¹ Kwaku kwene ku monisama ku Yezu Kristu ku ka n'hele nzambi samu di ba tsadi bandi mambu mana ma nka salama kiana lowu. Ka n'tadisi mawu ha ka n'hitiki wanzio yandi kwe n'tsadi andi Yoane. ² Yoane ka tele kimbangi mu mambu matadidi ndinga nzambi ye kimbangi kina ki hanama kikuma ki Yezu Kristu, bima biakulu bi ka mwene. ³ Ka phambulama wuna tumbula ndinga muku, ye bana ba wa ma hoya ma masakudi ma bawu, ye bana ba tosa mambu masonama mu diambu tangu die belebele. ⁴ Yoane, ku zi mvula tsambwadi zi nzo nzambi mu kati di azia: Sia ne ngolo ye ngemba zi tuki kwe wuna wene, wuna wu kala, ye wuna weka kwisa ye kwe pheve tsambwadi zina zene ha ntwala kiti kiandi ki kipfumu, ⁵ ye kwe Yezu Kristu, wuna wene mbangi wu lutondo, mwana ntete wu bafwa, ye pfumu wu ba ntotila ba n'toto. Kwe wuna ntu zolaaka ye wuna ntu kangudi mu masumu ma beto mu nzila menga, ⁶ (ntu kumisi dibuta di ba tambiki bimenga samu di nzambi ye tata); kwe yandi nkembo ye ngolo zi pheve samu di mvu ye mvu! Amen ⁷ Tala, keka kwisa ye dituti; Disu diakulu di'mona, ku kadi batu bana ban'tubudi toma ye zi ndinga zaakulu zi n'toto zi di yangisa kikuma ki yandi. EEh! Dikala bwana! ⁸ "Yene luyandiku ye tsuka," hoyi pfumu nzambi, "wuna wene, wuna wu kala ye wuna weeka kwisa, wuna wu basa ye pheve yakulu." ⁹ Mene, Yoani (Phangieeno phe mutu wuna kabisaaka phasi ye beno, ki pfumu ye kiitu ki ku zisa mbundu bina biene kati di Yezu), yi kala ha senga di mamba di ba telaka Patimosi kikuma ki ndinga nzambi ye kimbangi ki Yezu. ¹⁰ Yi kala mu pheve mu kilumbu ki pfumu. Ku manima ma mene ngwidi ndinga yi mbuta-mbuta bwoso ndinga phungu, ¹¹ ndinga yene yi hoyiiki: "Sonika mu n'kanda mambu ma weeka mona ye hitika moh ku zi nzo nzambi tsambwadi: Efezia, Similina, Pedigami, Tiyatidi, Saladi, Filadelefi, ye Lawudikia." ¹² Yi baluki muku sia yi zaya nki yi kala ndinga yina yi phoyidi, ye mu tangu yi baluki, mbwene bi bendee bi woolo bina ba ntetikilaka ma bugi. ¹³ Ha kati di biawu, ha kala ye mutu wu fwana mwana mutu wu kala vweteeke mvwele yi kaleya tii ye kuna makuulu ye n'kaba wu woolo ha thulu yandi. ¹⁴ N'twa yandi ye tsuki zi yandi zikala zi kaseme neti mpembele, ye ku sema neti mbungi ye kibungi ha nto mamba, phe meso ma yandi ma kala ne n'lemu mbawu. ¹⁵ Maalu ma yandi makala neti bi bende bi mbwonzi bina ba bweti ha ziku dimbawu ye ndinga yandi yikala neti makhelele ma dibulu di mamba ma matadi. ¹⁶ Ka Kala simbiki ba mbwetete tsambwadi ha koko di yandi di kitata ye mu kati di'nwa yandi mu lubukiki mbele phoko. Ki lunzi ki yandi ki kala ngengaka neti tangu ha di hanaka miesi mi ki bungi. ¹⁷ Ha yi m'mwene, yi bwidi ha malu ma yandi neti mutu wu fwa. Ka ntetiki koko diyandi di kitata ha ntandu mene ye hoyi: "Bangiku. Yene wu ntete phe wu tsuka, ye yene wuu zingaka. ¹⁸ Yikala wu fwa ye tala, yeka zinga luzingu lu konda tsuka! phe vungula di bilumbu bi lufwa diene kwe mene. ¹⁹ Sonika mana mwene, mana mene bu ntwene ye mana ma kwisa. ²⁰ Ne ku maswekamu ma ba mbwetete tsambwadi ba mweneke ha koko di mene ye bi bendee bi wolo bi ba ntetikilaka ba buzi: Ba mbwetete tsambwadi ba tadisaka ba wanzio ba zi nzo nzambi tsambwadi phe bima bina ba tuludilaka ba buzi bia tsambwadi bitadisaka zi nzo nzambi tsambwadi."