¹ Tangwa dyamweni Yesu athu lawu, mweni waninini ha mundonda. Kyela washikama, alonguki jenji apusana kudi mweni. ² Mweni wa yandjikidi ku wa longa ni kwakula: ³ ' Kyeshi kudi awayi mu kiphevi, kikuma kifumu kya kuwulu kidi kyowowu. ⁴ Kyeshi kudi awana edi kudilanga, kikuma eni a kanona ngolu. ⁵ Kyeshi kudi athu enda kudikulumusa, kikuma eni akayala kifutshi. ⁶ Kyeshi kudi athu edi ni nzala ni pwisa ya kuhanga mambu maphimbu, kikuma eni akakhala akuta. ⁷ Kyeshi kudi enu akwa khenda, kikuma eni akawevila khenda. ⁸ Kyeshi kudi awa edi mitshima mya shipula, kikuma eni akamona Nzambi! ⁹ Kyeshi kudi athu enda kwingisa ngemba, kikuma eni akawatambika ana ja Nzambi. ¹⁰ Kyeshi kudi athu enda kumwesa pashi kudi athu ekha kikuma kya mambu ma phimbu, kifumu kya ku wulu kidi kyowowu. ¹¹ Kyeshi kingi kudi enu, yivwa athu enda a nu tukana, ni kumwesa phashi, ni kunuhunina mambu mabola kikuma kyamemi. ¹² Sangukenu, khalenu ni kyeshi kingi kikuma mataphishi menu medi mengi kuwulu. Kikuma kyoki athu amwenishini a mbikudi athethikididi pashi. ¹³ Enu nudi mungwa wa hashi, kashi yivwa mungwa wa sululuka, kyehi walunga kuwaha ephi? Wushiku ephi ni fhunu kaka ku wu konga hanji athu awudyati kowu. Enu nudi Mwania wa kifutshi. ¹⁴ Vidi dya tunga hawulu dya mundonda di ku swamananga oku. ¹⁵ Yidi mudi kyenda kulemisa athu mwinda, kaku wu windanga oku katini. Kashi, eni enda kuwushia hathendji mu ku bejimina kudi athu oshu mu katshi ka nzu. ¹⁶ Kenikioki enu nu feti kubejiminanga ku mesu ma athu mu kikuma eni amoni yisalu yenu ya phimbu, ahani lukumu kudi Nzambi, tatenu wudi ku wulu. ¹⁷ Nu banza oku etshi ami nyejidi mu kukatula tshiku to malongi ma ambikudi. Ami nyejidiku ku katula, kashi mu kuyilungisa. ¹⁸ Kyedika ami nya nu leza, tangwa dyoshu wulu ni mavu ma ka khalanga, ata kakisona kamoshi ka tshiku ka katuka oku ku tshiku tii kwa kahangimina mambu menma moshu. ¹⁹ Kyenikyoki oyu wa jiya tshiku, ata yidi yitshyotu, ni kulonga akwawu mu kuhanga mudi mweni, wa kakhala wa tshuka mu kifumu kya Nzambi. Kashi oyu wa ka jijitisa ni kuyilonga kudi athu ekha mu kuhanga kyenekina, wa kakhala wathethi mu kifumu kya ku wulu. ²⁰ Ami nyenda nya nuleza yivwa mambu menu ma phimbu ma hitidiku ma malongi ma jitshiku ni afadishi, enu nwa kengila oku mu kifumu kya kuwulu. ²¹ " Enu nwevidi kyehi alejidi athu atangwa dikulu : Wujiya oku muthu,' koshu wajiya muthu wa ka wudika mu mbaji kudi azuji mu kusamba.' ²² Kashi ami nyenda nya nuleza etshi, koshu wevila mukowu khabu, afeti kumu wudisa mumbaji ya a zuji mu kusamba. Oyu watukana mukowu etshi,' Wudi kitsukutsuku, akawudisa mumbaji ya amambuta. Koshu wakula etshi, 'wijiku kima,' wa kenda ku jiku dya thuya twenda kuleka konda kujima. ²³ Mutsindu wumoshi, yivwa wenda wahana makabu kumesa ma Fumu, wibuka etshi kudi ni muthu wu wudi ku lekanga ²⁴ kwivwangana nendji, zeza khadi makabu penapena ni mesa ma Fumu, vutuka nwendi kwivwangana thethi ni pangyeyi. Kumanima vutuka wuhani makabu meyi. ²⁵ Evwangana tswalu ni mbeni weyi, tangwa dinudi khadi mu njila enumbadi, kikuma mweni aleki kukulakula ku mokhu ma zuji, he a zuji a ku kuhana ku mokhu ma misandji, misandji akukwingisa mu boloku. ²⁶ Kyedika nya kuleza, waka wudika oku konda kufuta fhuka yoshu. ²⁷ "Enu nwevidi anu lejidi etshi: Wuta oku mbongi ni mukaji angani.' ²⁸ Kashi ami nya nuleza etshi, koshu wa tala mukhetu ni ku mulengulula, wata nenji mbongi mu mabanza menji. ²⁹ Yivwa disu dyeyi dya kitata dyenda dya kusenda mu kuhanga kubola, dizokudi wu dikongi kwalaha ni ayi, kikuma yidi pimbu kudi ayi ndambu yimoshi ya mwila weyi yizangani, mwila weyi woshu akaleki kuwumba ku bilungi. ³⁰ Yivwa kokhu dyeyi dya kitata dya kusenda mukuhanga kubola, divuki wu dikongi kwalaha ni ayi, kikuma yidi pimbu kudi ayi kitshini kya mwila weyi kimoshi kizangani, mwila weyi woshu wuleki kwenda ku yilungi. ³¹ Akudidi ephi eki: Koshu wajiya wala ni mukaji enji afeti kumuhu mukanda wa jihila wala.' ³² Kashi ami, niya nuleza etshi, koshu wajiya wala ni mukaji enji, yivwa keshiku kikuma kya mbongi ni yala mwekha, wa mwikhinisa mukhetu wa ndumba, moshu wa ka mukwela wata nenji mbongi. ³³ Enu nwevidi ephi kyehi akudidi kudi akhakha mu tangwa dikulu: Wuzenga oku ndefi ya luvunu, kashi lungisa mawa zengidi kumesu ma Fumu. ³⁴ Kashi ami nya nuleza etshi: nungazenga oku ndefi, yikadi mujina dya wulu, kikuma wulu didi kitshi kya kifumu kya Nzambi, ³⁵ yikhadi mu jina dya mavu, kikuma medi homa henda kusya Nzambi miendu, yikhadi mu jina dya Yeluselemi, kikuma didi dimbu dya Fumu mujima. ³⁶ Wu zenga oku ndefi mu jina dya mutwa weyi, kikuma wa lungidiku kwalumuna suki jehi jikhini jitoka to jibwita. ³⁷ Akulangenu kaka, E, E , to loni, loni, mambu matwenda kuyika menda kukatuka kudi dyabulu. ³⁸ "Nwevidi, akudidi etshi: Moshu wa kutobula disu, ni ayi ephi mutobudi disu, akuvuka zewu mu vuku nyayi zewu. ³⁹ Kashi ami nya nuleza etshi, nu kasa oku mutshima kudi muthu wabola, koshu muthu wa kubula mbata mu tafu dya kitata, muhu ephi tafu dya kimama akubudi. ⁴⁰ Yivwa muthu wa zola ku kufunda kudi leta, kikuma atambudi kikhutu kyeyi, muhu ephi ni kazaku keyi. ⁴¹ Yivwa muthu wa kushinjika dimoshi, wuhangi yitamina funda dimoshi, ayi hanga midi yadi ya mafunda ni mweni. ⁴² Koshu muthu wakuloma kyoshu kima, muhu, yivwa wazola kunona fhuka, mutefushi. ⁴³ Enu nwevidi akudidi etshi: Wufeti kuzola mu kwakweyi, wumengi mbeni weyi. ⁴⁴ Kashi ami nya nuleza eki: Zolangenu ambeni jenu , sambila ngenu Nzambi, kikuma kya athu enda ku numwesa lamba. ⁴⁵ Kyenikyoki, enu nukwikhina ana ja tata enu wudi ku wulu. Kikuma wenda kukyenzula athu edi abola ni athu abathu. Wenda ephi kunokisa mvula kudi athu abathu ni kudi athu abola. ⁴⁶ Kashi, yivwa enu nwenda nwa zola kasu athu enda kunuzola, matapishi ekhi nwa kanona? ⁴⁷ Tulaki ephi, enda kuhanga phila yimoshi. Yivwa nwenda kuhwa kasu aphangi jenu mboti, ekhi enu nwahanga yahita eni? ⁴⁸ Aphani ephi enda kuhanga kyenekina. Khalenu athu nudi nwalunga mudi tatunu wudi ku wulu.