¹ Sonika kwa wanjo wa dibundu dia Sardes: ji ndaka jowu wakwata ji Pevi tshambwadi ja Nzambi ni tutumbwa tshambwadi. Niejiya yisalu yeyi, wudi ni kushikumuwa kwa kukhala ni moyi kashi wafwa. ² Tokama, kodisa yima yekha eyi ya zola kufwa kikuma nia mweniku mboti yisalu yeyi ku mesu wa Nzambi wemi. ³ He bambuka ku ama ma wa nonini, ni ma wevidi. Hangama, balula mutshima. Kashi wuvwa wa kebidiku, nia keza mudi mwiji, wa kejikoku tangwa dia na keza kudi ayi. ⁴ Kashi wudi ni kandambu khathu ha Sardes awa a lekidi kubwitisa miledi yowu. A ka kiba niami, akavwata pembi, kikuma ya wa lungila. ⁵ Owu wa kanunga wa ka vwata miledi ya pembi nia kajimoku jina diendji kumukanda wa moyi, nia kakudila jina diendji kutwala ya tata ni a Wandjo jendji. ⁶ Owu wudi ni matu leka evi ama Pevi yi kwakulanga ku mabundu. ⁷ Sonika kwa dibundu dia Filadelfia: tala zi ndaka jowu wudi wa vedila ni masonga. Wa ketshikina tshabi ja Davidi. Kivwua Wakanga Muthu mwekha kakukanguloku. ⁸ Niejika yisalu yeyi; nia kushila kisu kia kwanzulula, ata muthu kaku kikangoku. Niejiya etshi wudi ni ngolu ji tshotu kashi wa ngulekoku kashi wa lemvuka ku ndaka ya memi, wa lekoku jina diemi. ⁹ Tala awa edi munja Nzambi ya satana enda akuletshi edi a zuifi kashi keshiku, enda kudihuna. Nia kawa kaka kufukama kumwendu yeyi, akejiya etshi nia kuzola. ¹⁰ Kikuma wa kebidi tshiku yemi amiepi nia ka kubanjila mutangwa diajipashi ja kabwa mutotu yidi mukikuma kia kumeka athu a hashi. ¹¹ Ntama loni ni kwiza, kwata ma wudi namu kikuma muthu aleki ku kutambula kifumu. ¹² Nia kasha kudi owu wa ka nunga kunji munzu ya Nzambi wemi, kaka lendoku ku mu widika. Nia kasonika ha wulu dienji jina dia Nzambi wemi, jina dia vula dia tata (Yeluselemi dia katataka dia katuka kuwulu kudi tata) ni jina diemi dia katataka. ¹³ Owu wudi ni matu evi ama Pevi akulezanga mabundu. ¹⁴ Sonika kudibundu dia Laodise" tala awa akwakulanga kiene kina, ntemu wa kiedika, owu wenda kuyala mu yima yosu ya hangidi Nzambi". ¹⁵ Nijiya yi salu yeyi, wushiku thuya, wushiku mashika. Nia zola wu khadi homa thuya, homa mashika. ¹⁶ Kashi kikuma wudi lehu lehu, mashika lo, thuya lo, nia zola ku kuluka ku kanwa diemi. ¹⁷ Ki kuma wenda wa di leza ayi mweni: "ni di mvwama, ni di ni kimvwama kingi, nishiku ata ni funu ya kima kimoshi". Kashi wenda wa jimbangna etshi wudi mu wayi; mukwa lamba, mputu, kifwa ni khonga. ¹⁸ Yivwa milongi yemi: sumba kudi ami wola wa ku tshila ha thuya, kikuma wikhini mvwama ni miledi yitoka wu swasuki kudiwinda wuleki kumonika khonga. Nkishi ya mesu wu sumbi wu washi ki kuma wumoni. ¹⁹ Nienda nia longuka ni kulonga awa a nia zola, mutshindu a kulunga kujingila. Balula mutshima, lembama. ²⁰ Tala nia makhana ha kisu nienda nia kokuta. Mosu wa kevwa ndaka ya memi, wa nzulula, ni kwingila mundjiendji, ni kudia nendji mesa mamoshi. ²¹ Mosu wa ka nunga, nia ka muhwa kiyeka kia kushikama niami ha kifumu kiemi ki nianungini, ni ki nia shikama ni tata ha kitshi kiendji. ²² Owu wudi ni matu leka evi ma kwakulanga Pevi ku mabundu.