¹ Oxwe wenɛ godo, ko mɔ va trɔ yi Jeluzalɛmu ke, blɔ kpodo Banabasi, ko bo kplɔ Titu can do yi. ² Mawu wɛ ɖe onu ɖe sɔ xlɛ-ɔ, i wɛ dɔn na ko do yi Ɛwɛn Nywɛ ke ko jla nɔ le ɛmɛ ke ŋukunsi le eji le agun lɔ mɛ ye, bo ɖe emɛ na ye. Ɖo ko hɔn jlo tun odan ke ko wa nɔ syɛ a nyi vɔvɔ. ³ Yi wɛ Titu ke xodo, e ko nyi Jwifu, ɛmɛ ti hɔn zin e ji tun ni mɔ gbo ada can. ⁴ Vɔ nɔvi xɔsetɔ ojokantɔ ke ɖyɛ míamɛ ye jlo na gbo ada ni-i. Ɛmɛ xin lɛ ye wa yɛmɛnu bo dyɛ ogbɛ míatɔn mɛ, a do kan onu do do vivo ke mi ɖo le Klisu mɛ wu, a bo mɔ do dɔn mi do sɔ va do kannumyɔ na Jwifuye we osɛn lɔ. ⁵ Mi hɔn yi ogbe gbɔɔn do na ye ŋumɛ ti kanŋukonu, e xin mi mɔ do hɛn Ɛwɛn Nywɛ lɔ we xojɔxo ɖo ote na mi. ⁶ Vɔ ke nyi ɛmɛ ke ŋukunsin le e ji ye tɔn, le xojɔxo mɛ onu ke ye nyi hwɛn le vivɛɖe na, ɖo Mawu hɔn nɔ can le ɛmɛye mɛ. Ɛmɛ ke na ŋukunsi le e ji xin ye hɔn zin onu bu ɖe do jiye. ⁷ Ye trɛ kpɔn tun, Mawu mɛ o sɔ Ɛwɛn Nywɛ lɔ jijla na ɛmɛ ke hɔn nyi Jwifuye sɔ do asi na ɖi kena e sɔ Jwifuyetɔn sɔ do asi na Piyɛ do ha. ⁸ Ɖo Mawu ke sɔ Piyɛ do ɖo Ɛmɛdindɔn na Jwifuye, elɔ lɔ ke wɛ sɔ bo can do ɖo Ɛmɛdindɔn na ɛmɛ jke hɔn nyi Jwifuye. ⁹ Jaki, Sefasi kpodo Jan ke ye nɔ kpɔ ɖi gundotin ye ha le agunl:o mɛ ye, ye kpɔn onu jɛ e wu tun Mawu mɔ so odan kpatakli ke lo mɔ sɔ do asi na, i wɛ ye na alɔ gbo kpodo Banabasi bo do ɖe xle tun mi mɔ le okpɔ, e xin miye mɔ yi ɛmɛ ke hɔn nyi Jwifuye kɔn. ¹⁰ Onu ke ye byɔ mi jaan wɛ nyi tun miye mɔ ɖoŋu do ayanɔye wu, ko bo kpeŋu do e xin lɔ wu nywɛɖe bo wasi-i ¹¹ Vɔ hwekenu na Sefasi va Antiyɔci, ko gbɛ onu ni-i le ɛme bisese we ŋumɛ, ɖo ɛhwɛ etɔn gu. ¹² Ɖo gbɔxwe na ɛme ke Jaki dɔn ɖodan ye na va? Sefasi nɔ ɖu onu kpodo nɔvi xɔsetɔ ke hɔn nyi Jwifuye, vɔ ke ɛmɛ lɛye va va, e vɛ ci ovo na ye, e ko mɔ nɔ ɖu onu lɔ kpodo ye, ɖo e vɔ nɔvi Jwifu ke no lɔ tun ye mɔ ɖo na gbo ada ye nɔ. ¹³ Nɔvi Jwifu gbokpwe ye can bo jɛ ɛyɛmɛnu xinlɔ wiwasi ji ɖi elo ha, gbɔɔn ye bo dɔn Banabasi tete can do ɛyɛmɛnu wiwa yetɔn xinlɔ mɛ. ¹⁴ Vɔ ke ko kpɔn tun ye mɔ hɔn zɔn do Ɛwɛn Nywɛ lɔ we xojɔxo ji nɔ tututu byo:« Na lɔ ke nyi Jwifu, nɔ zan ɛgbɛ nɔ ɖi ɛmɛ ke hɔn nyi Jwifu ha, o ko nɔ wa onu ɖi Jwifu ha, naɖe lɛ o na zin ɛmɛ ke hɔn nyi Jwifuye ji tun ye mɔɔ zan ɛgbɛ ɖi Jwifuyetɔn ɖo ha?» ¹⁵ Miye, Jwifu vi jijiye wɛ mi nyi, mi ko nyi onu nyinyla watɔ ke hɔn nyi Jwifuye, ¹⁶ ganke mí bo nywɛ tun e mɔ hɔn nyi osɛn ji zinzɔn gbɔn hwɛn dɔn na Mawu na do kpɔn gbɛtɔ ɖi ɛmɛ jijwɛ ha, vɔ dogbɔn xɔse ɖiɖo do Yesu Klisu ji mɛ jaan wɛ, miye can mi kan do Yes Klisu lɔ ji, na Mawu a do kpɔn mi ɖi emɛ jijwɛye ha dogbɔn xɔse ɖiɖo do Klisu lɔ ji mɛ e ko nyi do gbɔn osɛn ji zinzɔn gbɔn mɛ hwɛn, ɖo Mawu hɔn sɔ ɛmɛ ti do kpɔn ɛmɛ jijwɛ do osɛn ji zizɔn gbɔn wu nɔ. ¹⁷ Vɔ ɖe na mi kan nɔ tun Mawu a sɔ mi do kpɔn ɛmɛ jijwe gbɔn Klisu ji, e mɔ va nyi tun onunyinylatɔ wɛ ye va sɔ miye can do kpɔn ɖe, hun Klisu lɔ na do nyi odansɔvi na onu nyinyla wɛɛ? Gbeɖe kpɔn! ¹⁸ Ɖo, na e nyi tun osen ke ko hɛn gba wɛ ko mɔ trɔ jlaɖo nɔ, hun botete wɛ trɔ zun osɛn ji daletɔ. ¹⁹ Vɔ le osɛn lɔ we akpaji, onukuku wɛ ko nyi na osɛn lɔ, a do nɔ ɛgbɛ na Mawu. Ye ka-an do otinsoga lɔ ji kpodo Klisu. ²⁰ Syɛ, e hɔn mɔ nyi bo hwɛn le ɛgbe, Klisu wɛ le ɛgbe le blɔ mɛ. Ɛgbɛ ke ko le syɛ le gbazamɛ, ko zan-ɛ nɔ dogbɔn xɔse ke ko ɖo do Mawu we vi lɔ ji mɛ, elɔ ke yi owan na-a, bo sɔ eɖe sɔ na do ota na-a. ²¹ Ko hɔn gbɛ Mawu we Ɛfɛnu lɔ, ɖo na e nyi tun osɛn lɔ wɛ na dɔn na ye na do nyi ɛme jijwɛ, hun vɔvɔ wɛ Klisu ku.