¹ Ɖo Mɛlicisedɛki xin lɔ ke nyi xɔlu Salɛmutɔn mɔ nyi Mawu Ɖaxo lɔ we avɔsantɔ, e lɔ wɛ va yi kpe Abraxamu d'omɔ ji le hwekenou na e lɛkɔ sɔn ahwan ke e va yi fun kpan ŋukɔn xɔluye bo ɖu le ye ji gbenu. Mɛlicisedɛki lɔ bo xo fifa we ɛɖɛ ni-i. ² E lɔ lɔ wɛ Abraxamu sɔ onu zɛtɛye we maɖowo sɔ na. Nyikɔ ke Mɛlicisedɛki lɔ we gɔnmɛ wɛ nyi:«onu jijwɛ wiwa we xɔlu», mɔ bɔ do exin wu, e mɔ nyi salɛmu we xɔlu gɔnmɛ etɔn bo nyi:« fifa we xɔlu». ³ Mɛlicisedɛki lɔ hɔn ɖo otɔ, e ko ɖo onɔ, e ko ɖo kunkan, e ko mɔ ɖo jijigbezan gbɔɔn do ɖo okugbezan, vɔ, e le ɖi Mawu we ovi ha bo nyi avɔsantɔ sɔn mavɔ do yi mavɔ. ⁴ Mi kpɔn kena Mɛlicisedɛki lɔ nyi ɛmɛ ɖaxo gbɔn Abraxamu ke nyi dagbo-dagbo bo sɔ onu kena e hɛn sɔn ahwan we maɖowo sɔ ni-i. ⁵ Vɔ ɖi kena osɛn lɔ lɔ ɖo ha, ɛmɛ ke jɔ le Levi we okunkan mɛ bo nyi avɔsantɔye, wɛ nɔ yi maɖowo le otogun Izrayɛli tɔn si, yi we gɔnme wɛ nyi ye nɔvyɔye si, Abraxamu we jijimɛviye wɛ ye bo nyi ganke. ⁶ Vɔ, Mɛlicisedɛki ke hɔn jɔ sɔn okunkan xin lɔ mɛ, wɛ yi maɖowo le Abraxamu si bo xo fifa we ɛɖɛ na ɛmɛ kena Mawu kan atanŋuye na. ⁷ Onu dinɖɔn ti hɔn mɔ le blɛ, ɛmɛ kena xo fifa we ɛɖɛ na ɛmɛ nɔ, e hugan ɛmɛ kena e xo fifa we ɛɖɛ na nɔ lɔ. ⁸ Ɛmɛ ke jɔ sɔn Levi we okunkan mɛ bo nɔ yi maɖowoye, ɛgbɛtɔye wɛ ye nyi bo nɔ ku, vɔ ke kan Mɛlicisedɛki, ɛmɛ ke wu na ye ɖe kunnu do tun e mɔ le ɛgbɛlɔ wɛ. ⁹ E na ye hɛn ye mɔ byo: Levi we okunkan ke mɔ nɔ yi maɖowo lɔ, i tete can mɔ na maɖowo lɔ gbɔn Abraxamu ji. ¹⁰ Ɖo hwekenu na Mɛlicisedɛki va yi kpe Abraxamu, Levi we okunkan lɔ hɔn ka jɔ hɔndyo vɔ e bo le ɛhun mɛ na Abraxamu. ¹¹ Otogun Izrayɛliyɛli we osɛn xlɔn avɔsantɔye we odan kena ye nɔ wa ye ji. Vɔ, na e do nyi byo avɔsantɔ we odan xin lɔ do sɔgbe seŋu wɛ, bɛ e mɔ na mɔ hyan byo avɔsantɔ bu le ɖi kena Mɛlicisedɛki tɔn nyi ɖo ha a mɔ va ke wɛɛ? E nɔ nyi Arɔn we Okunkan mɛ jan hwɛn e na jɔ sɔn wɛɛ? ¹² Ɖo na e nyi byo kena ye nɔ ɖu avɔsantɔ ɖo lɔ do ɖɔli, bɛ osɛn lɔ can ɖo na ɖɔli dandan. ¹³ Vɔ, ɛmɛ ke wu ye lɔ oxo xin lɔ do akɔta bu mɛ wɛ e jɔ le; ɛmɛ ti ko jɔ le akɔta xin lɔ me bo wasi avɔsantɔ we odan le avɔsan we agba lɔ ji kpɔn. ¹⁴ Emɛ kɔn nywɛɖe byo xwetɔ míatɔn mɔ jɔ sɔn juda we akɔta mɛ, Mɔyizi ko lɔ avɔsinsan we odan we oxo do akɔta xin lɔ wu. ¹⁵ Oxo ke na mi lɔ nɔ hɔn do vuvlu e mɛ kɔn nywɛɖe, we nyi byo: na avɔsantɔ bu ɖe cite bo va ɖi Mɛlicisedɛki ha, ¹⁶ Avɔsantɔ yɔyɔ xin lɔ hɔn nyi ɛmɛ ke ɖo na nyi avɔsantɔ kena osɛn lɔ lɔ ɖo, ɖo okunkan ke mɛ na ye ɖo na jɔ sɔn lɔ mɛ wu ó vɔ hɔnhlɔn ke nɔ na na ye nɔ ɛgbɛ tɛgbɛ-tɛgbɛ mɛ wɛ. ¹⁷ Ɖo winwlan lɔ lɔ do e wu lɔ byo:«Onyi avɔsantɔ gbɔn do yi mavɔmavɔ ɖi kena Mɛlicisedɛki tɔ nyi ɖo ha». ¹⁸ Kena e yi e mɔ, osɛn xixo lɔ ye gu i we kun ɖo e hɔn ɖo hɔnhlɔn e ko ɖe ale ɖe. ¹⁹ Osɛn lɔ hɔn na na onu lɛye sɔgbe seŋu, le omɔ bu nu, omɔkpinkpɔn ke nyɔ hugan exin lɔ wɛ va, mí bo gbɔn exin lɔ ji do tɛkpɔ Mawu. ²⁰ Ke mɔ do e wu, onu wɛ Mawu ta do wasi e ke lɔ. Ye mɛ gbokpweye tɔn e hɔn ta onu gbɔxwe ye nyi avsantɔye, ²¹ vɔ Yesu e lɔ; Mawu ta onu do sɔ-ɛ do ɖo avɔsantɔ, bo lɔ do e wu tun byo: «Xwetɔ Mawu lɔ wɛ ta onu bo lɔ byo: ''o nyi avɔsantɔ gbɔɔn do yi mavɔmavɔ" E ko mɔ nɔ gblɔn jɛ i we oxo ji ke.» ²² I wɛ dɔn Jesu do va trɔ zun okancica saatɔn we ojiɖenu. ²³ Mɔ bɔ do exin wu, ɛgbɛtɔ susu wɛ ɖu avɔsantɔ ɖebɔdoɖewu, ɖo ye nɔ ku, ye ko mɔ nɔ kpewu wa odan gbɔɔn do yi. ²⁴ Vɔ ke e nyi byo Jesu lɔ le ɛgbɛ gbɔɔn do yi, e hɔn ɖo byo ɛmɛ ɖe mɔ na mɔ va ɖɔli Jesu le avɔsantɔ we odan wiwa etɔn mɛ. ²⁵ Exin lɔ ke wɛ dɔn na e kpewu hwlɛn ɛmɛ kena gbɔn eji do tɛkpɔ Mawu ye gan tɛgbɛ, ɖo e le ɛgbɛ tɛgbɛ a mɔ do ɛɖɛ do ota na ye nɔ. ²⁶ Ɖo avɔsantɔye we oga xin ha lɔ wɛ jɛ na mí. E le kinkwɛn, e hɔn hu ehwɛ ɖe, oɖyu ti ko le e wu, ye ɖe-e do ovo le onunyinylawatɔye wu bo kɔ-ɛ do yi jixwe hugan jiŋukunsin ²⁷ E nɔ hyan byo nyihɔngbe-nyihɔngbe e na san avɔ do ota na i tete a mɔ do lɛ i we onu nyinylaye seŋu gbɔxwe a gbo va san do otogun lɔ we onunyinylaye tamɛ ɖi kena avɔsantɔ ɖaxo gbokpweye nɔ wasi ɖo ha. E wasi exin lɔ zɔnɖokpo gee e bo vɔ do blɛ, i wɛ nyi byo e sɔ i tete do san avɔ. ²⁸ Ɖo osen lɔ nɔ sɔ ɛgbɛtɔ ke ɖo gbɔjɔ-gbɔjɔye a mɔ do ɖo avɔsantɔ ɖaxoye, vɔ le godo, Mawu we oxo kena e lɔ do kan atanŋu bo ta onu, sɔ ovi kena sɔgbe seŋu gbɔɔn do yi do ɖo avɔsantɔ ɖaxo.