¹ Yi lutumuni Phoebe, mpangi n'keto kene n'sadi mwe nzoo Nzaambi yi ye ku Cenchrées. ² Luyamba muzina di Pfumu. Lusala mo mu piila ba saantu, luyikama mu bima biakulu bika fwene ka kala biawu ye mfunu benu. Saamu wukuma nsadisi samu di baatu bingi phe saamu di mene. ³ Luheka mboti Priscille ye Aquilas, ba mpangi ba kisalu ki yezu Kristu. ⁴ Bawu ba nka bebisa luzingu lubawu saamu ba mbikisa mene. Yi bahele matondo, keku mene buhika kaasi nzoo Nzaambi yaakulu yi ba bakonda ba Zuifi. ⁵ Mboti dihika mu nzoo Nzaambi yina ye mu nzoo bawu. Mboti kwe Epaînète mpangi wu tondama, yandi kene kwe Kristu mbuma zi ntete zi tsi Azi. ⁶ Luheka mboti Madiya, yandi wusadi kibeni -ye ngolu saamu di benu. ⁷ Luheka mboti Andronicus ye Junias, ba taata ba mene, phe ba kamaladi ba boloku. Bene ye mfunu wingi hanakati di ba ntumi, ba bakala sadila Kristu kuntwala mene. ⁸ Luheka mboti Amplias mpangi me wu tondama mu Pfumu Yezu. ⁹ Luheka mboti Urbain, mpangi betu wu kisalu ki Kristu ye Stachus, mpangi mene. ¹⁰ Luheka mboti Apelles, lutambusa mu Kristu. Lubaheka phe mboti bana bakala ku nzoo Aristobule. ¹¹ Luheka mboti, Herodiona taata mene. Lubaheka mboti bana bakala ku nzoo Narcisse, bene mu Pfumu Yezu. ¹² Luheka mboti Trifene ye Trifose, bawu phe basalaka ngolu mu Pfumu. ¹³ Luheka mboti Perside. Rufus phe luheka mboti, wusolama mu kisalu ki Nzaambi, ye mamandi wu wene phe mama mene. ¹⁴ Luheka mboti Asynrite, Phlegeon, Hermes, Patrobas, Hermas, ye ba mpangi baakulu bana bene ye bawu. ¹⁵ Luheka mboti Philologue ye Juli, Nerée ye mpangiandi n'ketu, Olype, ye basantu baakulu bana bene ye bawu. ¹⁶ Ludihika benu ye benu mboti bu santu. Nzoo zi Nzaambi zaakulu zi luhitiki mboti. ¹⁷ Buntwene yeka lulonga, ba mpangi, luyindula phe kwe bana ba sala kuyinana phe ye mambu ma tsoni, kuhioka malongi ma luwaka. Lukala kiana ye baatu ba bwabuna. ¹⁸ Saamu baatu ba buna beka sadiloko Kristu, Pfumu betu, kaasi kifundu ki bawene. Phe keku ndinga kilengu ye kuleba baatu, bakwe hunu mbundu zi bana bakondi zaya mambu. ¹⁹ Saamu mbandu benu yi kulemvuka yi kumi kwe baatu baakulu. Tsepidi, mu tsuka saamu di benu, yekazola lukala ngangu mu mana matadidi mambu ma bunkete, phe luzayiku kima mu mamna mambi. ²⁰ Nzaambi ngemba haseloko kiana kan'diata satana mu tsi maalu ma benu. Matondu ma Nzaambi Pfumuetu yezu Kristu makala ye benu. ²¹ Timoti, mpangi mene kisalu, kaluhitiki mboti, ye Lucius, Jason ye Sosipater, ba taata ba mene. ²² Mene, Tertius mene yilu sonikini n'kanda wandu, yi luhele mboti muzina di Pfumu. ²³ Gyus, lweka lu mene phe lu nzoo Nzaambi yakulu, kaluhitiki mboti, Erasme, n'sweki makuta ma ville, kaluhitiki mboti, ye mpangi Quartus. ²⁴ Yambula mamboti ma Pfumu Yezu Kristu makala ye benu kulu!. ²⁵ Buntwene, kwe huna fwene kalukamba lu simba mukimvuye tsangu zi mboti ye kulonga ku Yezu Kristu, buna bahoya mo muku monisa maswekamu maba sweka yandika kiana; ²⁶ Kaasi buntwene ma moniki munzila bisona mu mana ma monama kuntwala mu mitsiiku mi Nzaambi wu mvula ye mvula, saamu di kulemvuka ku lukwikilu hakati di bana bakonda ba Zuifi. ²⁷ Kwe Nzaambi yandi mosi ngangu, munzila Yezu Kristu, kamonga n'kembu saamu di kimakulu. Bwabuna.