¹ Exin wu mi ɖo na tɛdo oxo kena mi o se ye wu taŋu, exin, mi ko do bu omɔ nɔ. ² Ɖo ken enyi byo, oxo kena ɛwɛndotɔ Mawutɔnye lɔ nyi xonugbo, ɛmɛ ɖekpokpwe kena hu ɛhwɛ a lo e ko se tonu, bo yi otodindɔn ke jɛ ni-i, ³ naɖe lɛ míye teteye na wa do na otodindɔn na do gbɔ ota na mí, na mí ɖe okɔ le hwlɛnga ɖaxo xin wu? Xwetɔ lɔ wɛ xwi hwlɛngan lɔ we oxo lilɔdo ŋukɔn, exin we godo, emɛ kena se ye bo va xwi ɛkpɛn ɖiɖo. ⁴ Mawu bo ɖo ɛkpɛn kunnu ɖiɖe yetɔnye ji, do gbɔn josiye, onu kpaca-ɛmɛ ye, ŋudandonu hamɛmɛ ye kpodo gbigbɔ kinkwɛn we onu ninaye kena e ma ɖi ke e ba ɖo ha. ⁵ Ɖo ɛgbɛ kena gbɔnɔ mi bo lɔ i we oxo no lɔ, Mawu hɔn sɔ ɖo ɛwɛndotɔ etɔnye we ɛcɛ gɔ. ⁶ Vo ɛmɛ ɖe ɖe kunnu le Mawuxo lo mɛ bo lɔ byo;« Mɛle gbɛto nyi na lɔ Mawu na o do ɖoŋu do ewu? alo mɛ lɛ ovi gbetɔtɔn nyi na o na do kpewun do ewu? ⁷ O swɛ sɔ-ɛ sɔ hwe, bo sɔ-ɛ sɔ ɖo agɔ na ɛwedotɔye na hwenu oviiɖe bo va sɔ gigo kpo bubu kpo sɔ cɔn ni-i ɖi Xɔlugba ha, ⁸ O sɔ onu bi sɔ ɖo ɛcɛ etɔn gɔ.» Mawu sɔ onu bisese so ɖo ɛcɛ etɔn gɔ onu ti hɔn le na e do kpo ma sɔ ɖo ɛcɛ etɔn gɔ. ⁹ Vɔ onu kena mí kpɔn nɔ hɛn: Yesu lɔ ke na Mawu sɔ hwe bo sɔ-ɛ sɔ ɖo Ɛwɛndotɔ Mawutɔnye we agɔ na oganxixo oviɖe e mɔ do ku do ota na gbɛtoye bisese dogbon ɛfɛnu Mawutɔn mɛ, Mawu va sɔ gigo kpodo bubu kpo sɔ cɔn ni-i ɖi Xɔlugba ha,do aya kena eɖu do ku lo wu. ¹⁰ Le xojɔxo mɛ ejɛ byo Mawu ke na wasi onu bisese, onu bisese bo nyi etɔn, a na na Yesu a sɔgbe dogbɔn ayaɖuɖu mɛ, exin emɔ do hɛn ɛmɛ geɖegeɖe va gigo eton mɛ gbɔn Yesu kena nɔ ɖe hwlɛngan we omɔ sɔ xlɛ-ɛ ye lɔ ji. ¹¹ Ɖo Yesu kena nɔ sɔ ɛmɛ do wasi ɛmɛ Kinkwɛn i kpodo ɛmɛ kena e sɔ do wasi ɛmɛ kinkwɛn lɛye ye ɖo otɔ ɖokpo. Iwɛ ŋunya hɔn nɔ wɛ na e nɔ do yɔ ye tun nɔvyɔye. ¹² E bo lɔ nɔ lɔ byo:«Ko na nɔ lɔ i we xo na nɔvyee, ko bo na nɔ kanfu we le otogun ye mɛ.» ¹³ E mɔ lɔ lɔ byo:«Blɔ ko na de oji do Mawu wu, mɔ bɔ do ewu :«Bo kpo vikpɛ ke Mawu na ye.» ¹⁴ Kena vikpɛ xin lɛye bi nyi gbɛtobo ɖo gbaza kpodo ɛhun kpo, Yesu can trɔ zun gbetɔ bo do ɛhun ɖi yeton ha, exin do gbɔn oku kena e ku mɛ, e hu ɛcɛ na lɛgba ke si oku we hɔnhlɔn le, ¹⁵ e bo mɔ hwlɛn ɛmɛ kena vɔ na oku nɔ gbɔɔn bo va trɔ zun kannumyɔ le ɛgbɛ yeton bi me ye gan. ¹⁶ Le xojɔxo mɛ e hɔn nyi Ɛwɛndoto Mawutɔnye wu hwen e va kpedo o, vɔ, Ablaxamu we jijimɛviye wu wɛ eva kpedo. ¹⁷ I wɛ dɔn e ɖo na trɔ a mɔ le ɖi nɔvyɔ lɛye ha le omɔ ɖekpokpwe nu, exin emɔ do nyi avɔsantɔye we ga dɔŋuɖunu kpɔn na ɛmɛtɔ kpodo ogbejinɔtɔ le odan kena e wa na Mawu no ye mɛ, a mɔ do tutu otogun etɔn we onunyinyla ye tɛ. ¹⁸ Ɖo kena elɔ tete gbɔn didokpɔn mɛ kpɔn bo se vivɛ, ehɛn e na kpedo ɛme ke na gbɔn didokpon mɛ nɔ ye wu.