¹ Ku manima ma mambu menama, nievidi ndaka mu wulu mudi ndaka ya hunji diathu akulanga etshi:" Aleluya, mboti , khembu ni ngolu yidi ya Nzambi wetu. ² Nzengulu jenji jidi ja masonga ni kiedika kikuma wa zengididi ndumba mujima owu wa zangidi mavu ni wunzweji. Wa vutudidi thaba kumoshi ma asadi jendji ma tshakidi enjimweni". ³ Akudidi mu mbala ya kiadi etshi: " Aleluya! mwishi wa kandukidi kwa mweni pila lo. ⁴ A khakha makumi madi ni awana ni yigangu yiwana ya Nzambi a dikulumunini a kumisa Nzambi wa khedi wa shikama ha kitshi kia kifumu, Akulanga etshi: " Kienikioki, aleluya!" ⁵ He ndaka yimoshi ya katukidi ku kifumu ni kwakulanga etshi: " Kumisenu Nzambi wetu, enu osu asadi jendji, enu nwenda ku mubanga, alengi ni a mambuta". ⁶ Mu kulaba, nievidi ndaka mudi yathu lawu, mudi mayema ma mahuhwa ni mikumuni ya anzaji yi kwakulanga etshi: " Aleluya, fumu Nzambi wetu , wa yala yima yosu, wa yala" . ⁷ Tuseyilenu, twivenu kieshi, tumuhwenu khembu kikuma wala wa finama, mukhetu wendji weza". ⁸ A muhwedi njila mu kuvwata leni wu ku kedianga, ya wukhedi, wa pimbu, kikuma leni wa pimbu wenda mwenikisa yisalu ya asantu". ⁹ Wandji wa ngu lejidi etshi: " sonika eki: " kKieshi kudi awa a tambwikiwa ku khinji ya makwela ma mwana dimemi" . Wa ngu leza epi etshi: " jidi ndaka ja kiedika ja Nzambi jenda jakula" . ¹⁰ Nia dihangikanga mu ku mu fukimina mu ku musambila kashi mweni wakula etshi: " wu ngu fukiminoku. Nidi musadi mudi ayi ni a pangi jeyi a khetshikina jithemu kia Yesu. Sambila Nzambi kikuma kithemu kia Yesu, kidi lukanu lwa kubikula" . ¹¹ Kumanima, nia mweni wulu diakanguka, kwa khedi ni punda mutoka! owu wa muninanga a mu tambikanga lunungu ni kiedika. Wenda kuzenga ni masonga ni kunwanisanga. ¹² Mesu mendji medi mudi mulebulebu wa ngolu, ku mutwa wendji kudi ni ji puwa. Wudi nijina dia kusonika edi ata muthu ka kuditenduloku. ¹³ Wa vwata kazaku ka kuvuya mu mashi, jina diendji didindaka ya Nzambi. ¹⁴ Mata ma ku wuluma mulabanga ni a punda a thoka; akhedi avata leni ditoka dia wukheti ni pimbu. ¹⁵ Mu kanwa diendji mwa wudikanga poku ya mwela yendeyi ku bwishila yikanda, wa ka yi yala ni mutondu wa wutadi. Wenda kukamuna yibundu ni kikamununu kia vinu diatwa dia khabu ja Nzambi mukwa ngolu josu. ¹⁶ Ku kazaku kendji ni ku taku diendji kwa khedi kwa kusonika jina dimoshi: "Thotila wa thotila, fumu wa a fumu. ¹⁷ Nia mweni wandji mumoshi wa makhinini ku tangwa. Wa tambikidi mundaka ya ngolu tujila twosu twenda kutuka etshi:" Yizenu, wongamenu kikuma kia khinji ya Nzambi. ¹⁸ Yizenu nudi musuni wa fumu, musuni wa a twadishi, musuni wathu a tshidi, musuni wa a punda ni tuvwalu twowu, musuni wathu edi mu pamba ni ahika, alengi, ni a mambuta. ¹⁹ Nia mweni mbiji ni a fumu a hashi ni a suta jowu. A zolanga kunwana ni owu wa ninanga ha punda ni a suta jendji. ²⁰ A kwatidi mbiji kumoshi ni mubikudi wa luvunu owuna wa hangidi yidimbu ya luvunu ha mesu mowu, mu njila ya yidimbu yeni, wa hunini athu awa anonini kidimbu kia mbiji, ni awa enda kusambila kifwani kiendji. A wa kongidi ni moyi ha jiku dia thuya dienda kulebuka ni sufre. ²¹ Awana asadidi a hwidi ku poku ya widikanga mu kanwa diowu wa ninanga ha punda. Tujila twosu twa dianga a mvumbi jowu.