¹ Hwlatɔngɔ ɖiye un ja mide ɖi ɖena winwlan lɔ ɖɔ ɖo ha,ohwɛ ɖekpokpwe na nyi gbigbo gbɔn kunnuɖiɖe omɛ awe alo omɛ atɔn mɛ. ² Hwexenu na un wa mide hwlawegɔ,un bo ɖɔ-ɛ na mi,xena un ma gɔ le mide odin gɛ,un gɔ le ɖɔ-ɛ na omɛ xeye ni nɔ le blo onu nyinyla le osan xɔn kpo omɛ gbokpweye ɖɔ,na un gɔ tlɔ wa bu,un ma le kpɔn do e mɛ na omɛɖe xɔn gɛ. ³ Ɖo mi le din onu xeni na ɖexlɛ ɖɔ Klisi lɔ bo nɔ ɖɔ oxo gbɔn jjiye,Klisi lɔ ma blo gbɔjɔ-gbɔjɔ we onuti do wa mide gɛ,vɔ hɔnhlɔn etɔn we e ɖexlɛ le mimɛ. ⁴ Le oxojɔxo mɛ gbɔn gbɔjɔ-gbɔjɔ etɔn mɛ wɛ ye kan-ɛ do atinsoga ji le,vo e le ogbɛ gbɔn hɔnhlɔn Mawutɔn mɛ,lemɔha ke,le lokpo biblo miton xa Klisi mi gbɔjɔ,vɔ mi na wa nɔ ogbɛ xa-ɛ gbɔn hɔnhlɔn Mawutɔn xeni na wa ozɔn do wa yi mide mɛ. ⁵ Mi kpɔn miɖe mɛ,a bo gbeje miɖe kpɔn ɖɔ mi gbɛ le yise lɔ mɛ jaa,alo mi ma nyɔ-ɛ ɖɔ Jesu Klisi le mi mɛ gɛ wɛɛ?Adiavo miye tesu mɔ le miɖe mɛ ɖɔ miye bo ma jɛ xa gɛ. ⁶ Vɔ,un ɖi ɖɔ mi na mɔ nukunnu je e mɛ ɖɔ miye bo jɛ xa. ⁷ Oɖɛ mitɔn ɖoxlan mide wɛ nyi ɖɔ miye ni bo nɔ kpɔn blo onu nyinyla ti gɛ o,e ma nyi ɖɔ miye mi a jɛ xa mɛ nyi ojlo mitɔn gɛ,vɔ na e tlɛ gɔ nyi ɖɔ miye mi flɛ le didokpɔn lɔ mɛ can,mi a le mɔ mi xɔn wɛ mi na le blo onu jijɔhun kɛɖɛ xɔn. ⁸ Ɖo mi ma ɖo hɔnhlɔn ɖe le oxojɔxo Mawutɔn lɔ we nukɔn gɛ,hɔnhlɔn xena mi ɖo,oxoxjɔxo lɔ jan wɛ mi na ddo wa ozɔn na. ⁹ Hweɖekpokpwe hwenu na miye mi gbɔjɔ,na miye mi ɖo hɔnhlɔn e nɔ do jijwɛ na mi,e nɛ lɔ we oɖɛ wɛ mi nɔ le xo xɔn na ogbɛ ninɔ mitɔn a do sɔgbe. ¹⁰ E wɛ zɔn,xena un gbɛ le dindɛnnu le mide un le wlan onu e xe lɔ na mi xɔn e nɛ na un wa wa,un ma gɔ do wa le nyla ohun do mi xɔn gbɔn acɛ xena Aklunɔ Mawu lɔ sɔ na-un gɛ,e sɔ na-un na mi a do hwɛn le yise mɛ wɛ,e ma nyi ɖɔ ma do gu onu mɛ gɛ. ¹¹ Nɔvi le yisemɛ ye mi,do yi vivɔnu mi nɔ jijwɛ mɛ,mi nɔ tɛnkpɔn na ogbɛ ninɔ mitɔn a sɔgbe mi nɔ fa akɔn n amiɖe,mi nɔ ɖo ogbekpɔ,a bo nɔ fifa mɛ,e nɛ owanyiyi kpo fifa Mawu tɔn kpo na nɔ okpɔ xa mi. ¹² Mi do ogbe na miɖe,a bo kisi na miɖe ɖi nɔvi le yise mɛ ye ha. ¹³ Nɔvi le yise mɛ lɛye sese do ogbe ɖoxlan mi. ¹⁴ Aklunɔ Jesu Klisi we fɛnu,owanyiyi Mawutɔn kpo lokpo biblo xena gbigbɔ Mawutɔn nɔ na,ni nɔ okpɔ xa omɛ kpokpo!