¹ Eyɔ ovi ce, do hɔnhlɔn na ɖewe le Eƒɛzi le Jesu klisi mɛ. ² Hukpikplan xena un blo, a bose le kununɖetɔ susu we numɛ, sɔ da si na omɛ xeni le gbeji lɛye na ye tesu lɛye can a kplan mɛ buye. ³ Ɖu aya xa-un ɖi Jesu Klisi we sɔja adodwe ha. ⁴ Sɔja xeni le ahwan mɛ, mɔ nɔ yi dó omɛ kpaa lɛye we onuniwiwa mɛ gɛ, na ejló dɔ mye bo nu nyɔn kpan mɛ. ⁵ Lemɔha ke we le wezun dido mɛ, wezundotɔ xeni do wezun di ɖena osɛn lɔ byɔ ɖó ha wɛ na yi jiɖuɖu we djɔ. ⁶ Oglelɛtɔ xeni ɖu aya do wa zɔn, tɔɔ wɛ na nyi jinukun titan leye. ⁷ Bu ta mɛ dó oxo xena un le ɖɔ na we lɛye go. Aklunɔ Mawu lɔ na ná wɛ a na mɔ nu jɛ nu lɛye sese mɛ ⁸ Kando Jesu Xeni tɔnsɔn Davidi we kunkan mɛ go, e ƒɔn sɔn ku ɖi dena wɛn ɖagbwɛ xena un le jla lɔ ɖɔ dó há. ⁹ Wɛn ɖagbwɛ nɛ lɔ wɛ un le ɖu aya na kaka bo wa caba mɛ ɖi nu nyinylawatɔ ɖe ha. Vɔ Mawu we oxo lɔ ma le gɛbɛ mɛ gɛ. ¹⁰ Ewɛ zɔn un nɔ yi agban lɛye sese do ta na omɛ cican lɛye na ye can a do mɔ hwlɛngan xeni le Aklunɔ Jesu Klisi mɛ lɔ kpodo gigo mavɔ mavɔ lɔ kpo. ¹¹ Xojɔxo kpataki wɛ nyi xo xe : Na mi ku xɛ, mi na gɔ wa nɔ gbɛ xɛ. ¹² Na mi dó vivɛnu, mi na wa ɖu xɔlu xɛ, na mi gbɛ-ɛ, eyɔ can na gbɛ mi. ¹³ Na mi ma nɔ gbeji gɛ eyɔ nɔ nɔ gbéji. Ɖo eyɔ tesu ma kpego na gbɛ eɖe gɛ. ¹⁴ Oxo nɛ lɛye sese, nɔ flin na ye, a bo nɔ do kpɛn eji na ye le Mawu we nukɔn dɔ ye ni bo nɔ kpɔn nɔ gɔ wa jlɛ do oxogbe lɛye go gɛ dó e mɔ nɔ wa ɖagbwɛ ti gɛ vɔ e nɔ hɛ omɛ ni nɔ le ɖo to lɛye do yi bubu gbenu. ¹⁵ Jɛ tagba a bo do nɔ nukɔn ha Mawu ɖi ozɔnwatɔ xena Mawu tɛnu kpɔn, e bo sɔgbe xɛ ha, ozɔnwatɔ xena ŋunya mɔ nɔ we do ozɔn etɔn go gɛ, ozɔnwatɔ ni nɔ kplan xojɔxo lɔ mɛ omɔ jijlɔ ji. ¹⁶ Gbɔn akpa na oxo ma sɔgbe xa yise gɛ lɛye sese. Ɖo omɛ ni nɔ sɔ yede na ozɔn lemɔha tɔn lɛye, ye na dɛn le Mawu go tɛgbɛ. ¹⁷ Oxo yetɔn lɛye bo ci ɖi abi jɔmaku ni nɔ vo ha. Mɛ ɖe lɛye nɛ nyi Imɛne kpodo Filɛti kpo. ¹⁸ Ye gbɔn akpa na xojɔxo lɔ, bo nɔ le ɖɔ xɔn ɖo ƒɔn sɔn ku boo jɔ waa yi ; dena ye ɖe mɛ dɛlɛye ja nyi le yise mɛ dó nɛ. ¹⁹ Co, dodwe sisyɛn na Mawu ɖó lɔ le tɛgbɛ. Oxo xena ye wlan dego dye : « Aklunɔ Mawu lɔ yɔn omɛ ni nyi etɔn lɛye» kpodo « omɛ ɖekpekpe ninɔ le yɔ Aklunɔ Mawu lɔ we nyikɔ, ɖe ede sɛ le onu nyinla go» ²⁰ Le oxwe ɖaxo gbe, sikaganukpodo kɔbɔ ganulɛye kɛlɛ mɛ nɔ le gɛ, atinganu kpodo akɔganu lɛye can gba nɔ le. Ye nɔ zan ɖelɛye le gan xe mɛ ni jɛ xa, ɖelɛye bo le wɛ ye nɔ zan tɛgbɛ-tɛgbɛ. ²¹ Omɛ xeni na nɔ slawu bo na nɔ ɖe yeɖe sɛ le onu ɖuɖu mɛ, ye nɛ, ye na nyi, kɔgba jɔ kɔgba, kɔbga ɖe do vo xena Aklunɔ lɔ na nɔ zan, wɛ e na le gbesisɔ na ozɔn ɖagbwɛ ɖekpekpe. ²² Si na lekɔjɛ nɛ we oxo nyinyla lɛye a bo din ogbɛ jijlɔ, wanyinyi kpodo ƒiƒa kpan nukɔn omɛ xeni ni ylɔ Aklunɔ lɔ kpodo oji mimɛ lɛye kpo ²³ Gbɛ okle kpodo numanyɔɛ we onu didɔn lɛye, a nyɔ-ɛn ɖɔ ojlɛ wɛ ye nɔ hɛn dó wa. ²⁴ Aklunɔ Mawu lɔ we vikpɛye mado na wa jlɛ gɛ, vɔ e ɖo na nyi dɔmɛ ɖagbwɛnɔ doxlan omɛ sese, a bo gɔ nyi omɛ ni na nɔ kplan nu omɛ a bo nɔ nɔ ɖɔ hukunkun. ²⁵ kpodo dɔmɛ ƒa kpo, e na nɔ kplan nuomɛ xeni cite dego lɛye, a bo le nukunɖiɖo mɛ ɖo vlavo Mawu bona dyɔ jijɔ na ye wɛ ye na do nyɔ xojɔxo lɔ wi. ²⁶ Wɛ ye na do byɔ yeɖe mɛ lɛgba xeni wle yena ye do le ojlo etɔn gɔ.