¹ Sonikina wanzio wa dibundu dia Ephese : Tala makwakulanga owu wa kwata tutumbwa tutanu ku kokhu diendji dia kitata. Uku kibanga mu kutshi ka yima ya wola tshambwadi ya kulemishina minda wenda wakula etshi: ² Niejiya yiisalu yey ku kumbulai, kisalu kieyi kiangolu ni kulembama kweyi, ni etshi wukulendoku ku kumbula athu abola, ni etshi wa paka kadi athu awa enda kwakula etshi edi athumwa kinga lo, ku manimma wa mweni etshi edi athumwua akhubidi. ³ Wenda kukasa mutshima, wadihana kikuma kia jina diemi, wa lembwoku. ⁴ Kashi, nienda niakunona kubola kudiambu edi: wa leka zola edina dia thethi. ⁵ Henihohu, bambuka ha wa khedi ku twala ya kubwa, balula mutshima, hanga yisalu yi wakhedi kadi ku hanga. Kidi loni, nia keza ku diayi, nia ka katula kima kieyi kia kushila mwinda homa hohu, katula kaka wiva walumuna mutshima. ⁶ Kashi widi ni diambu edi dia pimbu dia; wenda kumenga yisalu ya ka dibundu ka Nikola, mudi kia nenda kuyimenga ami. ⁷ Leka muthu wudi ni matu evi mambu ama pevi yikwakulanga ku mabundu; Muthu wa kamenga na ka muhwa njila ya kudia ji mbuma ja mutondu wa lujingu, owu wudimu paladisu dia Nzambi. ⁸ Sonikina wanzio wa dibundu edina didi ku Simirne etshi; Muthu wa thethi ni wa tsuka, owuna wa fidi wa futumuka muluzingu wenda wakula etshi: ⁹ Niejiya pashi jieni ni kiwayi kieyi,- kashi wudi mvwama - Ni kusaula ya athu enda kuditambika Ayuda kashi eni athu eshiku Ayuda edi kikanda dia satana. ¹⁰ Wivwoku woma wa mambu ma wa kawanina namu. Hinikina! Satana wa kabula kusha athu ekha mu katshi kenu mu boloku, mu kumeka lukwikilu lwenu. Nwa kamona pashi yilumbu kumi. Kwata lukwikilu tii ku lufwa, he nia ka kuhwa puwa ya kifumu kia lujingu. ¹¹ Leka owu wudi ni matu evi mambu amana madi kwakulanga pevi ku dibundu: mosu wa kanunga lufwa lwa kiadi lwaka mwijilokwepi. ¹² Sonikina wanzio wa dibundu dia Pergame: muthu wudi ni poku mwela wenda wakula etshi: ¹³ ha wenda kukhela, satana washa kitshi kienji kia kifumu hena hana; kashi ayi wa kwikila kadi ku ami thama. Nualediku klukwikilu lwenu ata tangu dia nwa jiyidi Antipas mbikudi wenu wa kiedika kudienu kwa shikama satana. ¹⁴ Ata kioki, nia kumona kubola ku mambu ama Wudi okuna ni athu enda kulaba malongi ma Balami, owu wa longidi mu kusha kima kienda kubwisa athu mu masumu ku mesu ma ana a Yiseledi, kikuma adi yima eyina ya hanini kimenga ku iteki ni kuhanga yizumba. ¹⁵ Pila yimoshi, ni enu, mukatshi khenu midi niathu edi adi hana kamu mu malongi ma dibundu dia Nikolayite. ¹⁶ Henihohu, balula mutshima weyi ! kivwa lo ni kwiza swalu kudi eni, mukunu jiya ni poku ya mwela yidi kuwidikanga mukanu dia memi. ¹⁷ Leka muthu owuna wudi ni matu evi mambu makula Pevi ku mabundu : kudi muthu wa ka nunga nia ka muhwa mana, ni yala ditoka, ha wulu dia yala a sonika jina dimoshi dia katataka didi diejiangana owu wa muyamba. ¹⁸ Sonikina wanzio wa dibundu edina didiha Tiatira etshi: mwana Nzambi owuna wudi ni mesu mudi thuya tu kulebukanga, owu miendu yenji yidi mudi kibende kia ntalu dia wu kheti wenda wakula etshi: ¹⁹ Niejiya yisalu yeyi, zola dieyi, lukwikilu lweyi, kisalu kieyi, ni kukasa mutshima weyi ni etshi yisalu yeyi ya tangwa edi ya hita eyina yikulu. ²⁰ Ata kioki nienda nia kumona kubola ku diambu edi: wenda wa kumbula mukhetu owu Yizabela, owu wenda kuditambika mbikudi, wenda kulonga ni kuhuna ahika jemi mu kuhanga yizumba ni mu kudia yima eyina ya hana owu kimenga kuyiteki. ²¹ Nia muhwedi tangwa kikuma abaludi mutshima kashi ka zodidiku kwalumuna mutshima ku yizumba yendji. ²² Hunikina! Nia zola kumukonga kumuhela wa makhashi ni ku konga athu awana enda kukonga yizumba ni mweni mupashi yingi, katula kasu wuvwa alumuna mutshima mu yisalu eyina ya wa pushidi mu kuhanga . ²³ Nia kajiya ana jienji ni makhashi amana menda kujiyana, kikuma mabundu mosu makwijiya etshi nidi muthu owu wenda kufimbangindu jia mukatshi kamu ni mutshima nia kahwa kosu muthu mukatshi kenu mukutadila yisalu yendji ²⁴ Kashi, nienda nia nu leza enu athu ekha awana edi ku Tiatire athu osu awana aku lekanga kulaba malongi ama, athu awa aleka kwijiya mambu mendowu kutambika mambu ma kobuka na Satana. Nia nu shididiku kilo kiekha ha hulu dienu. ²⁵ Kashi kwatenu kiangolu mambu amana ma nudi namu tii koku na kejila ²⁶ Muthu owuna wa kanunga ni wa ka laba yisalu yeni tii ku tshuka nia ka muhua kiyeka kiosu ha wulu dia makanda . ²⁷ Ni wa ka khokhula athu ni mutondu wa wutadi he a ka yatuka mudi mabungu ma mavu kioki na nona tshidi kudi tata. ²⁸ Kioki nia nonini kudi tata, nia ka muhua epi katumbwa ka bwididi. ²⁹ Owu wudi ni mathu evi ma kwakulanga Pevi ku mabundu.