1
Nyɔ Pɔlu xeni nyi omɛɖe ɖoxlan Jesu Klisi tɔn gbɔn Mawu we ojlo mɛ,kpo nɔvi le yise mɛ Timɔte le do ogbe na mi xɔn.Un wlan wema e xe lɔ ɖoxlan agun Mawu tɔn xeni le Kolɛnti kpodo yisenɔ xeye ni le Akayi wenkansin sese mɛye.
2
Mawu xeni nyi miye tɔ kpo Aklunɔ Jesu Klisi ni na mi fɛnu kpo fifa kpo.
3
Mia do okpɛ na Mawu xeni nyi otɔ na Aklunɔ mitɔn Jesu Klisi.Otɔ xeni nɔ kpɔn dɔŋuɖunu na omɛ,a bo fa akɔn na omɛ le onuɖekpokpwe mɛ,wɛ e nyi,
4
e nɔ fa akɔn na mi le vivɛsise mitɔn lɛye sese mɛ,na miye can a do kpego fa akɔn na omɛ xeye ni gɔ le vivɛsise hamɛ-hamɛye mɛ gba.
5
Le oxojɔxo mɛ,ɖena miye can le kpe ofun susu xɔn ɖo,ɖiɖena Klisi can kpe ofun susu ɖo ha,lemɔha lɔ ke wɛ akɔnfifa mitɔn can su ɖo gbɔn Klisi lɔ ji.
6
Na e nyi ɖɔ mi le vivɛsise mɛ,na miye mi a do mɔ akɔnfifa kpo hwlɛngan kpo wɛ zɔn.Na mi mɔ akɔnfifa,na miye can a do mɔ akɔnfifa wɛ zɔn,e nɛ lɔ na zɔn wɛ mi na do kpego do oji le vivɛ sise lokpo nukun mɛ xeye mɛ na mi le gbɔn xɔn lɛye mɛ.
7
Mɔnukpinkpɔn xena mi ɖo do mi go le ote gliŋu,ɖo mi nyɔ-ɛ ɖɔ ɖiɖena mi ɖo mima le ofunkpikpe mitɔn mɛ ɖo ha,lemɔha lɔ ke wɛ mi ɖo mima le akɔnfifa mitɔn mɛ ɖo nɛ.
8
Nɔvi le yise mɛ ye mi,le oxojɔxo mɛ,mi ma jlo bo na jo mi do ma nyɔ-ɛ mɛ gɛ,do vivɛsise xe mɛ na mi gbɔn le Azi we kansin mɛ wutu,mi se vivɛ gbɔɔn e wa hugan,bo gbɔn hɔnhlɔn mitɔn go,kaka gbɔɔn mi ma gɔ wa le nukun ɖiɖo ti mɛ gɛ,gbɛ mi ma tlɛ nyɔ-ɛ na le ogbɛ can gba gɛ.
9
Ɛɛn,mi wa mɔ le miɖe mɛ ɖi oku we ohwɛ wɛ ye da na mi ɖɔŋu.E nɛ mi ma gɔ ɖe oji do miye tesu go gɛ,mi ɖe oji do Mawu xeni nɔ fɔn omɛ sɔn oku go.
10
E yɔ lɔ wɛ hwlɛn mi gan le oku lemɔha tɔn mɛ,e ka na gɔ hwlɛn mi gan le e mɛ ke.E yɔ lɔ ke jijan wɛ nukun ɖiɖo mitɔn le,e bo na gɔ hwlɛn mi gan ke.
11
Miye na nɔ kpedo mi go le oɖɛ xena mi na nɔ xo do ota mitɔn mɛ.E nɛ Mawu na blo onunywɛ na mi gbɔn omɛ susu we oɖɛ xixo mɛ,e na zɔn wɛ omɛ susu na do okpɛ na Mawu do ota mitɔn mɛ.
12
Onu xeni nɔ vivi na mi,wɛ nyi ɖɔ:"Ayixa mitɔn nɔ ɖe kunu na mi ɖɔ,onu biblo do onu tɛnmɛ kpo onu jijɔhun biblo we walɔ xeni nɔ sɔn diye,wɛ mi zan le ogbɛ lɔ mɛ,le ota ji do wa yi mide.E ma nyi ɖɔ dogbɔn onunyinywɛ gbɛtɔ tɔn mɛ gɛ,vɔ dogbɔn fɛnu Mawu tɔn mɛ wɛ.
13
Ɖo mi ma wlan onu bu ɖe ɖoxlan mi gbɔn ovo na onu xena mi le xlɛ xɔn,bo le mɔ nukunnu jɛ e go xɔn gɛ.Un gɔ le nukun ɖiɖo mɛ ɖɔ miye bo na mɔ nukunnu ɖiɖo mɛ ɖɔ miye bo na mɔ nukunnu jɛ e go sesese.
14
Ɖi ɖena mi o mɔ nukunnu jɛ e go kleŋu ɖe ɖɔ miye bɛ bo nyi onu xeni nɔ do vivi na mi,lemɔha ke wɛ miye can na wa nyi onu xeni nɔ do vivi na mi le Aklunɔ Jesu we azan gbe.
15
Kandeji nɛ lɔ wɛ un ɖo,bo le blo tito xɔn a do wa mide jɛnukɔn,na mi a gɔ do mɔ fɛnu awegɔ ke.
16
Mide lɔ wɛ na lɛ le a do yi Masedwanu a bo gɔ lɛkɔ sɔn Masedwanu lɔ do wa mide,na mi a do gɔ alɔ na-un na ma do yi Jude.
17
Xena un blo tito do lemɔha, be un ma bu otamɛ ganji gɛ wɛɛ?Alo tito e nɛ lɛye na un blo,gbɛtɔye we tito kɛɖɛ jan wɛ,e na do nyi ɖɔ un ɖɔ ɛɛn kpo oo do kpɔkpɔ wɛɛ?
18
Ɖena Mawu nɔ blo do oxo etɔn ji ɖo,lemɔha lɔ ke wɛ oxo xena mi le ɖɔ na mi xɔn lɛye ma nyi ɛɛn kpo oo kpɔkpɔ gɛ.
19
Ɖo Mawu we ovi,Jesu Klisi lɔ,we oxo na mi jla le mide,nyɔ Silivɛn kpo Timɔte oxo nɛ lɔ ma nyi ɛɛn kpo oo kpɔkpɔ gɛ,vɔ ɛɛn kɛɖɛ jan wɛ e nyi.
20
Le oxojɔxo mɛ,akpagbe Mawutɔn lɛye,sese ɛɛn wɛ e nyi le Jesu Klisi mɛ.E yɔ lɔ ji wɛ miye can gbɔn bo do le ɖɔ "ami" xɔn na Mawu a do yi gigo.
21
Le oxojɔxo mɛ,omɛ xeni nɔ zɔn wɛ miye kpo miye kpo nɔ ɖi okyɔn le Klisi lɔ mɛ,bo nɔ si ami na mi wɛ nyi Mawu lɔ.
22
E yɔ lɔ ke wɛ o ɖo josi etɔn mi go,bo sɔ gbigbɔ mimɛ sɔ do oji mitɔnye mɛ wɛ e nyi kando e ji kpatakli na onu jijɔhun xeye na mi na wa yi lɛye.
-