¹ Ɛmɛ vivɛ tɛye Tewofili, le wema tantyɛn kena ko wlan mɛ, ko lɔ oxo do onu bisese kena Yesu wasi kpo onu kena ekplan ɛmɛye sɔn titɔ eji wu, ² gbɔɔn do yi gankemɛ na e sin sɛxwe, vɔ, keŋu gbɔxwe e na do sɔn, e do ɛwɛn gbɔn Gbigbɔ kinkwɛn ji na ɛmɛdidɔn kena e o can ye. ³ Kena Yesu ku bo fɔn vɔ, e sɔ eɖe sɔ xlɛ ɛmɛdindɔnlɛye, bo mɔ ɖe xlɛ ye gbɔn walɔ susu mɛ tun he mɔ le ɛgbɛ. Le ŋukɔnɖiɖe kanɖe we dodomɛ, e sɔ eɖe sɔ xlɛ ye bo nɔ lɔ oxo na ye sɔn Mawu we xɔluɖu wu ⁴ gbeɖokpo, hwekenu na i kpo ye kpo le kpɔkpɔ, e mɔ flin na ye tun lɔ byo:« mi ka lɛ le Jeluzalɛmu we oto lɔ mɛ, vɔ mi nɔ ote kpɔn ajɔgbe ke ko fyan na mi lɔ, ke we oxo ko lɔ na mi». ⁵ Ɖo, Jan, Mawu we ɛxin wɛ e lɛ na ɛmɛye nɔ, vɔ le zanɖe syɛ Gbigbɔ Kinkwɛn wɛ ye na sɔ do lɛ Mawu we ɛsin na mi. ⁶ Ɛmɛ xinlɛye, ke kpo ekpo le kpɔkpɔye, bo kan-ɛ se nɔ tun byo:« hwe xin lɔ nu wɛ o na mɔ trɔ gba Izrayɛli we Xɔluɖuɖuto lɔ?» ⁷ Yesu bo ɖ'ewu na ye byo:«Miye hwɛn na nyɔ oganxixo kpo azn ke na Mawu Otɔ lɔ ɖo ye kpo ɛcɛkpikpa etɔn. ⁸ Vɔ mi na va yi hɔnhlɔn ɖe gankemɛ na Gbigbɔ kinkwɛn na va jɛ ote do mia ji, mi na va nyi kunnu ɖetɔ tɛye le Jeruzalem we toxomɛ, le jude we kansin lɔ bi mɛ, le Samali we kansinmɛ, gbɔɔn do ve jɛ ɛgbɛ lɔ we vivɔnu.» ⁹ Ke Yesu lɔ oxo xin lɔ na ye vɔ, ye bo kpwɛn nɔ, Mawu bo kwɛ do sin sɛxwe, e bo ɖyɛ sunwɔ mɛ bo bu le ŋumɛ na ye. ¹⁰ Hwekenu na ye gbɛ kpɔn jihwe nɔ, ŋusunglo owe ɖe ye tɔn do ŋumɛ na ye bo do onu wewe pepepe, ¹¹ bo lɔ na ye tun lɔ byo:« Mi Galiletɔye, ŋunɛ jɔ na mi do ci otè le blɛ bo do kpɔn jiŋukunsin nɔ ɖ'emɔha? Yesu xin lɔ ke Mawu kɔ do sin sɛxwe xin, ɖ'emɔ ke wɛ e na mɔ trɔ va ɖo.» ¹² Yesu we ɛmɛdindɔn lɛye lɛkɔ, bo zɔn afɔ sɔn oso ke ji na olivutin le gbɔɔn bo do va yi ke tɛkpɔ Jeruzalemu na kpintin ɖokpo ha. ¹³ Ke ye gbɔn vɔ, ye sin singbo ɖe ji, ye boo nɔ kple le blɛ lɔ san. Ye ɛmɛ ke le oxɔ lɔ mɛ ye xɛn: Piyɛ, Jan, Jaki, Andle, Filipu, Toma, Batelemi, Matye, Jaki ke nyi Alufe we ovi, Sinmɔ ɛhwɛyina ototɔ, kpodo Jwidi Jaki we vi. ¹⁴ Ye mɛ bisese nɔ kple do kpɔkpɔ le oganɖekpokpwe mɛ a do xo ɛɖɛ le ogbenɔkpɔ mɛ, ye kpo do nyɔŋusiye, Malya ke nyi Yesu onɔ kpo Yesu nɔviɔye. ¹⁵ Gbeɖokpo, ye ɛmɛ ke nɔ kple lɛye yi kantɔn emɔha (120), Piyɛ bo cite, bo lɔ na ye byo: ¹⁶ «Nɔviyee, oxo kena Gbigbɔ Kinkwɛn lɔ le Mawu we oxo mɛ dogbɔn Davidi ji sɔn Juda wu, e ɖo na cɛ. Juda lɔ wɛ bo nɔ ŋukɔn na ye do wle Yesu. ¹⁷ Juda lɔ le mia mɛ san, mi bo nɔ wa Mawu we odan do kpɔkpɔ, ¹⁸ vɔ ke e yi onu nyinyla ke e wasi we oho, e ve xɔ ogle ɖe. Ogle xin lɔ mɛ wɛ e flɛ le bo jɛ onyi do adɔji, adɔ etɔn bo gba dɔvi etɔnye bo kɔn do ŋidan mɛ. ¹⁹ Jeruzalɛmutɔye bisese ye se oxo lɔ. I wɛ dɔn na ye do ɖo ŋikɔ na ogle xin lɔ le ogbe yetɔn mɛ tun Akɛlidama, gɔnmɛ etɔn wɛ nyi ɛhun we ogle. ²⁰ I wɛ dɔn e nyi wiwla le ohanjiji we wema mɛ tun byo: "oxwe etɔn ni ci vɔvɔ, mɛti ni ko mɔ nɔ oxwe etɔn gbe. Ye bo mɔ wlan tun byo: mɛ bu ni ɖɔli-i. ²¹ Mɛ ke zɔn kpo mí le ogan ɖekpokpwe mɛ ke na Xwetɔ Yesu do le kpɔkpɔ kpo mí do kplɔ mí nɔ, ²² sɔn hwekenu na Jan nɔ lɛ Mawu we ɛsin na ɛmɛye gbɔɔn do ve jɛ gbe ke gbe na Mawu kɔ Yesu lɔ do sin sɛxwe, e jɛ tun ɛmɛ ɖokpo le ɛmɛ xin lɛye mɛ a bɔ do míawu a do kpewu a ɖe kunnu sɔn Xwetɔ Yesu we finfɔn sɔn oku wu.» ²³ Ke na Piyɛ lɔ emɔ vɔ, Yesu kplɔ ɛmɛ owe kiye do va Basabasi kena ye nɔ yɔ tun Jutusi, alo Jozɛfu, kpo Matyasi. ²⁴ Ye ɛmɛ bisese bo xo ɛɖɛ lɔ tun:« Xwetɔ, iwɛ nyɔ ɛmɛ bisese we oji ɖe ɛmɛ ke na can sɔ xlɛ mi le ɛmɛ owe klɛye mɛ, ²⁵ ɛmɛ lɔ bo na trɔ zun ɛmɛdindɔn tɔwe, a bo do wa odan kena Juda jodo bo do si-in ofi ke nyɔ ni-i.» ²⁶ Ɛɖɛ xin lɔ we godo, ye wasi ovoɖiɖi (akandido) e bo ve jɛ Matyasi ji, elɔ lɔ wɛ va bɔ do ɛmɛdindɔn weɖokpo lɛye wu.