¹ Blɔ Piyɛ Yesu Klisu we ɖansɔvi ko wlan we ma ke ɖo ɖan ɛmɛ cican Mawu tɔnye ke le gbeji , ke le kansin kye mɛ : Pon, Galasi, Kapadɔsi, Azi kpoɖo Bitini. ² Mawu tete can mi ɖo ke na itete lɔ ɖo ha, mi bo nyi ɛmɛ cican e tɔn ɖogbɔn gbigbɔ etɔn we onu wiwa mɛ. Na mia ɖo se tonu na ovyɔ Yesu Klisu. Wɛ ɛhun ovilɔ tɔn na srɛwu nami. Mawu we ɛfɛnu kpoɖo fifa etɔn kpo ni nɔ kpɔ kpo mi. ³ ɛkpɛ na Mawu otɔ na xwetɔ miatɔn Yesu Klisu, le ɖɔŋu ɖunu kpikpɔn ɖaxo etɔn mɛ ɖoɖanmi kena na ye trɔ mi ji yɔyɔ gbɔn Yesu lɔ we fɔn sɔnku mɛ na miɖo ɖo omɔ kpikpɔn ɛgbɛ-ɛgbɛ. ⁴ A bo ɖo tre kpɔn cinɔ ke hɔn nɔ gu, glɔɔn aɖo ɖo oɖyu, e ko mɔ nɔ klo, cinɔ xilɔ bo le te kpɔnmi le sɛxwe. ⁵ Xɔsɛ mɛ wɛ mikpɔn alɔ ɖacɔn le, na hwlɛn gan ke osɔgbe ke na va nyi ɖiɖexlɛ le ganxixo kpotwi lɔ mɛ. ⁶ I wɛ ɖɔn syɛ na ɖiɖokpɔn hamɛ. Hamɛ ye na mɔ ɖoɖo vivɛsise na mi, na oganxixo ovi-iɖe can, jijwɛ kpinkpɔn ɖaxo ni nyi miatɔn. ⁷ ye nɔ hɛn sika gbɔn ozomɛ co e bo nɔ va gu. Emɔ ha ke, onu ɖiɖi miatɔn ke vɛ oho hugan sika, nagbɔn ɖiɖokpɔn mɛ, ye mɔ ɖo kpɔn kena eliɖo ɖo. ⁸ Mi hɔn kpɔn-ɛ kpo co mi bo nyi owan ni-i, le syɛ can, mi ɔn, vɔ mi bo ɖo xɔse ɖo eji, iwɛ ɖɔn na mi le jijwɛmɛ ganji, onu ko kpewu na lɔ can. ⁹ Ɖo xɔse ke miɖo, wɛ ɖɔn okla miatɔn ɖo kpɔn hwlɛngan. ¹⁰ Ogbe ɖotɔ ke lɔ oxo ɖo Mawu we ɛfɛnu ke ejlaɖo ɖo onyi na mi lɔ wu, ye kan ɖo se bo kan oxo se kito-kito do hwlɛn-gan xinlɔ wu. ¹¹ Ye ɖo hɔnhɔn taŋu aɖo nyɔ we kenu kpo ɖo kena onu kena Yesu we gbigbɔ olɔ nɔ ye, na jɔ ɖo. Gbigbɔlɔ le ye mɛ, bo lɔ ɖenyi tun Klisu mɔ na ɖu aya le vivɔnu, e bo na va yi gigo etɔn. ¹² Mawu ɖe xlɛ ogbeɖotɔ lɛye tun oxo kena e sɔ ɖo asi naye lɔ mɔ hɔn nyi ye tete tɔn o, vɔ miyetɔn mɛ mɔ nyi oxo xinlɔ. wɛ ɛwɛnnyɛn-jlatɔye va lɔ na mi syɛ kpodo gbigbɔ mimɛ we hɔnhlɔn kena sɔn sɛxwe. oxo xinlɔ ke wɛ Mawu we ɛwɛnɖotɔye jlo na lɔ taŋu. ¹³ I wɛ dɔn ayixa miatɔn ni nɔ ogbesisɔ a do wa onu, mi nɔ aceji! omɔ kpinkpɔn miatɔn bi ni nɔ ɛfɛnu kena mi na va kpɔn ji le hwekenu Yesu Klisu na va ɖe eɖe sɔ xlɛ. ¹⁴ Ɖi vikpɛ tonusetɔye ha, mi ka mɔ zɔn do ojlo kena miɖo san ye ji le manywɛ we hwenu. ¹⁵ Vɔ ɖi kena mawu kena yɔ mi lɔ nyi ɛmɛ mimɛ ɖo, mye can mi nyi ɛmɛ mimɛ ie onu wiwa miatɔn ɖekpokpwe mɛ. ¹⁶ Ɖi ke ko nyi ɛmɛ mimɛ ɖo, mye can mi nɔ mimɛ ji. ¹⁷ Na enyi tun Mawu ke hɔn nɔ nɔ ɛmɛ ɖe ji, bo nɔ ɖo kojo gbesisɔtɔn, e ko nɔ zin ɛmɛ ji, wɛ mi yɔ tun otɔ le ɛɖɛ xixo miatɔn mɛ, hun mi bo vɔ ɛ le ganxixo gbokpwe ke drɔn na mi le nyidanji ye mɛ. ¹⁸ Mi nywɛ tun, ehɔn nyi oho kpo sika ke nɔ gu, alo jijɔ gugu ke mi kplan le miatɔye kɔn mɛ hwɛn mi kpɔn hlwɛngan le. ¹⁹ Vɔ, gbɔn Klisu we ɛhun ke vɛho ɖi lɛngbɔvi ma ɖo oɖyuti mɛ wɛ mi kpɔn hlɛngan le. ²⁰ Kisu o nyi cincan gbɔxwe ɛgbɛ lɔ jɔ, vɔ syɛ le ganxixo vivɔnu kye mɛ, e ɖe eɖe sɔ xlɛ mi. ²¹ Gbɔn elɔ Klisu lɔ ji, mi ɖi onu na Mawu kena fɔn-ɛ sɔn oku bo mɔ ni-i gigo, na xɔse kpo omɔ kpinkpɔn miatɔn a do nɔ Mawu ji. ²² Ke mi lɛ okla miatɔnye we vɔ, exin lɔ wɛ nyi wannyiyi titeŋugbe ɖiɖo na miaɖeye le ɖokpo wiwasimɛ, e le emɔ ha, mi bo nyi wan na miaɖe kpo oji miatɔn bisese, ²³ oxonugbo, mi kpɔn vɔji yɔyɔ, e ko nyi onukun ke nɔ ku ji hwɛn mi gbɔn, oxo ɛgbɛtɔn ke nyi mavɔ-mavɔ Mawu tɔn lɔ wɛ dɔn. ²⁴ Gbaza gbɛtɔ tɔn le ɖi ogbe ha. Gigo etɔnbi bo le ɖi ɛsɛ ha, ogbe lɔ xu , i wɛ ɛsɛ lɔ flɛ. ²⁵ Vɔ Mawu we oxo lɔ le tɛgbɛ, oxo xinlɔ wɛ nyi ɛwɛn nywɛn ke ye do na mi.