¹ Le saan xoxoxo Mawu gbɔn oxolɔɖenyitɔ etɔnye ji do lɔ na mia dagbwɔye zɔn nɛmu nɛmu ɖe, gbɔn alɔkpa susu mɛ. ² Vɔ, le azan kpotwi kiye mɛ na mi va le ye, e gbɔn ovyɔ ji do lɔ oxo na mi. Ovi xin lɔ wɛ e sɔ do ɖo cinnɔ sɔtɔ na onu bisese, elɔ lɔ ke ji bɛ e mɔ gbɔn do ɖo ɛgbɛ lɔ. ³ Ovi xin lɔ wɛ nyi gigo Mawu tɔn we kinklɛn, onu ke na Mawu lɔ nyi pɛpɛpɛ wɛ enyi, e bo hɛn ɛgbɛ lɔ ɖo ote kpo do oxo etɔn we hɔnhlɔn kpo. Do onu nyinylan ye kena e sra ɛwu na gbɛtɔye vɔ, e va yi hlɔn onyi le aɖusi mɛ na xɔlu hɔnhlɔn bisesetɔ lɔ le sɛxwe. ⁴ Ovi lɔ hu gan ɛwɛndotɔ Mawutɔnye ɖo Mawu sɔ nyikɔ ke hugan ɛwɛndotɔye tɔn sɔ ni-i. ⁵ Le oxojɔxo mɛ, ɛwɛndotɔ nɛ lɛ Mawu lɔ na byo:« Ovi tɛye wɛ onyi, bɛ sɔn egbe bo wɛ nyi we?» Alo ɛwɛndotɔ nɛ lɛ e lɔ na kpɔn byo:« Blɔ ko na nyi otɔ ni-i, elɔ mɔ nyi ovi na?» ⁶ Ganke hwekenu na Mawu sɔ ovyɔ tantyɛn lɔ sɔ ɖodan ɛgbɛ lɔ mɛ, e lɔ lɔ byo: «ɛwɛndotɔ Mawutɔn bisese ni do onu do ni» ⁷ E ke kan ɛwɛndotɔ Mawutɔnye, e lɔ lɔ byo: Mawu nɔ sɔ ɛwɛndotɔ etɔnye do trɔ jɛhɔn bo nɔ sɔ odansɔvi etɔnye nɔ do trɔ ozoɖɛye.» ⁸ Vɔ elɔ do ovi lɔ wu tun byo:« Ô Mawu! Xɔluzinjpwe tɔwe xinnɔnyi do onu jijwɛ wiwa ji. ⁹ Onyi wan na onu jijwɛ bo gbɛ onu nyinyla wiwa i wɛ dɔn Ô Mawu! Mawu tɔwe can we bo kɔn bo kɔn jijwɛ kpinkpɔn we ami do ota na we, e can we le hadwe tɔwe ye mɛ.» ¹⁰ E mɔ lɔ lɔ byo:« Xwetɔ Mawu, i wɛ ɖo nyidan sɔn titɔ eji gbɔn jiŋukunsin bo bo nyi onu kena o sɔ alɔ tɔwe do wasi. ¹¹ Onu xinye bi hɔn mɔ va le nɔ, vɔ lɔɔ, o ma nɔ nyi tɛgbɛ. Onu xin lɛye mɔ doxo seŋu le ɖi awu ha, ¹² o na xa ye ɖi kena ye nɔ xa avɔ ɖaxo ɖaxo ɖoha ye mɔ ɖɔli ɖi awu lɛgbɛ, vɔ, lɔɔ ke ole jɛn wɛ ole tɛgbɛ, ɛgbɛ tɔwe ko ɖo o do.» ^{13 14} Ɛwɛndotɔ Mawutɔn lɛye, gbigbɔ jɛn hwɛn ye mɛ bi nyi, ye bo le a do sɔ odan na Mawu wɛ? Mawu nɔ sɔ ye ɖodan ye mɔ do ve kpedo ɛmɛ ke na kpɔn hlɛnganye wu.