¹ Nyɔ omɛsɔxɔɖoxlan Jesu Klisi tɔn Piyɛ wɛ wlan wema e xe ɖoxlan mimɛ cincan Mawu tɔn xeni nyi jonɔ le anyizan ji, bo gba kpe Pɔɔn kpo Galati kpo,Kapadɔsi kpo Azi kpo,kpodo Bitini kpo we oto mɛ lɛye, ² Mawu otɔ lɔ can mi,wɛ e sɔ ogbe xa ɖena e yɔ tesu o to ɖo osan ha,wɛ mi nyi omɛ ɖedo ovo etɔn,gbɔn gbigbɔ etɔn we onuniwa gblamɛ,na mi a se otonu na Jesu Klisi,wɛ ohun etɔn na lɛ mi we:Mawu ni na fɛnu kpo fifa kpo mi na ni a tunfla! ³ Mi na na mi a kpa susu na Mawu Aklunɔ mitɔn Jesu Klisi we otɔ,ɖo dɔmɛ nywɛ etɔn ɖaxo xena e ɖo lɔ mɛ,e fɔn Jesu Klisi sɔn oku,bo do na ogbɛ tɛnmɛ-tɛnmɛ mi.Enɛ lɔ zɔnwɛ nukun ɖiɖo mitɔn nyi gbɛɖe-gbɛɖe, ⁴ wɛ ɖagbwɛ xena Mawu sɔ xɔo ɖo ayi na omɛ xeni nyi etɔn lɛye na na xomɛhunhun-un,ɖagbwɛ enɛ lɛye,ɖagbwɛ ɖe wɛ ye nyi bo ma kpego na gble kpɔn gbeɖe gɛ,ye ma kpego na do oɖu kpɔn gbeɖe gɛ,ye ka ma kpego na ca kpɔn gbeɖe gɛ,Mawu sɔ ɖagbwɛ enɛ lɛye sɔ xɔ ɖo ayi le sɛxwe, ⁵ na mi mɛ xe hɔnhlɔn etɔn le hinhɛn,wɛ gbɔn onuɖiɖi ji kaka jɛ hwenu xena e wa sɔgbe,wɛ e na ɖexlɛ le hwenu godo-godo tɔn lɛye mɛ lɔ na wa do. ⁶ E wɛ zɔn,odin na tintɛnkpɔn hamɛ-hamɛ lɛye na gɔ do do vivɛsise na mi na oganxixo ovuɖe can,mi nɔ awajijɛ mɛ, ⁷ ye nɔ do sika kpɔn le ozo mɛ,co e bo nɔ wa gble,lemɔha wɛ onuɖiɖi mitɔn xeni vɛ kɔbɔ hu sika na gbɔn tintɛn kpɔn mɛ ɖo,e nɛ,ye na do kpɔn ɖena e lido ɖo.E nɛ lɔ wɛ na hɛn kpikpa kpo gigo kpodo susu wa na mi le hwexenu na Jesu Klisi lɔ na wa ɖe e ɖe sɔ xlɛ. ⁸ Mi ma mɔ-ɛ kpɔn gɛ,vɔ bo yi owan ni-i,le odin can,mi ma mɔ-ɛ gɛ,vɔ bo ɖi onu ni-i,e wɛ zɔn xomɛ do hun mi taŋu,wɛ onu ma kpego na ɖɔ gɛ, ⁹ ɖo onuɖiɖi xena mi ɖo ni-i wɛ zɔn na alindɔn mitɔn do mɔ hwlɛngan. ¹⁰ Ɖɔɖanyiɖɔtɔ xeye ni o ɖɔ oxo do fɛnu Mawutɔn xena e jla ɖoɖo anyi na mi go lɛye,din odo an bo kan oxo se kito-kito do hwlɛngan nɛ lɔ go. ¹¹ Ye jɛ tagba taŋu a bo do nyɔ hwexenu kpodo ɖena onu xeye na gbigbɔ Mawutɔn lɔ ɖɔ lɛye na jɔ ɖo anyi ɖɔ Klisi bo na ɖu aya,le vivɔnu e bo na yi gigo etɔn. ¹² Mawu ɖexlɛ ɖɔɖanyiɖɔtɔ lɛye ɖɔ oxo xena e sɔ do alɔmɛ na ye lɔ,bo ma nyi yetesu tɔn gɛ,vɔ mitɔn bɛ e bo nyi,oxo nɛ lɔ wɛ wɛnɖagbe jlatɔye wa ɖɔ na mi le odin kpo gbigbɔ mimɛ we hɔnhlɔn xeni sɔn sɛxwe kpo oxo nɛ lɔ ke wɛ,wɛnzangun Mawutɔn lɛye jlo na nyɔ-ɛ taŋu. ¹³ E wɛ zɔn ayixa mitɔn ni nɔ ogbesisɔ a bo do blo onu,mi nɔ aceji,nukun ɖiɖo mitɔn sese ni nɔ fɛnu xena mi na wa mɔ ji le hwexenu na Jesu Klisi na wa ɖe e ɖe sɔ xlɛ. ¹⁴ Ɖi vikpɛye otonusetɔ ye ha,mi nɔ kpɔn gɔ blo onuti gbɔn ojlo xena mi ɖo le osan le manyɔ-ɛ mɛ gɛ. ¹⁵ Vɔ,ɖi ɖena Mawu xeni yɔ mi nyi omɛ mimɛ ɖo,miye can mi nyi omɛ mimɛ le onu biblo mitɔn ɖekpokpwe mɛ. ¹⁶ Ɖi ɖena e nyi winwlan le Mawuxo lɔ mɛ ɖo ɖɔ:Mi nyi omɛ mimɛ,ɖo nyɔ can un nyi omɛ mimɛ. ¹⁷ Na e nyi ɖɔ Mawu xeni mɔ nɔ nɔ omɛti ji gɛ,bo nɔ da ohwɛ na ome lokpo-lokpo dogbɔn onuwiwa etɔn ji wɛ,mi nɔ yɔ ɖɔ otɔ,le oɖɛxixo mitɔn mɛ,be mi bo ɖo obuɖisi ni-i le onuwiwa mitɔn lɛye mɛ le azan xeni kpo na mi le anyizan ji mɛ. ¹⁸ Oxojɔxo,mi nyɔ-ɛ ɖɔ e bo ma nyi onu xeni nɔ gble ɖi kɔbɔ alo sika mɛ Mawu sɔ do xɔ mi le onu xe ma nyi ogbɛ jɔ ogbɛ we walɔ xeye na dagbo mitɔn lɛye jo do mi si gɛ. ¹⁹ Vɔ,ohun Jesutɔn xeni vɛ kɔbɔ taŋu wɛ e zan,Klisi lɔ bo ci lɛngbɔvi xeni ma ɖo ablɔ ti gbɔɔn bo do ɖo oɖu ɖe gɛ. ²⁰ Mawu o can-ɛ hwɛkpo ogbɛ lɔ wa jɔ,bo wa ɖe-e sɔ xlɛ le oganxixo godo tɔn xeye lɛye mɛ,do miye wutu, ²¹ gbɔn e yɔ lɔ ji,mi kan do Mawu ji,e wɛ fɔn-ɛ le omɛkukuye mɛ bo sɔ gigo sɔ ni-i.E nɛ lɔ wɛ zɔn na mi do sɔ onuɖiɖi mitɔn sɔ ɖo Mawu ji. ²² Le otonu sise na oxojɔxo lɔ mɛ,mi o klan miɖe zun wiwe,e nɛ mi na do ɖe wanyiyi ɖiɖo na miɖe sɔ xlɛ wɛ yɛmɛnu biblo ma gɔ le e mɛ gɛ,mi yi owan na miɖe taŋu,e na sɔn oji mimɛ mɛ, ²³ ɖo ye vɔ ji mi yɔyɔ gbɔn onukun xeni mɔ nɔ gble gɛ vɔ,bo nyi onukun magble-magble xeni nyi dogbɔn oxo Mawu gbɛɖe-gbɛɖe xeni le tɛgbɛ-tɛgbɛ ji. ²⁴ Ɖo ye wlan ɖɔ:Gbɛtɔ ɖekpokpwe le ɖi ogbe ha,gigo etɔn kpokpo bo le ɖi flawa ogbe lɔ tɔn ha,ogbe lɔ nɔ xu,flawa lɔ nɔ flɛ; ²⁵ Vɔ Aklunɔ Mawu lɔ we oxo nɔ nɔ anyi tɛgbɛ.Oxo nɛ lɔ wɛ nyi owɛnɖagbe na ye jla na mi lɔ.