye mɛ. ²² Odin, Mawu jɛ okpɔ xami gbɔn ovyɛ xeni wa tlɔ gbɛtɔ bo ku lɔ ji, e nɛ, le nukun mɛ etɔn, mi na do nyi omɛ mimɛ ye, omɛ xeye na ye ma le do ohwɛ ti na xɔn gɛ, a bo nyi omɛ xena ye ma mɔ onu wanyido ti na xɔn gɛ. ²³ Vɔ, mi nɔ yise lɔ mɛ, a bo nɔ ote gliŋu. Mi nɔ kpɔn na onuɖe a dɔn mi sɛle owɛn ɖagbe xena mi se lɔ we nukunɖiɖo mɛ gɛ, owɛnɖagbe nɛ lɔ wɛ ye jla na omɛ ɖekpokpwe ni gbɛ le ogbɛ lɔ mɛ, e nɛ lɔ wɛ nyɔ Pɔlu wa nyi mɛsɛntɔ na. ²⁴ Odin, vivɛ xena un le se xɔn do mi go nyi jijwɛ n-un; vivɛ nɛ lɔ wɛ un le se le agbaza ce mɛ xɔn do ota na agbaza Klisitɔn xeni nyi agun lɔ, a bo do sɔ onu xeni hwedo vivɛ na Klisi se sɔ xɔ kpe-e. ²⁵ Agun lɔ wɛ un tlɔzun mɛsɛntɔ na do ozɔn xena Mawu sɔ do alɔ mɛ na-un do miye wutu, e wɛ nyi ɖɔ ma jla oxo etɔn lɔ sese. ²⁶ Onu budo ɖe wɛ e nyi wɛ e sɔ hwla do gbɛtɔ kpokpo sɔn xoxo hwenu gbɔɔn, vɔ odin e wa ɖe-e sɔ xlɛ yisenɔ lɛye. ²⁷ E jlo na ɖedɔkun kpo gigo xeni le onu budo lɔ mɛ sɔ xlɛ ye le omɛ xeye ni ma nyi Jwifunu ye gɛ mɛ. Onubudo lɔ wɛ nyi ɖɔ: Klisi le mimɛ, gbɔn e yɔ lɔ ji, nukun ɖiɖo le na mi wɛ mi na do ɖo mima le gigo Mawutɔn mɛ. ²⁸ Klisi lɔ we oxo wɛ mi le jla xɔn, bo do le xokpa na omɛ ɖekpokpwe xɔn, bo gɔ do le kplan onu omɛ ɖekpokpwe xɔn gbɔn onu nyinywɛ ɖekpokpwe mɛ, a bo do na na omɛ ɖekpokpwe xeni le Klisi mɛ, a hwɛn le gbigbɔ mɛ. ²⁹ E nɛ lɔ wɛ zɔn un do le wa ozɔn xɔn, bo le jɛ tagba xɔn kpo hɔnhlɔn Klisi tɔn xeni le wa ozɔn sinsyɛn ɖe le nyɔ mɛ xɔn.