¹ Le Sezalendahwe ɖe le,ye bo nɔ yɔ-ɛ ɖɔ Kɔnɛyi,e bo nyi sɔjakanweko le ahwangbɛ Hlɔmatɔn xena ye nɔ yɔ ɖɔ:Itali we ahwangbɛ mɛ. ² Dahwe nɛ lɔ kpodo Aklunɔ etɔn kpo,nɔ ɖi obu na Mawu a bo ɖo sisi ni-i,e bo nɔ blo onunina susu na ayanɔ xeye ni le Jwifu we togun lɔ mɛ,bo nɔ xo oɖɛ na Mawu xɔn le ohwe kpokpo nu. ³ Gbelokpo,le hwedo gantɔn mɛ lemɔha,le ɖiɖexlɛ ɖe mɛ,e mɔ Mawu we owɛndotɔ ɖe ceɖe-ceɖe,e bo wa e de,bo ɖɔ ni-i ɖɔ mɔsin:Kɔnɛyi! ⁴ E wɛ kɔnɛyi kpɔn wɛnzangun lɔ tlululu,obu bo jɛ e ji,e bo kan-ɛ se ɖɔ:Aklunɔ,a ni we jɔ?Wɛnzangun lɔ bo ɖo e go ni-i ɖɔ:Mawu se oɖɛgbe tɔwe,bo mɔ alɔgɔ tɔwe xena a nɔ gɔ na ayanɔye,e ka ma wɔn we gɛ. ⁵ Odin,ɖo omɛye ɖoxlan Yope na ye a wa yi dɔn Simɔ xena ye nɔ gɔ yɔ ɖɔ Piyɛ do wa. ⁶ E zɛ Simɔ obu,xeni nyi olangbaza zɔnwatɔ we oxwegbe,oxwe lɔ bo le oxuto. ⁷ Xena wɛnzangun xeni ɖɔ oxo ni-i lɔ,sɔn vɔ Kɔnɛyi yɔ ozɔnwatɔ etɔn awe kpodo sɔja ɖe xeni le agɔ ni-i,bo nɔ si Mawu, ⁸ e bo to oxo lɔ kpokpo na ye, e nɛ godo e ɖo ye ɖoxlan Yope. ⁹ Le ayihɔngbe etɔn,hwexenu na ye le omɔ ji,bo le sɛkpɔ Yope xɔn,Piyɛ xlɛ oxɔ ɖe ta,le ogan wyawe mɛ lemɔha bo na do xo oɖɛ. ¹⁰ Xovɛ ci-i e bo jlo na ɖu onu,le hwexenu na ye le ɖa onu ɖuɖu lɔ xɔn, e bu do eɖe. ¹¹ E mɔ sɛxwe huhu,onu ɖi avɔ ɖaxo ɖe ha,bo le zinvlu mɛ bo ja le azo ɛnɛ etɔn lɛye ji,bo le jɛ oto wa anyizan ji xɔn. ¹² Kanlin hamɛ-hamɛye bo le avɔ ɖaxo lɔ ji,xeye ni ɖo afɔ ɛnɛ ye wɛ,xeye ni nɔ dɔn afɔ gbɔn anyizanmɔ lɛye wɛ,kpodo oxɛ hamɛ-hamɛye. ¹³ Ogbe ɖe bo ɖɔ ni-i ɖɔ mɔsin:Piyɛ,cite,hu olan lɔ ɖu! ¹⁴ Vɔ Piyɛ bo ɖo e go ni-i ɖɔ:O o!Aklunɔ,un ma le ɖu onu ɖuɖu ti gbɔɔn do ɖu onu xeni ma mɛ ti gɛ kpɔn xɔn gɛ. ¹⁵ Ogbe lɔ bo gɔ ɖi ni-i hwlawegɔ ɖɔ mɔsin:Onu xena Mawu sɔ tlɔ zun onu mimɛ,e yɔ,nɔ kpɔn gɔ yɔ-ɛ ɖɔ onu ɖuɖu gɛ! ¹⁶ Onu lɔ jɔ ɖo lemɔha hwlatɔnkpetekple,e nɛ godo hɔnlokpo ye bo sɔ onu lɔ sɔ sɔn yi sɛxwe. ¹⁷ Piyɛ bo flu,e ka ma nyɔ onu xena ɖexlɛ nɛ lɔ le ɖɔ xɔn gɛ,le hwenɛ lɔ nu omɛ xeye na Kɔnɛyi ɖo doxlan lɛye,bo le din Simɔ olangbazazɔnwatɔ lɔ we oxwegbe,bo wa le hɔntogbo lɔ mɔnu, ¹⁸ ye bo do axwa bo kan se ɖɔ:Fye wɛ Simɔ xena ye nɔ yɔ ɖɔ Piyɛ lɔ le? ¹⁹ Piyɛ bo gbɛ kpɔtɔ le bu ota mɛ xɔn do onuɖexlɛ lɔ go,e wɛ gbigbɔ mimɛ ɖɔ ni ɖɔ:Kpɔn omɛ atɔn le din we xɔn, ²⁰ site a bo jɛ ote,a bo xodo ye do sɔn,nɔ kpɔn xo onu ti kpɔn hwɛkpo gɛ,ɖo nyɔ wɛ ɖo ye ɖoxlan. ²¹ Piyɛ jɛ ote wa omɛ lɛye de,bo ɖɔ na ye ɖɔ:Nyɔ ɖye,nyɔ wɛ nyi omɛ xena mi le din xɔn lɔ,a ni wɛ hɛn mi do wa? ²² Ye bo ɖo e go ɖɔ mɔsin:Sɔjakanwekoga Kɔnɛyi wɛ sɔ mi ɖoxlan,omɛ jijlɔ wɛ e nyi,bo nɔ ɖo obu ɖi si na Mawu,Jwifuye we togun lɔ kpokpo bo nɔ ɖe kunnu ɖagbwɛ do e go,Mawu we wɛnzangun wɛ xo okpa ni-i ɖɔ ni bo na na ye a bo dɔn we do wa oxwe etɔn gbe,e bo na do se oxo tɔwe. ²³ E wɛ Piyɛ yɔ ye do oxwe lɔ gbe,bo yi jonɔ na ye,le anyihɔngbe etɔn e jɛ omɔ xa ye,nɔvi yisenɔ ɖeye xeni le Yope lɔ,bo xodo-e. ²⁴ Ye wa yi jɛ Sezale le anyihɔngbe etɔn,Kɔnɛyi bo le te kpɔn,e bo yɔ,Aklunɔ etɔn we omɛye,kpodo hadwe vɛna-vɛna etɔnye kpo. ²⁵ Xena Piyɛ ɖo afɔ oxwe lɔ gbe,Kɔnɛyi wa kpe-e,bo jɛ oklo ni-i,bo do onu odo ni-i. ²⁶ Vɔ Piyɛ bo fɔn-ɛ cite,bo ɖɔ ni-i ɖɔ:Cite,nyɔ can,gbɛtɔ ke wɛ un nyi. ²⁷ Piyɛ bo jɛ tagba xa Kɔnɛyi xɔn bo ɖyɛ oxwe lɔ gbe,e bo mɔ omɛ susuye xeni wa kpli ye. ²⁸ E bo ɖɔ na ye ɖɔ:Mi nyɔ-ɛ ɖɔ Jwifu ti bo ma ɖo na do oha xa omɛ xeni ma nyi Jwifu gbɔɔn a bo ɖyɛ oxwe etɔn gbe can gɛ,vɔ Mawu ɖe xlɛ-un ɖɔ,ye ma ɖo na yɔ omɛ ti ɖɔ omɛ ɖuɖu alo omɛ xeni ma mɛ gɛ. ²⁹ E wɛ zɔn xena mi yɔ-un,un ma kpego na gbɛ gɛ,odin a ni wɛ zɔn ɖɔ mi do yɔ-un ɖɔ nyɔ ni bo wa? ³⁰ Kɔnɛyi bo ɖo e go ni-i ɖɔ:Anyihinhɔn ɛnɛ ɖiye,le hwedo gantɔnmɛ le leha hwenu,un le xo oɖɛ le oxwe ce gbe,hɔnlokpo kpoŋu,un mɔ dahwe ɖe le ote le nukɔn na-un,awu xena e do,bo le klɛn xɔn. ³¹ E bo ɖɔ na-un ɖɔ:Kɔnɛyi,Mawu se oɖɛ tɔwe,e ka ma wɔn alɔgɔ xena a nɔ blo na ayanɔ ye gɛ. ³² Zɔn omɛye ɖoxlan Yope,na ye a wa yi yɔ Simɔ xena ye nɔ yɔ ɖɔ Piyɛ,do wa,e le Simɔ olangbazazɔnwatɔ lɔ we oxwegbe,oxwe lɔ bo le oxuto. ³³ Hɔnlokpo un bo ɖo omɛye ɖoxlan,na ye a do wa yi yɔ we,e na cɛ na we na a do wa,odin mimɛ lɛye sese nɛ le nukɔn na Mawu,a do se oxo kpokpo xena Aklunɔ Mawu lɔ na ɖɔ na we ɖɔ yɔ ni bo ɖɔ na mi. ³⁴ E wɛ Piyɛ yi oxo,bo ɖɔ mɔsin:Odin,un mɔ nukun jɛ e go le oxojɔxo mɛ ɖɔ mɔsin,Mawu bo mɔ nɔ ɖe omɛ ɖe do ovo na omɛ ɖe gɛ. ³⁵ Vɔ le tigun ɖekpokpwe mɛ,omɛ xeni nɔ ɖi obu na Mawu,a bo blo onu jijlɔ,wɛ nɔ nyɔ kpinkpɔn na Mawu. ³⁶ E sɔ oxo lɔ ɖoxlan Izlayɛli vikpɛ lɛye,bo do jla owɛn ɖagbwɛ lɔ na ye,ye bo na do mɔ fifa gbɔn Jesu Klisi ji,e yɔ xeni nyi Aklunɔ na omɛ lɛye kpokpo. ³⁷ Mi nyɔ onu xeni jɔ le Jude we kansin lɔ mɛ kpokpo,e bo bɛ sɔn Galile we kansinmɛ,le hwexenu na Jaan jla Mawu we osin lilɛ we oxo godo. ³⁸ Mi bo gɔ nyɔ ɖena Mawu sɔ gbigbɔ mimɛ kpodo hɔnhlɔn do si a mi na Jesu Nazalɛtitɔn ɖo,e bo nɔ yi ofi ɖekpokpwe xɔn,a bo gɔ wa onu ganji,a bo gbɔ azɔn na omɛ xeye ni le lɛgba we acɛ gɔ ye,ɖo Mawu le okpɔ xa-ɛ. ³⁹ Miye mi bo mɔ onu lɛye sese xena e blo le Jeluzalɛmu kpodo Jwifuye we oto lɔ we akpa gbokpweye ji,ye bo ka-ɛ do atisoga ji bo do hu-i. ⁴⁰ Mawu bo fɔn-ɛ sɔn oku le anyihɔngbe atɔngɔ etɔn gbe,bo ɖe omɔ ni-i ɖɔ ni bo ɖe eɖe sɔ xlɛ, ⁴¹ miye omɛ xeye ni nyi kunnuɖetɔ xeye na Mawu o can osan lɛye,mi bo ɖu onu xa-ɛ le finfɔn sɔn oku etɔn we godo,e ka ɖe eɖe sɔ xlɛ togun lɔ kpokpo. ⁴² Jesu lɔ bo ɖe ogbe na mi ɖɔ miye ni bo jla,a bo ɖo okpɛn e ji,na togun lɔ ɖɔ mɔsin,e yɔ bɛ Mawu bo can ni a do nyi ohwɛɖɔtɔ na omɛ le ogbɛye kpodo omɛ kukuye kpo. ⁴³ E yɔ go wɛ ɖɔɖanyiɖɔtɔ lɛye kpokpo ɖe kunnu do,ɖɔ omɛ ɖekpokpwe xeni bo na kan do e ji,bo na mɔ ohwɛ sɔkɛ na onu nyinyla etɔnye dogbɔn Jesu lɔ we nyikɔ mɛ. ⁴⁴ Xena Piyɛ gbɛ le ɖɔ oxo xɔn,gbigbɔ mimɛ jɛ ote do omɛ kpokpo xeni le se oxo lɔ xɔn ye ji. ⁴⁵ Xena yisenɔ xeye ni kplan Piyɛ do wa lɛye,mɔ ɖɔ Mawu bo na gbigbɔ mimɛ omɛ xeye ni ma nyi Jwifuye cna gɛ, e kpaca do ye. ⁴⁶ Ɖo ye se ye bo le do ogbe bubuye xɔn,bo le kanfu Mawu xɔn,e wɛ Piyɛ ɖɔ mɔsin: ⁴⁷ Omɛ ɖena kpego na gbɛ Mawu we osin lilɛ an omɛ ye xeni yi gbigbɔ mimɛ ɖi miye ha? ⁴⁸ E bo ɖe ogbe ɖɔ ye ni bo lɛ Mawu we osin na ye le Jesu Klisi we nyikɔ mɛ,e wɛ ye fan okwe an Piyɛ ɖɔ ni bo nɔ miye lɛye de na azan ovuɖe.