¹ Blɔ Pɔlu ke ɛgbɛtɔye hɔn sɔ do ɖo Ɛmɛdindɔn, ko ko sɔn gbɛtɔɖe kɔn, vɔ ko nyi Yesu Klisu we ɛmɛdindɔn kpodo Mawu otɔ lɔ ke fɔn-ɛ sɔn oku we ɛmɛdindɔn. Bɔ wɛ wlan wema ke do dan mi nɔ. ² Bo kpodo nɔvi xɔsetɔ ke le kpo-o ye bisese, wɛ o sɔ weme ke sɔ ɖodan mi mɛ ke le Galati we kansinmɛ ye nɔ. ³ Mawu miatɔ kpodo Xwetɔ míatɔn Yesu Klisu ni na mi ɛfɛnu kpo fifa. ⁴ Elɔ ke sɔ ɛgbɛ etɔn so na do onu nyinyla míatɔnye ta a bo do yi mí le ɛgbe nyinyla egbetɔn ke si, ɖi ke na Mawu míatɔn lɔ tete jlo ɖo ha. ⁵ Gigo ni nyi etɔn sɔn Mavɔ mɛ. ⁶ E kpaca do tun mi yawu lɛ ɔ le ɛtɛ na eme ke yɔ mi dogbɔn Klisu we ɛfɛnu lɔ ji, bo do sin ɛwɛn nywɛ bu kɔn. ⁷ E hɔn nyi tun ɛwɛn nywɛ ɖe hwɛn, vɔ ɛmɛ deye jaan wɛ le bo hlu mi dewu nɔ bo nɔ jlo na tɔ otate na Klisu we ɛwɛn nywɛ lɔ. ⁸ Vɔ, na ɛmɛ ɖe va jla Ɛwɛn Nywɛ bu ke gbɔnvo na ke na mi o lɔ na mi ye tete wɛ o, alo Sɛxwe we Ɛwɛndotɔ ɖe wɛ o, nudo ni jɛ eji! ⁹ Mi o lɔ na mi saan , ko bo mɔ lɔ na mi nɔ syɛ tun byo na ɛɖe va jla Ɛwɛn Nywɛ bu na mi, e bo gbɔnvo na ke mi o yi ogbe na saan, nudo ni jɛ e ji. ¹⁰ Syɛ ɖe, gbɛtɔye ni kanfu wɛ ko kan nɔ loo, alo Mawu a kanfu-u? Ko kan nɔ tun ma jɛŋu na gbɛtɔye wɛɛ? Na ko do gbɛ kan nɔ tun ma jɛŋu na gbɛtɔye, hun be ko hɔn Klisu we odansɔvi nɔ. ¹¹ Nɔ̀vye xɔse tɔye ko jlo na mia nywɛ tun Ɛwɛn nywɛ ke ko jla hɔn sɔ gbɛtɔye kɔn, ¹² ko hɔn yi-i gbɔɔn bo do kplan-ɛ sɔn gbɛtɔ ɖe kɔn can, vɔ Yesu Klisu wɛ ɖe sɔ xlɛ-ɔ. ¹³ Ɖo mi nwyɔ ɛgbɛ ke ko nɔ zan saan, le hwekenu na ko le Jwifuye we sɩnsɛn mɛ,ko nɔ ɖ ofun na Mawu we agun lɔ nyinyla tɔn, bo kan na vɔ okun ni-i. ¹⁴ Le Jwifuye we sinsɛn lɔ mɛ, ko le ŋukɔn taŋu na Jwifu susu ke ɖo oxwe tɛye ha ye, ɖo ko ɖo akpakpa ɖaxo ɖe na dagboye we kɔtanuye. ¹⁵ Vɔ hwekenu na ɛmɛ ke ɖe-o do ovo sɔn naye we dɔmɛ gbɔn, bo yɔ kpo ɛfɛnu, kpɔn tun e mɔ jɛ, ¹⁶ na do ɖe ovyɔ sɔ xlɛ le ɛgbɛ tɛye mɛ, na ma do jla ovi lɔ we oxo le ɛmɛ ke hɔn nyi Jwifuye mɛ, trololo, ko hɔn kan oxo ɛmɛ ti se. ¹⁷ Ko ko yi Jeluzamɛmu a do vɛ kpɔn ɛme ke o nyi ɛmɛdindɔn jɛ ŋukɔn na ye can, vɔ ko yi Alabi. E xin godo, ko trɔ va Damasi. ¹⁸ Oxwe atɔn godo, ko va yi Jeluzalɛmu a do nyɔ Sefasi ko bo nɔ ekɔ na ŋukɔnɖiɖe fɔtɔn. ¹⁹ Vɔ ko hɔn mɔ kpɔn mɛ ti zɛgbɔn Jaki ke nyi Xwetɔ lɔ novyɔ wu. ²⁰ Ko lɔ na mi nɔ le Mawu we ŋukɔn tun onu ke ko wlan na mi nɔ ke, mɔ hɔn nyi ojo. ²¹ E xin godo ko va yi Sili kpo Silisi we kansinye mɛ, ²² vɔ agun Klisutɔn ke le Jude ye, hɔn kpɔn ŋumɛ tɛye kpɔn can. ²³ Ye se tun ɛmɛye mɔ lɔ tun byo:« ɛmɛ ke nɔ ɖe ofun na mi saan lɔ, o jla xɔse ke e ba na gu okun na nɔ saan lɔ we Ɛwɛn Nwyɛ nɔ.» ²⁴ Ye bo nɔ kanfu Mawu do ota tɛye mɛ.