¹ Mbona mesu ya Yesu Khidishitu, ya muhwedi Nzambi, mu kuleza asadi jenji, mambu ma kahangama, mu matshiku medi kwizanga kumesu. ² Yowani wenda wata kithemu kia mambu ma Nzambi, ni mambu moshu ma Yesu Khidishitu ma mulejidi mudi kundoji. ³ Lusakumunu lukhadi kudi moshu wudi kutangilanga athu mambu ama, ni kudi athu evwa mambu menama, ni kudi oshu akamahangila kubula, kikuma tangwa dia kokuluka. ⁴ Yoani, kudi mabundu tsambwadi medi mu thothu ya Azi: Mboti ni lukumu ya katukila kudi oyu wudi, wakhedi, wakeza; ya katukila kudi phevi tsambwadi jidi jia jeta kitshi kia kifumu kienji; ⁵ ni kudi Yesu khidishitu, wudi themu wa bathu, tsomi, wa thethikididi kutokama mu katshi ka amvumbi, wudi epi Fumu Wenda kuyala thothu. ⁶ Wa tuzola, wa tu katudidi mu kihika kia masumu metu mu mashi menji, twekina kikanda kia anganga-nzambi mu ku hangilanga tatenji Nzambi. Lukumu ni khembu, kudi Yesu Khidishitu mvula ni mvula. Amen. ⁷ Talenu, wenda weza mu katshi ka matuta; athu oshu a ka mumona, ni awana a mutsiokidi dionga mu luketu. Yikanda yoshu ya hashi ya ka bula kudila ni woma woshu. Ee, Amen. ⁸ "Ami nidi Luyanjiku nidi epi Tsuka," makula Fumu Nzambi, "wudi ni ngolu lawu, nidi, niakhedi, nia kakhala kaka." ⁹ Ami pangienu Yoani, mu kimvuka ni Yesu khidishitu, nienda niamona lamba njila yimoshi ni enu, twanona kadi kifumu, twenda kaka twa kasa mutshima. Akwatidi aya ku ngushia mu boloku mu kidinga kia Patmos, kikuma nia longidi ndaka ya Nzambi ya nehini Yesu khidishitu Judi athu. ¹⁰ Mu kilumbu kia Lumingu,Pevi ya ngwididi, nievidi ndaka ya ngolu kumanima memi ni kushia mayema mudi ngunga; ¹¹ ni kwakula etshi:" Sonika mu mukanda ma wudi kumonanga, wu ma tumishi mu mabundu tsambwadi: Ku Efeze, Ku Smirne, Ku Pergame, ku Tiatire, ku Sarde, ku Filadelfie ni ku Laodise". ¹² Nia lumikini mu kwijiya ndaka ya ngu tambikanga, nia mweni minda tsamwadi ya Wola. ¹³ Mu katshi koyi mwa khedi mudi muthu wa makana wa vwata vwela ni mukaba wa wola mu thulu yenji. ¹⁴ Suki jienji jiakhedi ji toka ni kukedia mudi thuya,ni lumbundubundu, mesu menji mudi mulebulebu wa thuya. ¹⁵ Miendu mienji miakhedi kukedia mudi wutadi watsila wa katula ajiku dia thuya, ndaka yenji kama mudi mahuhwa ma meya mengi. ¹⁶ Wakhedi wa kwata tutubwa tsambwadi ku kokhu dienji dia kitata ni poku ya mwela ya kusekisa, mu Kanwa dienji mwa wudikanga poly ya mwela. Mbunzu yenji yakhedi kukedia mudi tangwa dienda kungalumuka. ¹⁷ Tangwa di nia mu mweni,nia bwidi mu miendu mienji mudi mvumbi. Wa tsidi kooku dienji dia kitata ha mutwa wemi, wakula etshi:"Wivwa oku woma. Nidi muthu wa thethi ni wa tshuka". ¹⁸ Nidi muthu wa moyi,nia fidi, Kashi he nidi ni moyi wa mvula ni mvula, nidi epi ni a tsabi a lufwa ni kalunga. ¹⁹ Henihohu,sonika mambu ma wamweni, ama medi kikimweni, ni amana ma ka hangama kumesu. ²⁰ Kitsweki kia tutumbwa tsambwadi tu wudi kumonanga ku koku diemi dia kitata, ni mesa tsambwadi ma wola, menda ma lombulula etshi:" Tutumbwa tsambwadi tudi awanjio a mabundu tsambwadi, mesa tsambwadi medi mabundu tsambwadi."