¹ Le hwexinlɔnun xɔlu ɖaxo Hlɔmatɔn ke ye nɔ yɔ tun Ogwisi ɖe gbeta ɖe tɔn tun otovi ye bisese ke le Hlɔma we oto ɖaxo lɔ mɛ ye na do nyikɔ yetɔnye wu wema mɛ. ² Nyikɔ dido wema mɛ tantɛn xin lɔ, ye wasi hwekenu Klinwisi nyi oga ɖaxo le Sili we kansin mɛ. ³ Otovi ɖokpo ɖokpo ɖo na vɛ do nyikɔ etɔn wema mɛ le toxo ke mɛ na ye ji le. ⁴ Jozɛfu can lɛ le Nazalɛti we toxo ke le Galile we kansinmɛ bo Jude toxo Davidi tɔn ke nyi Bɛtɛlɛxɛmu. Ɖo e nyi ovi le kunkan Davidi tɔn mɛ. ⁵ E ve do nyikɔ wema mɛ, elɔ kpodo Mali ke e sɔ agɔ lɔ, le hwexinnu gomi bo le Mali si. ⁶ Vɔ hwekenu na ye le Bɛtɛlɛxɛmu, Mali we ovi jiji we ganmɛ va su. ⁷ Mali bo ji ovi ŋusunglo ɖokpo ke nyi ovi tantɛn etɔn. Ke na ye hɔn kpɔn tɛnxo ti le jɛhɔn yi tɛnxo yetɔn, ye bo gbɛ va sɔ-ɛ sɔ ji do onu ke mɛ na lingbɔye nɔ ɖu onu le. ⁸ Le blɛ lɔ ogbɔkplɔtɔ ɖeye nɔ cɔ ozan le hɔntun a do kpe ŋukunsin do ogbɔ yetɔn ye wu. ⁹ Le ajiji mɛ kpoŋu, ɛwɛndotɔ Xwetɔ Mawu tɔn ɖe bo ze do ŋumɛ na ye. Gigo Mawutɔn bo trɔ do ye kpo kinklɛn kpo, vivɔ ɖaxo ɖe bo jɛ ye ji. ¹⁰ Ɛwɛndotɔ Mawutɔn lɔ lɔ nba ye tun:« Mi ka mɔ vɔ ɖo ko hɛn ɛwɛ nywɛ ɖe do va na mi. Ɛwɛn ke na hɛn jijwɛ ɖaxo va na Mawu we otogun lɔ. ¹¹ Le egbe le toxo Davidi tɔn mɛ, ye ji hwlɛngantɔ ke nyi Klisu na mi. ¹² Kena mi na do josi wi ɖo xɛn: mi na kpɔn ovifɛ ɖe ye bo sɔ-ɛ sɔ hlɔnyi le onu ke mɛ na kanlin ye nɔ ɖu onu le.» ¹³ Zɔnɖokpo kpoŋu, Mawu we ɛwɛndotɔ ahwankpɔ bo va bɔ do tantɛn tɔn lɔ wu, ye bo ji kanfu we ohan na Mawu tun : ¹⁴ « Gigo na Mawu le sɛxwe kpo nyidanji, fifa na ɛmɛ ke e yi owan na le nyidan ji.» ¹⁵ Ke na ɛwɛndotɔ Mawutɔn ye lɛkɔ yi sɛxwe vɔ, ogbɔkplɔtɔ lɛye lɔ na yeɖe tun :« mia sɔn-i Bɛtɛlɛxɛmu a bo kpɔn onu ke jɔ, onu kena Xwetɔ lɔ ɖe xlɛ.» ¹⁶ Ye bo hlɛndo yi oto lɔ mɛ, bo ve kpɔn Mali kpodo Jozɛfu kpo ovi lɔ le onyihinhlɔn le onu ke mɛ na kanli ye nɔ ɖu onu le. ¹⁷ Kena ye se emɔ vɔ, ye jla onu ke na ye se do ovi lɔ wu ye. ¹⁸ Onu lɔ kpaca do ɛmɛ bisese kena gbɛ se oxo lɔ ke na ogbɔkplɔtɔ lɛye lɔ. ¹⁹ Vɔ Mali bo bu tamɛ do onu lɛye bisese wu nɔ, a bo hɛn ye do oji etɔn mɛ. ²⁰ E xin godo, ogbɔkplɔtɔ lɛye tɛkpɔ-ɛ bo do gigo na Mawu, bo kan Mawu do onu ke na ye se bo kpɔ lɔ wu. Onu lɛye jɔ pɛpɛpɛ ɖi ke na Mawu we ɛwɛndotɔlɛye lɔ ɖo ha. ²¹ Ke ye ji Yesu we onyihinhɔn atrotɔn gɔ gbe ke na ye na gbo ada ni-i ye ɖo nyikɔ ni tun Yesu ɖi ke na ɛwɛdotɔ Mawutɔn lɔ na Mali ɖo san ha gbɔxwe na e do va yi gomi etɔn. ²² E xin godo, ganmɛ va su na Mali kpo Jozɛfu kpo na do ve sra ɛwu ɖi ke na osen ke na Mawu na Mɔyizi lɔ ɖo ha. I we dɔn Jozɛfu kpo Mali hɛn ovi lɔ do yi Mawu we oxwe gbe le Jeluzalɛmu a do sɔ-ɛ sɔ xlɛ Xwetɔ Mawu lɔ. ²³ Ɖi ke na ye wlan le Xwetɔ Mawu lɔ we osɛn mɛ tun :« ye na ɖe ŋusunglo tantɛn do ovo na Mawu.» ²⁴ Ye ɖo na va san avɔ kpo kpaxwele owe alo hɔnnɛ winwyan owe ɖi ke na Xwetɔ Mawu we osɛn byɔ ɖo ha ²⁵ Vɔ le ganxinlɔ mɛ, dahwe ɖe le Jeluzalɛmu, ye bo nɔ yɔ-ɛ tun Simɛnyɔn. Dahwe xin lɔ bo nyi ɛmɛ jijwɛ, bo nɔ ɖo sisi na Mawu. E bo le ote kpɔn ɛmɛ ke na va hwlɛn Izrayɛli gan. Gbigbɔ Kinkwɛn bo le eji. ²⁶ Ye bo ɖexlɛ san do gbɔn Gbigbɔ Kinkwɛn lɔ mɛ tun hɔn ku nɔ gbɔɔn do jɛ hwekenu na o na va kpɔn Yesu Klisu ke nyi Xwetɔ lɔ. ²⁷ Gbigbɔ Kinkwɛn kplɔ-ɛ yi Mawu we oxwe gbe, le ganxinlɔ mɛ, Jozɛfu kpo Mali kpo kplɔ Yesu va Mawu we oxwe lɔ gbe bo na do ve wasi onu kena osen Mawutɔn lɔ tun ye mɔ wasi ni-i ye; ²⁸ E bo kɔ ovi lɔ do alɔ mɛ bo kanfu Mawu tun: ²⁹ « Syɛ Xwetɔ, jɔ odansɔvi tɔwe do na ni sɔn le fifa mɛ ɖi kena oxo tɔwe o lɔ-ɛ ɖo ha.» ³⁰ Ɖo ko kpɔn hwlɛngantɔ ke o na kpo ŋukunsin tɛye kpo. ³¹ Hwlɛngantɔ ke o jla ɖo le gbɛtɔ bisese we ŋumɛ: ³² I wɛ nyi kinklɛn ke na ɖe nyikɔ tɔwe xlɛ ɛmɛ bisese le ɛgbɛ lɔ mɛ bo ɖe gigo tɔwe sɔ xlɛ togun Izrayɛlitɔn.» ³³ Oxo kena Simɛnyɔn o lɔ nɔ do vi lɔ wu, e kpaca do Jozɛfu kpo Mali. ³⁴ Simɛnyɔn xo fifa we ɛɖɛ na ye, bo lɔ na Mali tun:« Do ovi ke lɔ wu, emɛ susu na jɛ nyi le Izrayɛli we tomɛ e mɔ ke Izrayeli vikpɛye susu na va cite exin lɔ na ci ɖi josi Mawutɔn ɛmɛye bo na cite do e wu. ³⁵ Lɔ Mali, ɖi kena dɛnkpwe nɔ gbo ɛmɛ ɖo, e mɔ ke wɛ vivɛ sise na gbo oklan tɔwe ɖo na ye na do ɖe onu hwihwla ke na le ayixamɛ na gbɛtɔye do agbaŋugba.» ³⁶ Nyɔnusi ɛwɛndotɔ Mawutɔ ɖokpo can le ofi lɔ, ye bo nɔ yɔ-ɛ tun Ana ke nyi Fanuwɛli we vi nyɔnusi, bo tɔn sɔn kunkan Azɛ tɔn mɛ. E bo nyi mɛhyɔ susu. E nɔ gbɛji le nyɔnuvi etɔn mɛ bo va e osu wɛ i kpo oswɔ kpo va nɔ opkɔ na oxwe acowe; ³⁷ E xin we godo, oswɔ bo ku, e bo va nyi kposi (osukusi) na oxwe kanwe-ko-nukun ɛnɛ, e ko mɔ lɛ le Mawu we oxwe gbe gbeɖe, e bo sɛn Mawu nɔ ozan kpo keze kpo le onu bibla kpo ɛɖɛ xixo kpo mɛ. ³⁸ Le ganxixo ɖokpo lɔ mɛ pɛpɛpɛ, e lɔ can va Mawu we oxwe lɔ gbe bo jɛ ɛkpe do ji na Mawu bo mɛ jɛ ovi lɔ we oxo lɔ ji na ɛmɛ ɖekpokpwe ke na le blɛ bo tre kpɔn hwlɛngan Jeluzalɛmu tɔn nɔ ye. ³⁹ Kena Jozɛfu kpo Mali kpo wasi onu kena osɛn Xwetɔ Mawutɔn lɔ byɔ vɔ, ye va lɛkɔ si-in Nazalɛti we toxo yetɔn lɔ mɛ le Galile. ⁴⁰ Ovi lɔ bo hwɛn nɔ, bo ɖo hɔnhlɔn nɔ. E ɖo onunyinyɔ ganji, Mawu we ɛfenu bo le kpo-e. ⁴¹ Jozɛfu kpodo Mali nɔ yin Jeluzalɛmu oxwesɔ-oxwesɔ na vivayi we oxwe ɖuɖu. ⁴² Kena Yesu ɖo oxwe weve, ye kplɔ-ɛ yi Jeluzalɛmu ɖi kena ye o nɔ wasi ɖo san ha, a do va yi ɖu vivayi we oxwe lɔ. ⁴³ Ke ye ɖu oxwe lɔ vɔ, Jozɛfu kpo Mali lɛ kɔ va sɔn nɔ, ye ko nyɔ-ɛ tun Yesu mɔ ci Jeluzalɛmu lɔ. ⁴⁴ Ye bo bu-i tun Yesu mɔ le ɛmɛye mɛ kpo hiye kpo mɔ zɔn ye we ha, ye bo wasi ŋukɔn ɖiɖe ɖokpo gbɔxwe va jɛ Yesu kan ji gbɔn ɛmɛye kpo hwanyi etɔn ye mɛ. ⁴⁵ Ke ye hɔn kpɔn-ɛ, ye mɔ lɛkɔ yi Jeluzalɛmu lɔ bo gbɛ do kɛɛn nɔ. ⁴⁶ Ŋunkɔnɖiɖe atɔn gɔ gbe, ye va yi kpɔn-ɛ le Mawu we oxwe lɔ gbe, ye bo xinnɔnyi le osɛnkplan ɛmɛtɔye mɛ, bo ɖo oto wu ye nɔ bo kan oxo se wu ye nɔ. ⁴⁷ Zinzin etɔn kpo oxo ke e ɖo oxo wu nɔ ye e kpaca do ɛmɛ ɖekpokpwe ke se oxo ke e lɔ nɔ ye. ⁴⁸ Ke Mali kpo Jozɛfu kpo va kpɔn-ɛ, a vo xo ye, onɔ bo lɔ ni-i tun :« Ovi tɛye, ŋunɛ jɔ o do wasi e mɔ kpo mi? Awo! ojikan va gbo na blɔ kpodo didawe kpo nɔ, mi bo do kan we nɔ.» ⁴⁹ Yesu bo lɔ na ye tun lɔ byɔ:« Ŋunɛ jɔ na li do kan nɔ? Alo mi hɔn nywɛ tun ko ɖo odan bo na wa le didaye we oxwe gbe wɛɛ?» ⁵⁰ Vɔ, hɔn nyɔn oxo ke na Yesu lɔ na ye lɔ we gɔnmɛ. ⁵¹ Yesu bo xo do ye, bo lɛkɔ sin Nazalɛti, bo se tonu na ye. ⁵² Yesu bo hwɛn nɔ, onunyinyɔ etɔn bo jɛ e ji nɔ, e bo kpɔn ɛfɛnu susu le Mawu kpo Gbɛtɔye ye kɔn.