¹ Yɔn Pɔlu kpód́ Silivɛn, kpódó Timɔte dó gbe na mi un wlan hwema xe do xlan agun xeni le Tɛsaloniki bo le Mawu otɔ́ lɔ kpodo Aklunɔ Jesu klisi kpó mɛ ² Mawu otɔ kpódó Jesu klisi ni ná mi ƒɛnu kódó ƒiƒa kpó. ³ Nɔvi yisenɔ lɛye mi, mi dó na do kpɛ na Mawu tɛgbɛ dó ota mitɔn mɛ, e bo jɛxa ɖɔ mi a bó bló lemɔha, dó yise mitɔn le hwɛn xɔn taŋu, wanyinyi xena lókpó-lopko mitɔn ɖo na miɖe lɛye can le jɛ hun gbe. ⁴ Enɛ lɛye wɛ nɔ zon wɛ mye can nɔ sɔ mi dó ɖu aglan mɛ le agun Mawu tɔn lɛye mɛ, dó mi do ji, bó ɖó yise le ƒunɖiɖe kpódó vivɛsise lɛye kpokpo mɛ na mi le gbɔn xɔn lɛye. ⁵ Onu nɛlɛye we nyi josi xeni ɖe xlɛ ɖɔ Mawu we kojoɖiɖó bo sɔgbe, ɖo onu ni le kpe mi xɔn lɛye na zɔn wɛ mi na do jɛ xa xɔsuɖuɖu etɔn lɔ xe nu na mi le se vivɛ dó. ⁶ Ɖo enɛ lɔ le hwɛ jijɔ Mawu tɔn mɛ ɖɔ ye bo na do aya na omɛ ni le dó aya na mi xɔn lɛye. ⁷ A bó na gbɔjwɛ omɛ xena na ye le dó aya na lɛye, a bó gɔ na mye can, hwenu na Aklunɔ Jesu lɔ na tɔn sɔn sɛxwe, kpódó owɛndótɔ hɔnhlɔnnɔ etɔn lɛye. ⁸ Ye na ze-e dó ozohɛhɛ mɛ a bo dɔn tó na omɛ ni ma nyɔn Mawu wi gɛ lɛye kpódó omɛ ni ma se tonu na Aklunɔ Jesu mitɔnwe wɛnɖagbwɛ lɔ gɛ. ⁹ Oto xena Mawu na ɖɔn na ye wɛ na nyi vivasu mavɔ-mavɔ. ye naɖɛn dó Aklunɔ lɔ gɔ, a bó le azɔgz na hɔnhlɔn etɔn we gigo lɔ. ¹⁰ Hwenu na e ná wá le azan nɛ lɔ gbe na omɛ ni nyi etɔn lɛye, bo kan de ji lɛye, a dó,dó gigo ni, onu etɔn bó na nyɔn le nukun yetɔn mɛ. Mye can mi na le omɛ nɛ lɛye mɛ dó mi ɖeji dó owɛn xena mi le dó na mi lɔ ji. ¹¹ E wɛ zɔn mi le xóɖɛ hwe ɖekpekpe nu dó ota mitɔn mɛ xɔn na Mawu mitɔn ni bló na mi na nyi omɛ ni na jɛ xa oylɔ xena ye ylɔ mi ná. Mi bo le byɔ xɔn dɔ dogbɔn hɔnhlɔn etɔn mɛ, ni kpedo mi go na mi a dó bló ono ɖagbwɛ we ojlo na mi dó, a bó na ná yise mitɔn ni yi nukɔn le ozɔn wiwa mɛ. ¹² Enɛ dogbɔn Mawu mitɔn kpódó Aklunɔ Jesu Klisi mitɔn kpó we xomɛnywe mɛ Aklunɔ Jesu mitɔn we nyikɔ na yi gigo dogbɔn mi ji, mye can bo na yi gigo dogbɔn eyɔ can ji.