¹ Blɔ Pɔlu, ke na Mawu yɔ gbɔn ojlo etɔn mɛ,

na ma do nyi ɛmɛdindɔn Klisi Yesu tɔn, bo kpo míanɔyɔ le xɔse mɛ Sosutɛnu do ogbe ɖodan mi.

² Ko wlan wema ke ɖodan agun vi Mawu tɔn ke le kolɛnti ye, bo nyi ɛmɛ ɖe ɖo ovo le Klisi Yesu mɛ ye, Mawu wɛ bo yɔ ye na ye a do zan ɛgbɛ kinkwɛn; ko bo mɔ wlan-ɛ nɔ na ɛmɛ bi ke ofi ɖekpokpwe, bo nɔ yɔ Xwetɔ míatɔn Yesu Klisi lɔ we nyikɔ, ke Xwetɔ yetɔn bo mɔ nyi míatɔn. ³ Na Mawu ke nyi otɔ na mí kpo Xwetɔ Yesu Klisu we ɛfɛnu kpo fifa ni nɔ kpo mi. ⁴ Ko nɔ do ɛkpɛ na Mawu tɛye nɔ tɛgbɛ do ota miatɔn mɛ do ɛfɛnu ka e na gbɔn YesuKlisu lɔ mɛ wu. ⁵ Ɖo, ke mi le Klisi lɔ mɛ, Mawu sɔ onu nina bi sese do do dɔkun na mi: le ota ji, onu nina oxo lilɔ tɔn kpo onunyinyɔ tɔn, ⁶ ɖo, kunnu ke ye ɖe na Klisi lɔ, e lido le mia mɛ ganji. ⁷ Gbɔn onu nina Mawu tɔn ti ko mɔ hwedo mi ɛmɛ ke le ote kpɔn hwekenu na Xwetɔ míatɔn Yesu Klisi lɔ na ɖe eɖe sɔ xlɛ nɔ. ⁸ Klisi lɔ tete we na hɛn mi ɖo ote gbɔɔn do yi vivɔ nu, exin ye ko mɔ kpɔ ko mɔ do kpɔn ofin ti le mia wu nɔ, le azan ke gbe na Xwetɔ míatɔn Yesu Klisi lɔ na va. ⁹ Ɖo Mawu ke yɔ mí, tun míye mɔ va nɔ kpɔkpɔ kpo ovyɔ, ke Xwetɔ míatɔn yesu klisi lɔ, Mawu ogbejinɔtɔ we e nyi. ¹⁰ Nɔviye mi, le Xwetɔ míatɔn Yesu Klisi we nyikɔ mɛ, ko byɔ mi nɔ syɛ tun miye mɔɔ ɖo ogbe kpɔ. Kinklan ni ká nɔ mia mɛ. Mi nɔ kpɔkpɔ, mia we susuye kpo tito miatɔnye mɔ nyi ɖokpo. ¹¹ Nɔviye mi, le oxojɔxomɛ, Klowe we hwedo we ɛmɛye lɔ na tun, aɖikanye mɔ le mia mɛ. ¹² Oxo ke na ko ba lɔ lɔ wɛ nyi tun: Le mia mɛ, ɛmɛye nɔ lɔ tun:« Blɔ Pɔlu tɔn wɛ ko nyi!» Ɛmɛ mɔ nɔ lɔ tun:«Apolosu tɔn wɛ ko nyi!» Ɛmɛ bu mɔ nɔ lɔ tun:« Blɔ Sefasi tɔn wɛ ko nyi!» Ɛmɛ bu mɔ nɔ lɔ tun: « Blɔ Klisi tɔn wɛ ko nyi!» ¹³ Oxo ke ko na kan mi sɛn: Klisi lɔ ɖe e ma wɛ? Pɔlu wɛ ye xwe do otinsokpoli ji do'ta na mi? Pɔlu we nyikɔ mɛ wɛ ye lɛ Mawu we ɛsin na mi le? ¹⁴ Ko do ɛkpɛ na Mawu tun ko hɔn lɛ yɛhwɛsin na ɛmɛti le mia mɛ zɛgbɔn Klisipusi Gayiyusi wu. ¹⁵ Exin, ɛmɛti ko mɔ do va lɔ nɔ tun nyikɔ tɛye mɛ mwɛ ye lɛ Mawu we ɛsin na mi le. ¹⁶ Aa! ko flin tun, ko mɔ lɛ Mawu we ɛsin na Sitefanasi we hwedo can. Zɛgbɔn ɛmɛ xinye wu ko hɔn mɔ ɖi tun ko mɔ lɛ Mawu we ɛsin na ɛmɛ bu ɖe. ¹⁷ Ɖo Klisi lɔ hɔn sɔ-ɔ sɔ ɖodan tun bo mɔ va yi lɛ Mawu we ɛsin na ɛmɛye, vɔ, na ma do ve jla Ɛwɛn Nywɛ lɔ wɛ dɔn. E ko lɔ na tun bo mɔ zan ɛgbɛtɔ we onunyinyɔ le oxo lilɔ mɛ, a do jla Ɛwɛn Nywɛ lɔ. E hɔn nyi emɔ, oku ke Kisi ku le otinsokpoli ji hɔn mɔ̀ ɖo hɔnhlɔn ti. ¹⁸ Le oxojɔxomɛ, oku ke Yesu ku le otinsokpoli ji we oxo ke mi jla nɔ lɔ, oklenɔxo wɛ enyi na ɛmɛ ke bu nɔ ye. Vɔ, xin lɔ Mawu we hɔnhlɔn wɛ enyi na mi ɛmɛ ke le hwlɛngan we omɔji ye. ¹⁹ Ye wlan le Mawu we oxo lɔ mɛ tun byo: «Ko na hɛn onunyinyɔ ke le onunywɛtɔye si gu, ko bo na gu okun na zinzin ke le zinzinnɔye si.» ²⁰ Ke e le emɔ ha ɖe, onu nɛ lɛ onunywɛtɔye, alo osɛnkplanɛmɛtɔ, alo oxolɔdoɛmɛwutɔ egbe tɔn ye mɔ na mɔ kpewu lɔ? Mawu o ɖe xlɛ tun onunyinyɔ ɛgbɛ mɛ bwɛ tɔn, okle mɔ wɛ e mɔ nyi. ²¹ Le oxojɔxo mɛ, do gbɔn onunyinyɔ ke ɛgbɛtɔye ɖo mɛ, ye hɔn kpewu do jisi Mawu le hwekenu na eɖe onunyinyɔ etɔn sɔ xlɛ. Iwɛ dɔn, e jɛŋu na Mawu tun e na gbɔn oklenɔ we oxo ke mí jla nɔ lɔ ji, a do hwlɛn ɛmɛ ke kan do eji ye gan. ²² Jwifuye nɔ kan tun ya a jrɛ onu na ye a kpɔn, Glɛkitɔye bo nɔ kan onunyinywɛ nɔ. ²³ Vɔ míye, Klisi kena ye kan do otinsokpoli ji we oxo wɛ mí jla nɔ. Oxo xin lɔ wɛ nyi afɔklɛnnu na jwifuye bo nyi oklenɔxo na glɛkiye. ²⁴ Amɔ, le ɛmɛ ke na Mawu yɔ ye we ŋumɛ, jwifuye wɛ, ɛmɛ ke hɔn nyi jwifuye wɛ, Klisu lɔ wɛ nyi Mawu we hɔnhlɔn kpo Mawu we onunyinyɔ. ²⁵ Ɖo Mawu we onu wiwa ke ɛgbɛtɔye nɔ sɔ do kpɔn okle ɖiɖi, onunyinyɔ ke le ɛmɛ hugan onunyinyɔ ke ɛgbɛtɔye ɖo. Emɔ ha ke, Mawu we onu wiwa ke ɛgbɛtɔye nɔ sɔ do kpɔn hɔnhlɔn ma ɖo, hɔnhlɔn ke le e mɛ, e hugan ɛgbɛtɔye we hɔnhlɔn. ²⁶ Nɔviye mì, mi kpɔn, mi mɛ kena Mawu yɔ ye, le ɛgbɛtɔye we onukpinkpɔn mɛ, onunywɛtɔ susu ɖe hɔn le gbɔɔn hɔnhlɔntɔ susu ti do le mia mɛ can. Ɛmɛ susus ko nyi ɛmɛ kena ŋukunsin le eji. ²⁷ Vɔ, Mawu can onu ke ɛgbɛtɔye nɔ kpɔn oklenɔ we onu, bo do do ŋunya onunywɛtɔye. Mawu bo mɔ sɔ onu ke wu na hɔnhlɔn hɔn le, bo do do ŋunya ɛmɛ ke ɖo hɔnhlɔnye. ²⁸ Mawu can onu ke ɛgbɛtɔye sɔ do kpɔn onu vɔvɔ, a bo kɔn acɔn do ewu, abo sɔ do yɔ onuti, e can bo do gba onu ɛgbɛtɔye sɔ dɔ kpɔn ounjɔnu do. ²⁹ Exin, ɛgbɛtɔ ti ko mɔ do kpewu nyi ogo nɔ le Mawu we kɔn ³⁰ Ɖo Mawu lɔ ke wɛ na na mi do le Yesu klisi mɛ. Klisi mɔ nyi onunyinyɔ ke sɔn Mawu kɔn na mi. Do gbɔn Klisi lɔ ji mí nyi ɛmɛ jijwɛ, bo nyi ɛmɛ ɖe ɖo ovo, mí kpɔn vivo le onunynyla si. ³¹ Exin, e mɔ do sɔgbe kpo oxo kena Mawu oxo lɔ ji, tun byo:«Na ɛmɛ ɖe na nyigo, ni nyi ogo le Xwetɔ Mawu lɔ mɛ.»