¹ Na kpa gigo na ɖeye wɛ...e nɛ ma nyɔ gɛ.Vɔ na ɖɔ onu xe Mawu ɖexlɛ-un. ² Un nyɔ devi Jesu tɔn lokpo,e wɛ blo oxwe wyɛnɛ,Mawu ze do yi oji,kpodo gbaza etɔn kpo,a lo gbaza etɔn mavo wɛ,un ma nyɔ-ɛ gɛ,vɔ Mawu nyɔ-ɛ. ³ Un nywɛ ɖɔ Mawu bo ze do yi sɛxwe kpodo gbaza etɔn alo gbaza etɔn mavɔ wɛ,un ma nyɔ-ɛ gɛ vɔ Mawu nyɔ-ɛ. ⁴ E yi sɛxwe tomɛ,flɛn e se oxo xe gbɛtɔ ma kpego ɖe tɔn le numɛ gɛ. ⁵ Na omɛ lemɔhatɔn na kpa gigo na nyɔɖe,vɔ nyɔ tɔn un ma jan kpa gigo na nyɔ ɖe gɛ ɖo un nyi gbɛtɔ gbɔjɔ-gbɔjɔ nɔ. ⁶ E nyi un jan kpa gigo na nyɔ ɖe un ma jan hun taɖu gɛ,oxojɔxo kɛɖɛ wɛ na ɖɔ vɔ vɔ un ma ja blo lemɔha gɛ.E nɛ,ye na da ohwɛ na-un ɖo xe un le blo lɛye wutu alo nu xe un nɔ ɖɔ lɛye wutu. ⁷ Onujiwu we Aklunɔ ɖexlɛ -un.Un nyi onu ɖe ɖi fɔku ha do lanmɛ,wɛ un ma ja do kpa gigo na nyɔ ɖe gɛ,lɛgba ze omɛɖe ɖoxlan-un wɛ omɛ lɔ xo-un,enɛ un ja kpa gigo na nyɔɖe gɛ. ⁸ Un fan okwe na Aklunɔ hwla tɔn na e na do tun okan na-un le vivɛsise lɔ mɛ. ⁹ Vɔ Aklunɔ ɖɔ na-un ɖɔ:"Wanyiyi ce kpe we,hwenu xe na lanmɛ gbɔjɔ na we wɛ hɔnhlɔn ce nɔ ɖe xlɛ,e wɛzɔn na kpa gigo na nyɔɖe,hwenu xe lanmɛ ce na gbɔjɔ,enɛ hɔnhlɔn Klisi tɔn na nɔ lanmɛ ce. ¹⁰ Ewɛzɔn gbɔjɔ-gbɔjɔ lɛye,omɛ zunzun lɛye,tagba lɛye,vivɛ sise lɛye,kpo tamɛ bubu xe mɛ un gbɔn ɖo Jesu wutu lɛye,un yi ogbe na kpo awajijɛ kpo.Ɖo,hwenu xena lanmɛ ce gbɔjɔ wɛ un nɔ mɔ hɔnhlɔn. ¹¹ Mi mɔ-un le numanywɛ mɛ:Miye wɛ ɖo na kpa gigo na-un.Omɛ xe mi nɔ ylɔ ɖɔ omɛ sɔxɔ ɖoxlan lɛye ma ɖo onu ɖe hugan un gɛ,co un ma ka yi onuti gɛ. ¹² Mi mɔ ohun kuku ɖaxo ce,bo mɔ nukpaca ye,onu jiwulɛye,onu ɖaxolɛye.Enɛ wɛ ɖexlɛ ɖɔ un bo nyi omɛsɔxɔ ɖoxlan. ¹³ A ni wɛ agun ɖyɛ lɛye ɖo hugan mi? Un ma xɔ kɔbɔ ti le mide gɛ.Mi mɔ ɖɔ e bo ma nyɔ gɛ wɛ?Mi sɔ xɔ kɛ-un! ¹⁴ E ɖiye hwlatɔngɔ ɖiye un ja mide,un ka ma le nyi agban le okɔ mitɔn xɔn gɛ,ɖo un ma le din dɔkunnu mitɔn xɔn gɛ vɔ miye tesu ye wɛ un le din xɔn.Vikpɛye mɛ na wa onu ɖo anyi na ovitɔ ye gɛ,vɔ ovitɔ ye wɛ na wa onu ɖo anyi na vikpɛye. ¹⁵ Xeni nyi nyɔtɔn,awajijɛ wɛ e na nyi na-un na do zan onu na un ɖo sese kpo nyɔ tesu kpo do alindɔn mitɔn migo,na e nyi ɖɔ un nyi owan na mi ɖo lemɔha,be owanyiyi xeni hwe wɛ miye mi na ɖo na-un. ¹⁶ Mi nywɛ ɖɔ un bo ma gɔ nyi agban le okɔ ji na mi gɛ;vɔ, omɛɖe lɛye hɛn ye na ɖɔ ɖɔ gbɔn yɛmɛnu wiwa mɛ miye bo jɛ omɔ ɖiɖo ce mɛ! ¹⁷ Alo omɛ xena un sɔ ɖoxlan mi lɛye un gbɔn ɖe ji bo do xo mi ɖu wɛ? ¹⁸ Un fan okwe na Titu bo sɔ-ɛ ɖoxlan e yɔ kpo nɔvi yisenɔ lɔ kpo:Be Titu lɔ ka byɔ onu ɖe mi wɛ?Nyɔ kpo Titu lɔ kpo e ma nyi linlin lokpo lɔ mɛ jan wɛ mi nɔ bo do wa ozɔn gbɔn walɔ lokpo lɔ ji gɛ wɛ? ¹⁹ Alo sɔn ogan ɖe mɛ gbɔɔn,mi le bu-i ɖɔ mɔ sin,ɖena mi na blo a do din ohwɛ jijwɛ le nukun mɛ mitɔn jan wɛ mi le din xɔn sin?Gbeɖekpɔn!Mi le ɖɔ oxo le Klisi mɛ,le Mawu we nukɔn,nɔvi vɛna-vɛnaye,e nɛ lɛye sese,mi le blo ye xɔn,na mi a do hwɛn le gbigbɔ mɛ. ²⁰ Un le ɖibu xɔn ɖɔ,na un wa wa,un ma le mɔ mi ɖi ɖena un le jlo ɖo xɔn ha gɛ,miye can ka ma gɔ wa le mɔ-un ɖi ɖena mi jlo ɖo ha gba gɛ.Un le ɖibu xɔn ɖɔ ojlɛye bɛ bo na le mi mɛ,awu hwinhwanye,aɖidido nyinylaye,onu dindɔn lɛye,awoɖiɖo do omɛ nu ye,omɛxoɖiɖɔ lɛye,ogoyiyi kpodo onu hannya-hannya bibloye. ²¹ Un le ɖibu xɔn ɖɔ,na un wa wa mide,na wa vi avi susu do omɛ xeni le blo onu nyinyla le osan leye go,ye ka malɛkɔ le onu ɖuɖu yetɔn lɛye go gɛ,ogbɛ ɖuɖu zinzan kpodo aledida yetɔn lɛye mɛ.