¹ Blɔ Pɔlu, ke nyi Yesu klisu we odansɔvi, Mawu bo yɔ na ma do nyɔ ɛmɛdindɔn, Mawu bo mɔ ɖe-o do vo na ma do jla iwe Ɛwɛn Nywɛ lɔ, wɛ wlan wema ke. ² Ɛwɛn Nywɛ xin lɔ Mawu o fyan jɔgbe etɔn ɖ'enyi xoxoxo gbɔn oxolɔɖenyitɔ etɔnye ji. ³ Ɛwɛn Nywɛ xin lɔ, ovyɔ wu wɛ e bo lɔ do nɔ, le gbaza mɛ e nyi ovi ye bo ji-i le Davidi we kunkan mɛ. ⁴ Gbɔn Gbigbɔ mimɛ lɔ ji, ye ɖe Mawu vi kena enyi lɔ sɔ xlɛ, kpodo hɔnhlɔn kpo le hwekenu na ye fɔn-ɛ sɔn ɛmɛ kukuye mɛ we godo. Mía we Xwetɔ Yesu Klisu wɛ. ⁵ Gbɔn Yesu lɔ ji wɛ mi kpɔn ɛfɛnu a do nyi ɛmɛdindɔn, a bo mɔ kplɔ gbɛtɔye va xɔse mɛ, ye mɔ se tonu le togunye bisese mɛ, le nyidan lɔ bisese ji, le Yesu we nyikɔ mɛ. ⁶ Le togun xin lɔ mɛ, miye can mi nyi mɛ ɖokpo le mɛ ke na Yesu yɔ na ye a nyi etɔnye mɛ. ⁷ na ɛmɛ ke le Hlɔmaye bisese, mɛ kena na Mawu yi wan na ye, mɛke naa e o yɔ na ye a dnyi etɔn a mɔ zan ɛgbɛ mimɛ ye, na Mawu we ɛfɛu kpo fifa ni sɔn míatɔ Mawu lɔ kpodo Xwetɔ Yesu Klisu kɔn a mɔ va na mi. ⁸ Jɛ ŋukɔn, ko do ɛkpɛ na Mawu tɛye gbɔn Yesu Klisu ji, do mi mɛ bisese we tamɛ. Ɖo xɔse kena mi ɖo lɔ, ye lɔ i we xco gbɔn ɛgbɛ lɔ mɛ nɔ. ⁹ Ɖo Mawu kena ko sɛn nɔ bo le ayixa tɛye mɛ bo mɔ jla ovyɔ we Ɛwɛn nywɛ lɔ nɔ, i tete hɛn e na ɖe kunnu na tu ko mɔ hɔn nɔ dokpo nyikɔ miatɔnye yiyɔ le ɛɖɛxixo tɛyee mɛ, ¹⁰ Ko mɔ nɔ byɔ Mawu nɔ tɛgbɛ tun lɔ byo ma mɔ kpɔn omɔ do gbɔn ojlo etɔn mɛ a do va mia kɔn. ¹¹ Ɖo e jlo tun ma mɔ va kpɔn mi a mɔɔ do na onunina gbigbɔ mɛ tɔn ɖeye wu mi, mi mɔ do do aɖɔ do ganji. ¹² Taŋutɔn wɛ nyi lɔ byo, na ko le mia mɛ, mi mɔ do na ojiɖiɖe wu miaɖeye, xɔse tɛye mɔ do hɔnhlɔ lanmɛ na mi, miatɔn can mɔ do hɔnhlɔn lanmɛ na bo can gba. ¹³ Syɛ nɔvi le xɔse mɛye, ko hɔn jlo na mi a gɔn nyinywɛ lɔ byo, ko mɔ nɔ wasi tito a do va miakɔn, zɔn nɛmu-nɛmu ɖe vɔ, mɔxɛnuye bo dɔn kaka va do syɛ. E jlo tun odan tɛye a mɔ ɖe ale tɔn le mia we dodomɛ, ɖi kena e nyi ɖo le mɛ ke na hɔn nyi Jwifuye we ododomɛ ɖo ha. ¹⁴ Dandan mɛ wɛ e le na tun ko mɔ na yi mɛ kena hun ŋukunsin kpodo mɛ kena mɔ hɔn hun ŋukunsin ye kɔn, a bo yi mɛ ke se wemaye kpo mɛ ke hɔn se wemaye kɔn. ¹⁵ E xin wɛ dɔn ko do jlo tun ma mɔ jla Ɛwɛn Nywɛ lɔ na mi mɛ ke mɔ le Hlɔmaye can. ¹⁶ Ɖo ŋunya hɔn nɔ wa do Ɛwɛnnywɛ lɔ wu. Mawu we hɔnhlɔn ke nɔ hɛn hwlɛngan do va na ɛmɛ ɖekpokpwe ke kan do Mawu lɔ ji wɛ e nyi, jɛ ŋukɔn, Jwifuye, e xin we godo, mɛ ke hɔn nyi Jwifuye. ¹⁷ Le xojɔxo mɛ, Ɛwɛnnywɛ lɔ ɖe alɔkpa kena Mawu nɔ sɔ ɛmɛ do kpɔn emɛ jijɔ ɖo, sɔ xlɛ, vɔ dogbɔn xɔse mɛ wɛ, xɔse lɔ ɖokpo gee wɛ bo le ɖi kena e nyi winwla ɖo byo: «Ɛmɛ jijɔ mɔ na nɔ ɛgbɛ gbɔn xɔse mɛ.» ¹⁸ Ɖo Mawu nɔ ɖe aɖidido etɔn sɔ xlɛ sɔn sɛxwe sɔ kpan ŋukɔn sisi ma ɖo na Mawutɔ ɖekpokpwe kpodo onu jijɔmawatɔye ke nɔ tu gbigb ɔ do xo na xojɔxo lɔ dogbɔn onu nyinyla wiwa yetɔnyee mɛ. ¹⁹ Ɖo onu kena ye na kpewu nyɔ do Mawu wu, e le ganna-ganna na ye, Mawu lɔ tete wɛ ɖe sɔ xle ye. ²⁰ Le xojɔxo mɛ, ninɔmɛ Mawutɔn kena ŋukunsin hɔn nɔ kpɔn, hɔnhlɔn mavɔ mavɔ kpodo Mawu nyinyi etɔn, ye kpɔn-ɛ nɔ ganji gbɔn onuwiwa etɔnye mɛ sɔn hwekenu na ɛgbɛ lɔ o jɔ gbɔn. Ɛhwɛsɔkɛ ti hɔn le na ye nɔ. ²¹ Ɖo ye nyɔ Mawu, vɔ gigo kpo ɛkpɛ ke nyi etɔn, ye hɔn n sɔ ni-i. Ke hugan wu e xin wɛ n yi tun, susu ma nyɔ ta na ye kɛɖɛ wɛ ye nɔ ɖe nɔ i wɛ oklenɔ we oji yetɔnye ve do ta vuvlumɛ. ²² Ye bo nɔ bu-i nɔ tun nunywɛtɔye mwɛ hiye mɔ nyi, vɔ onumanywɛtɔye kɛɖɛ we ye bo nyi. ²³ Ye bo sɔ gigo ke nyi Mawu ke hɔn nɔ ku tɔn ,sɔ na onutita gbetɔ ke nyi onu kuku tɔn, oxɛye we on utitaye, kanlin ke nɔ zɔn zɔnlin le afɔ ɛnɛ ji ye kpodo ke nɔ dɔn adɔ gbɔn nyidanjiye we untitaye wɛ ye nɔ sɔ Mawu maku-maku lɔ we gigo a sɔ na; ²⁴ I wɛ dɔn na Mawu do jo ye do na onu ɖuɖyu wiwa ɖi kena oji yetɔnye we ojlo nyinylaye le do ha, gbɔɔn ye bo nɔ wa ŋunyanuye kpodo gbaza yetetetɔn. ²⁵ Mɛ xin ye wɛ nɔ sɔ ojo kinkan a do ɖɔli xojɔxo Mawutɔn lɔ, ye lɛye ke wɛ nɔ ṣɛn onu kena Mawu ɖo ye, vɔ, a bo nɔ gbɛ Maawu sinsɛn do on u xin leye sinsɛn wu, Mawu kena kpikpa jɛ do yi mavɔ. Ami! ²⁶ I wɛ dɔn na Mawu do jo ye do na ojlo ke nɔ wa onu nyinylaye, nyɔnusi yetɔnye bo nɔ ɖoxo kpo ye hatɔ nyɔnusi e ko nyi emɔ hwɛn Mawu ɖwe ɖo le ɛgbɛ lɔ mɛ. ²⁷ Emɔke wɛ ŋusunglo yetɔnye nɔ gbɛ oxo ɖiɖo kpo nyɔnusiye, ojlo nyinyla we kpakpa bo nɔ fɔn le lanmɛ na ye kpan ŋukɔn yeɖeye, ye mɔ ɖoxo kpo yeɖeye nɔ ŋunya maɖo, e xin wutu, otodindɔn ke jɛ na omɔ bubu yetɔn xin lɔ, mɔ jɛ ye ji. ²⁸ ke ye hɔn kpɔn tun emɔ jɛ na ye a mɔ nyɔ Mawu, Mawu jo ye do na susu masɔgbe yetɔnye na ye a nɔ do wa onu ke hɔn jɛ na ye a nɔ wa ye. ²⁹ Onu masɔgbe hamɛ-hamɛye wɛ gɔ ye mɛ, onu nyinyla, ŋubya, danuwiwaye, ɛmɛ huhu, ojlɛ wiwa, ɛmɛxoɖu, ayixa gɔndɔn-gɔndɔn, ɛmɛxolilɔ, ³⁰ oxonyinyla lɔ do ɛmɛ wu, Mawu we kɛntɔ wɛ ye nyi, ɛmɛmasitɔye, goyitɔye, ye bo nɔ kɔ yeɖeye do ji nɔ, onunyinyla wiwa we susu yɔyɔ ye wɛ ye nɔ ɖe tɔn nɔ, ye nɔ fɔn adan do ta na yetɔye. ³¹ Onumanywɛtɔye wɛ ye nyi, na ye fin ajɔgbe alo na ye kan atanŋu ye hɔn nɔ ɖe, oji yetɔnye syɛnxu, ye hɔn nɔ kpɔn dɔŋdunu na ɛmɛ can. ³² Ye nyɔ-ɛ ganji tun, le kojoɖiɖo Mawutɔn mɛ, mɛ ke nɔ wasi onu xin ha lɛye mɔ jɛ na oku. Vɔ ye nɔ wasi nuxin lɛye nɔ, vɔ e ko nyi tun lɔ byo evɔ do blɛ hwɛn, ye mɔ nɔ yigbe d'eji na mɛbuye ke nɔ wa nuxinhaye can.