¹ Ɛmɛ susu sɔ tito na do wlan onu ke o jɔ le mía we dodomɛ nɔ ye, ² ye bo wlan onu xin lɛye ɖi ke na ɛmɛ ke kpɔn onu ke jɔ nɔ kpo ŋukunsin yetɔn ye kpo sɔn bibɛnu, bo va lɛ Mawu we oxojlatɔye xo gbexo etɔn na mí ɖo ha. ³ Exin wɛ dɔ na blɔ can, ko sɔ ogbeta na do wlan, ɖebɔ do ɖewu, onun ke na jɔ sɔn dojɛ gbɔɔn, i wɛ ko kan odosena ganji ye na we ɛmɛjɔ-ɛmɛ Tewofili. ⁴ Ko jlo tun na nyɔ oxojɔxo kpatakli ke na le onukpinkplan ke o yi lɛye mɛ. ⁵ Hwekenu na Elodu ɖu Xɔlu le Jude, avɔsantɔ Mawutɔn ɖe le, wɛ ye nɔ yɔ-ɛ tun Zakali. E bo sɔn avɔsantɔ Mawutɔn Abiya we gbɛta mɛ. Osyɔ bo nɔ nyi Elizabɛti? Alɔn we kunkan mɛ wɛ etɔn sɔɔn. ⁶ Zakali kpo Elizabɛti bo nɔ le jijwɛ le ŋukɔn na Mawu. Ye bo nɔ se tonu na osɛn kpo ogbeɖiɖe Mawutɔn ye ganji. ⁷ Vɔ ye hɔn ɖo ovi, ɖo Elizabɛti nyi ajikponɔ i wɛ ɖɔn ye mɛ owe lɛye bo nyi mɛhyɔ le ohwe xinnu. ⁸ Gbeɖokpo, Zakali o wa avɔsantɔ we odan etɔn le Mawu we ŋukɔn nɔ, ɖo ogbɛta etɔn we azan wɛ va. ⁹ Ye bo wasi ovoɖeɖe bo do sɔ Zakali ɖi kena e le walɔ mɛ na ye ɖo san ha na i a do ɖyɛ tinxo kinkwɛ Xwetɔ Mawutɔn mɛ, a do ve mɛ zruya. ¹⁰ Hwekenu na ye mɛ zruya nɔ, togun Mawutɔn bi nɔ le gaji a do xo ɛɖɛ nɔ. ¹¹ I wɛ ɛwɛndotɔ Mawutɔn ɖokpo ve tɔn do ŋumɛ na Zakali. Ɛwɛndotɔ Mawutɔn lɔ bo va le te le agba ke ji na ye mɛ zruya lɔ le we aɖusimɛ. ¹² Kena Zakali kpɔn-ɛ, ayi etɔn gbado jikan bo so-e. ¹³ Vɔ ɛwɛdotɔ Mawutɔn lɔ bo lɔ ni byo:«ko vɔ Zakali ɖo Mawu se ɛɖɛ tɔwe. Siwe Elizabɛti na ji ovi ŋusunglo ɖokpo na we o bo na ɖo ŋikɔ ni tun Jan. ¹⁴ Nyɔna kpo jijwɛ kpo wɛ ovi lɔ na nyi na we, i wɛ ɛmɛ susu na kpɔn jijwɛ do jiji etɔn wu. ¹⁵ Ɖo e na nyi odansɔvi ɖaxo ɖokpo na Mawu. E hɔn nu vin nɔ, e ko mɔ do onu ahan sinsyɛn ti mɛ nɔ. E na gɔ kpo gbigbɔ kinkwɛn sɔn onɔ we dɔmɛ gbɔn. ¹⁶ Izrayɛli vikpɛye susu na lɛkɔ va yi Xwetɔ Mawu yetɔn lɔ kɔn. ¹⁷ E na zɔn zɔnlin leMawu we ŋukɔn kpo oyɛ Mawutɔn le Eli we hɔnhlɔn lɔ mɛ, na ye a do dɔn ayixa otɔye tɔn ɖodan vikpɛye kɔn, a bo ɖe omɔ na tolivɛtɔye na ye a mɔ zɔnzɔnlin gbɔn onu nywɛ ɛmɛjijwɛye tɔn mɛ, a do jla otogun lɔ ɖo na Xwetɔ Mawu. ¹⁸ Zakali lɔ na ɛwɛndotɔ Mawutɔn lɔ tun:« naɖe ko na nywɛ ɖo? Ɖo blɔ kpo siye kpo mi ku nyɔxo. ¹⁹ Ɛwɛndotɔ Mawutɔn bo yi gbe ni tun: ko nɔ nyi Gabliyɛli, mɛ ke nɔ nɔ ote le ŋukɔn na Mawu. Ye dɔn dodan na ma do va do ɛwɛn nywɛ, lɔ. ²⁰ Enyɔ o na trɔ zun ɛɖɛtitɛnɔ, hɔn mɔ kpewu na lɔ oxo gbɔɔn sɔ jɛ gankemɛ onu lɔ na jɛ ɖo hɔn ɖinu na oxo tɛye ke na nyi cicɛ le gan etɔn mɛ.» ²¹ Togun Mawutɔn lɔ bo tle kpɔn Zakali nɔ, wɛ e kpaca do ye nɔ ke na Zakali dɛn tintɔn le tɛnxo kinkwɛn lɔ mɛ. ²² Kena e va tɔn vɔ, Zakali hɔn kpewu mɔ lɔ oxo na ye nɔ ɛmɛye bo se i we gɔnmɛ tun e mɔ hɔn kpɔn onu ɖexlɛ ti. E bo wasi alɔ bo do lɔ oxo lɛye nɔ. ²³ Kena odanwiwa etɔn we ganmɛ va yi vɔ, Zakali sin oxwe etɔn gbe. ²⁴ Exin godo osyɔ Elizabɛti yi gomi. Osunzan atɔɔn we dodomɛ e nɔ bɛ nɔ, bo nɔ lɔ le eɖɛ mɛ tun: ²⁵ «Onu kena Mawu wa na xɛn xin, e sɔ ɛfɛnu we ŋukunsin bo do kpɔn bo ɖo alɔ te na. Onu ke na nɔ wa ŋunya na le ɛmɛye we ŋumɛ. ²⁶ Kena gomi lɔ ɖo osun atrekpo nɔ, Mawu sɔ ɛwɛndotɔ etɔn Gabliyɛli dodan oto Galiletɔ mɛ le Nazalɛti we nyidan ji, ²⁷ le nyɔnuvi le alɔ ji ɖe kɔn. E bo nɔ nyi Mali. Jozɛfu ke tɔn sɔn Davidi we kunkan mɛ, bo sɔ agɔ Mali lɔ. ²⁸ Ɛwɛndotɔ lɔ va Mali kɔ bo lɔ ni tun:« Ko do ogbe na we lɔ ke Mawu wa ɛfɛnu ɖaxo na, Xwetɔ Mawu le okpɔ kpo we» ²⁹ Kena Mali se emɔha, jikan so-e, e bo kan eɖe se tun ŋunɛ ogbedido xin lɔ o lɔ nɔ. ³⁰ Ɛwɛndotɔ lɔ bo lɔ ni-i tun:« Mali, ka mɔ vɔ, ɖo o kpɔn ɛfɛnu le Mawu kɔn. ³¹ Kpɔn o na ji ovi ŋusunglo ɖokpo wɛ-ɛ o na ɖo nyikɔ ni-i tun Yesu. ³² E na va nyi ɛmɛ ɖaxo, wɛ ye na yɔ-ɛ tun Mawu ɖaxo we ovi. Xwetɔ Mawu na ni-i Xɔlu we okpo lɔ ɖi kena e na dagbwɔ Davidi ɖo ha. ³³ I wɛ ovi xinlɔ na ɖu oga tɛgbɛtɔn, oga mavɔmavɔ le Jakɔbu we togunmɛ, i wɛ oga ɖuɖu etɔn ko mɔ vɔ nɔ gbeɖe» ³⁴ Mali bo kan-ɛ se byo:« naɖe lɛ onu emɔha tɔn na jɔ ɖo, blɔ hɛn hɔn nyɔ ŋusunglo kpɔn?» ³⁵ Ɛwɛndotɔ Mawutɔn lɔƥ bo yi ogbe ni tun:« Gbigbɔ Kinkwɛn na jɛ ote do jiwe i wɛ Mawu ɖaxo lɔ we hɔnhlɔn na cɔ we . I wɛ dɔn ovi ke o na ji lɔ na nyi ɛmɛ Kinkwɛn, wɛ ye na nɔ yɔ-ɛ tun Mawu we vi. ³⁶ Yi Elizabɛti kena tɔn sɔn xwedo tɔwe mɛ can yi gomi le nyɔxo we oxwe etɔn mɛ. Gomi etɔn o lo ɖo osun atrekpo nɔ syɛ, e lɔ ke ɛmɛye nɔ yɔ tun ajikponɔ ³⁷ ɖo onu ti hɔn glo wiwa na Mawu.» ³⁸ Mali bo lɔ tun:« odansɔvi Mawutɔn wɛ ko nyi. Mawu ni wasi na ɖi kena o lɔ ɖo ha!» E xin we godo, ɛwɛndotɔ lɔ bo sɔn le e kɔn. ³⁹ Le ganxin lɔ mɛ, Mali hwlɛndo bo va sɔn-i toxo ke le kpokpoe lɔ ji le JUde we toxo lɔ mɛ. ⁴⁰ Mali va sin Zakali xwe bo do ogb e na Elizabɛti. ⁴¹ Ke Elizabɛti se ogbe do na ɛmɛ etɔn lɔ, ovi lɔ hwan le dɔmɛ ni. Elizabɛti bo gɔ kpo gbigbɔ kinkwɛn kpo. ⁴² E bo do axwa sinsyɔn bo lɔ tun:« O nyi dona nɔ le nyɔnusiye bisese mɛ wɛ ovi ke le dɔmɛ na we lɔ can nyi dona nɔ. ⁴³ Mɛnɛ lɛ ko nyi na Xwetɔ tɛye onɔ na do va kɔn ye? ⁴⁴ Ɖo gankemɛ ko se ogbedido tɔwe, ovi lɔ e hwan le dɔmɛ na. ⁴⁵ Onu nyɔ na we ɖo o kan deji tun Xwetɔ Mawu lɔ mɔ na wasi onu kena e mɔ lɔ na we lɔ!» ⁴⁶ E xin mɛ Mali bo lɔ byo:« Oklan tɛye kanfu Xwetɔ Mawu. ⁴⁷ Na gbigbɔ tɛye ni kpɔn jijwɛ le Mawu hwlɛngantɔ lɔ mɛ. ⁴⁸ Ɖo e sɔ ŋukunsin etɔn do blɔ sunmɔvi etɔn ji, blɔ ke hɔn nyi onu ti. Ɛɛn, bɛ sɔn syɛ kaka do yi, ɛmɛye na nɔ yɔ tun nyɔnanɔ. ⁴⁹ Ɖo Mawu hɔnhlɔn ɖaxo bi nɔ lɔ e wa onu ɖaxo na. Nyikɔ eetɔn bo nyi kinkwɛn. ⁵⁰ Dɔŋuɖunu kpɔn na ɛmɛ etɔn le tɛgbɛɛ na ɛmɛ ke nɔ ɖo sisi ni-i ye. ⁵¹ E ɖe hɔnhlɔn etɔn sɔ xlɛ, kpo alɔ etɔn kpo e kankan ɛmɛ ke nɔ yigo ye. ⁵² Eɖe okpo le agɔ na Xɔluvi, bo sɔ ɛmɛ ke nɔ sɔ yeɖe sɔ hwe ye do oji. ⁵³ Ɛmɛ ke xovɛ ci ye Mawu na onu nywɛ susu wu ye. E nya ohotɔye asigba alɔgba. ⁵⁴ E gɔ alɔ na Izrayeli odansɔvi etɔn a do xlɛ dɔŋuɖunu etɔn ⁵⁵ wu Ablaxamu kpo kunkan etɔn ye. ⁵⁶ Mali e nɔ kpo Elizabɛti na sunzan atɔn ha, e xin we godo, e bo va lɛkɔ yi oxwe etɔn gbɛ. ⁵⁷ Syɛ ogan xo na Elizabɛti na do ji ovi, e bo ji ovi ŋusunglo ɖokpo. ⁵⁸ Ɛmɛ ke le oxwe tɔn kpa ye kpo xwedo yetɔnye bo se tun Mawu mɔ ɖe dɔŋuɖunu ɖaxo etɔn mɔ sɔ xlɛ ɛ ye bo va kpɔn jijwɛ kpwe. ⁵⁹ Le azan atrotɔn gɔ lɔ gbe, ye bo va gbo ada na ovi lɔ. Ye jlo na ɖo otɔ lɔ we nyikɔ ni-i. ⁶⁰ Vɔ onɔ lɔ bo gbɛ byo e mɔ na nyi Jan. ⁶¹ Ye bo lɔ ni tun ɛmɛ ti hɔn le xwedo tɔwe gbe bo ɖo nyikɔ xin ha. ⁶² Ye bo wasi alɔ na ovitɔ lɔ bo kan-ɛ se tun byo na ɖe o kan tun ye a yɔ-ɛ. ⁶³ E bo byɔ tɛkpo ɖokpo ke ji na e wlan :« nyikɔ etɔn na nyi Jan.» E bo kpaca do ɛmɛye bisese. ⁶⁴ Zɔnɖokpo onu bo hun na Zakali e bo jɛ oxo lɔ ji, bo kanfu Mawu nɔ. ⁶⁵ Ɛmɛ ke le oxwe kpa yetɔn ye vivɔ hu ye. Le Jude we otota ke le kpokpwe lɔ ji, ye bo lɔ oxo do onu ke jɔ ye wu nɔ. ⁶⁶ Ye mɛ bisese ke se onu ke na jɔ ye, ye hɛn do oji yetɔn ye mɛ bo lɔ tun:« ŋunɛ ovi ke lɔ na nyi?» ɖo Xwetɔ we alɔ le ovi lɔ ji. ⁶⁷ Zakali ovitɔ lɔ gɔ kpo Gbigbɔ kinkwɛn Mawutɔn, e bo je oxo lɔ ɖenyi ji tun: ⁶⁸ « Mi kanfu Xwetɔ lɔ Izrayɛli we Mawu lɔ, ɖo e ɖe kɔ va kpɔn otogun etɔn bo tun okan ni-i. ⁶⁹ E na mi hwlɛngantɔ sinsyɛnxu ɖe le Davidi ke nyi odansɔvi etɔn we kunkan mɛ. ⁷⁰ Oxo xin lɔ we Mawu lɔ san do gb ɔn oxolɔɖenyitɔ kinkwɛn etɔn we onu mɛ. ⁷¹ Mi na kpɔn hwɛnga le kɛntɔ miatɔn si, ko na na mi vivo le ye mɛ ke gbɛ owan na mi ye si. ⁷² Mawu kpɔn doŋuɖunu na mia dagbwɔ ye bo flin okancica kinkwɛn etɔn, ⁷³ ajɔgbe wɛ e fyan na mía dagbwɔ Ablaxamu, e na na miye can, ⁷⁴ hwekenuna e na yi mi le alɔ nylakan kɛntɔ miatɔnye tɔn mɛ, kpo acɛ ke hɔn ɖo vivɔ ti na do kpewu a sɛn, ⁷⁵ le mimɛ ji ninɔ mɛ le ɛhwɛ jijɔ mɛ le Mawu we ŋumɛ le ɛgbɛ ninɔ míatɔn bi hwenu. ⁷⁶ Zakali lɔ tun lɔ, ovi teye, ye na yɔ we tun oxolɔɖenyitɔ Mawu ɖaxo tɔn. O na va zɔn zɔnlin le ŋukun na Xwetɔ lɔ a do jla omɔ etɔn ji ɖo. ⁷⁷ A bo na onunywɛ wu otogun etɔn do hwlɛngan ji dogbɔn ɛhwɛ sɔkɛ yiyi mɛ. ⁷⁸ Mawu míatɔn na sɔ ɛhwɛ sɔ kɛ mi dogbɔn dɔŋuɖunu ku na kpɔn na ɛmɛ etɔn mɛ. Le dɔŋuɖunu xin lɔ mɛ, e na va, a bo ci ɖi nidɔn ha, a bo klɛn do mía ji sɔn jihwe. ⁷⁹ Kinklɛn xin lɔ na ta do ɛmɛ ke le vuvlu mɛ ye bo vɔ na oku nɔ ye ji na do jɔ okɔ na mi do omɔ fifa tɔn lɔ ji.» ⁸⁰ Jan lɔ bo hwɛn nɔ le gbaza mɛ kpo gbigbɔ mɛ nɔ. E bo va ci zogbe lɔ ji gbɔn do jɛ hwekenu na e va jɛ eɖe sɔ xlɛ Izrayɛli we togun ji.