¹ Wema ke lɔ lɔ onu kena Yesu Klisu ɖexlɛ, Mawu wɛ sɔ ni i, e mɔ do ɖe e sɔ xlɛ odanwavi etɔnye do onu ke ɖo na va jɔ le madɛn madɛn mɛ ye wu. Klisu lɔ sɔ ɛwɛndotɔ etɔn ɖodan Jan odansɔvi etɔn, e mɔ do na ni a nyɔ onu xinlɛye. ² Jan lɔ wɛ ɖe kunnu do onu ke e kpɔn bi wu. E ɖe kunnu do Mawu we oxo lɔ wu kpodo oxojɔxo ke Yesu-Klisu lɔ ye wu. ³ Nyɔnanɔ wɛ nyi ɛmɛ ke o xlɛ ogbeɖiɖo do Mawu nu we wema ke lɔ nɔ,. Nyɔnanɔ ke wɛ na nyi ɛmɛ ke o se nɔ ke. ⁴ Blɔ Jan wɛ do ogbe ɖodan agun acowe kena le Azi we kansinmɛye bi: Mawu, ɛmɛ ke le egbe, bo o le sa, ɛmɛ ke mɔ gbɔnnɔ ni na mi ɛfɛnu kpo fifa. Emɔhake, gbigbɔ acowe ke le ŋukɔn na xɔlu zinkpwe etɔn lɔ ye can, ni na mi ɛfɛnu kpo fifa. ⁵ Yesu-Klisu ke nyi kunnu ɖetɔ ogbejinɔtɔ, bo nyi ɛmɛ tantyɛn ke fɔn sɔn oku, bo kpa ɛcɛ na nyidan ji we xɔluye, ni na mi ɛfɛnu kpo fifa. E lɔ lɔ wɛ yi owan na mí bo hwlɛn mí gan le onunyinyla míatɔnye mɛ do gbɔn ɛhun etɔn mɛ. ⁶ I wɛ sɔ mí do ɖo xɔluye we otogun, bo mɔ sɔ mí do wasi avɔsantɔye na Mawu ke nyi Otɔ lɔ; e tɔn wɛ nyi gigo kpo hɔnhlɔn sɔn mavɔ do yi mavɔ! Ami! ⁷ Mi kpɔn! E gbɔn nɔ kpodo sunwɔ! Ŋukunsin bi sese na kpɔn-ɛ, ɛmɛ kena tɔ kanhwan wi ye can na kpɔn-ɛ. Akɔta bi ke gbɔn nyixɔ lɔ ji na le dɔŋuɖunu mɛ do e lɔ lɔ wu. Ɛɛ ke e na nɔ ɖo lɔ xɛnxin! Ami! ⁸ Xwetɔ Mawu, ɛmɛ ke le egbe, ɛmɛ ke o le sa, ɛmɛ ke gbɔn nɔ, hɔnhlɔn bi sese tɔ, lɔ tun byo: « Alpha kpo Omega ( tantyɛn kpo kpotwi).» ⁹ Blɔ mia nɔvyɔ Jan ke le kpɔkpɔ kpɔ mi le Klisu mɛ, bo kpe ofun kpo mi nɔ, bo le xɔluɖuɖu Mawu tɔn lɔ mɛ kpo mi, bo do vivɛnu kpo mi nɔ, wɛ wlan wema ke. Otɔ dodomɛ we oso ke ye nɔ yɔ tun Patumɔsu, mɛ wɛ ko le do Mawu we oxo lɔ kpodo kunnu ke ko ɖe na Yesu-Klisu wu. ¹⁰ Le Xwetɔ lɔ we azan ji, gbigbɔ kinkwɛn jɛ jiye, ko bo se ogbe ɖe ɖi le godo na-a. kpo axwa lele, ɖi ahwankpɛn wɛ ye kun nɔ ha ¹¹ bo lɔ nɔ tun byo:« onu o kpɔn nɔ wlɛn-ɛ do wema mɛ, a bo sɔ ɖodan agun acowɛ ke le Efɛzu, Siminu, Pɛgamu, Tiyati, Saadi, Filadɛfi kpo Lawodise.» ¹² Ko lilɛ na do kpɔn ɛmɛ ke lɔ oxo na nɔ lɔ. Ke ko lilɛ, ko kpɔn sika zogbɛnhɛntin acowe. ¹³ Onu le ɛgbɛ ɖe ke le ɖi ɛgbɛtɔ we vi ha, bo le sikazogbɛnhintin lɛye we dodomɛ. E bo do awu gaga ɖe, bo sɔ sika we akpakan do bla akɔnnu. ¹⁴ Ota etɔn kpo oɖa etɔnye le we pepepe ɖi ogbɔfun we ha; ŋukusin etɔnye bo klɛn nɔ ɖi ozo lala ha. ¹⁵ Afɔ etɔnye bo da ozo nɔ ɖi oganve ke ji le ozokpo mɛ nɔ ha, ogbe etɔn bo le ɖi ɛsin wɛ do va yi nɔ ha. ¹⁶ E bo hɛn sunhwevi acowe do ausi lɔ e tɔn mɛ, dɛnkpwe ɖiɖa onu owe nɔ ɖe bo tɔn sɔn onu mɛ ninɔ. Ŋumɛ etɔn bo kilɛn nɔ ɖi kena ohwe nɔ klɛn ɖo le lindɔn gangan ha. ¹⁷ Kena ko kpɔn-ɛ, ko jɛ onyi do akɔn mɛ ni-i le ɖi ɛmɛ ke ku ha. E bo ɖo aɖusi lɔ etɔn ji ye, bo lɔ byo: « ká vɔ, bo wɛ nyi tantyɛn kpo kpotwi, ¹⁸ bo nyi ɛmɛ ke le ɛgbɛ. Ko o ku sa, vɔ syɛ ko le ɛgbɛ tɛgbɛ. Oku kpo kutomɛ we caviye le si ye. ¹⁹ I wɛ dɔn, wlan onu ke o kpɔn. Onu ke jɔ nɔ ye le syɛ kpo ke na va ye. ²⁰ Sunhwevi acowe ke na o kpɔn le aɖusilɔ tɛye mɛ ye kpo sikazogbɛnhɛntin acowe lɛye, onu ma kpɔn do na ke ye nyi xɛn : sunhwevi acowe lɛye nyi agun acowe lɛye we ɛwɛndotɔye, sikazogbɛnhɛntin acowe lɛye bo nyi agun acowe lɛye.»