¹ Yezu weele ku mongo wu ba livia. ² Mana, muna kibungi, wele diaka mu tempelo, ye mabuta makulu misi kwe yendi. Haka zakadi, yandiki ku balonga. ³ mu bwana ba soniki ye ba fadizia bisa nata mwana n'kheto mosi ba kwete mu ku sala mbongi; ye ba n'sidi ha kati di mabuta, ⁴ Ba hoyi kwe Yezu: Pfumu, mwana n'kheto wandu ba n'kwete ha ntangi mbongi. ⁵ Moyize, mu n'tsiku, ka ntu hele n'swa ntu m'bula matadi n'kheto wu phila yayi: Ngeyi se, nki hoyi? ⁶ Ba hoyiiki buna samu di ku'meka, mu ku sia ne ba n'funda. mana Yezu, niekisiki tsingu yandi, ka sonikiki ye milembu mu mafu. ⁷ Samu ba kala n'dindikisaka zi ngiufu, vumbudi n'twa phe ba kambi: Wuna wu konda disumu ha kati di beno ka yandika wu ntete mu ku n'losila ditadi. ⁸ Ye tsukiki diaka kilunzi, ye kusonikaka mu mafu. ⁹ Mu ntangu ba wudi bwabuna, ba fundami mu zingindu zi bawu, ba yandiki ku katutu mosi mosi, yandika ku ba mbuta tii ye kuna ba batsuka; phe Yezu seele yandiene ye n'kheto wu kala ha kati. ¹⁰ Mu bwana, ha ka vumbudi n'twa, ye mwene kaka n'kheto , Yezu n'kambi: N'kheto, kwe bene ba bakele ku funda? Ha nkatu mutu ku lodi? ¹¹ Kabusi mvutu: Lowu, Pfumu. Phe Yezu n'kambi: Mene phe yi ku loloku( ku hekoko ndola): ndonda, ye sadiku diaka disumu. ¹² Yezu ba hotidi diaka, ye ba kambi: Yene Mieesi mi n'toto, wuna ndanda mene ka kangaloko mu kati di phipa, kasi ka kala ye miesi mi luzingu. ¹³ Kikuma ki ndinga yaana, ba fadizia ba hoyi: Weka ta ki mbangi ki ngeyene; ki mbangi kiaku kieko masonga. ¹⁴ Yezu ba hele mvutu: Ata yeka ta kimbangi ki meene, ki mbangi ki mene kiene masonga, mu diambu nzeye kwe ntuki ye kwe yeka kwenda; mana beno lu yebeko kwe ntuki ye kwe yi kwenda. ¹⁵ Lu sambisa mu ki n'suni, mene, yi sambisaku mutu. ¹⁶ Phe ne yi sambisa, ku sambisa kumene kwe masonga, mu diambu yeko mene bu hika; Tata wu ntuma kene ye mene. ¹⁷ Ma sonama mu mitsiku mi beno ne kimbangi ki batu bola ki kala masonga; ¹⁸ yeka ta kimbangi ki menene, ye Tata wu ntuma keka ta kimbangi ki mene. ¹⁹ Ba n'kambi phe: Kwe kene tata ngeyi? Yezu hene mvutu: Lu ngiebeko mene, ata tata mene. Ne lu ngiebe, lu nka n'zaya phe tata mene. ²⁰ Yezu hoyi mahoya mana, mu kulongaka mu tem'pelo, ha phalasi yina yikala kimvwama; phe ha khatu mutu wu n'kwete, mu diambu tangu diandi dikala di lungidieko. ²¹ Yezu ba kambidiaka: Yele, lu ndinga phe, lu fwa phe mu kati di disumu dieno; lu fweneko lwisa ku yele. ²² Kikuma ki mambu mana, ba yuda ba hoyi: Ka di honda yandiene, mu diambu keka hoya: lu fweneko lwisa ku yele mene. ²³ Ye ba kembe: Lwene ba ha tsi n'toto; mene, Yene wu zilu. Lwene batu ba n'toto wandu, mene, yeko wu n'toto wandu. ²⁴ Nkiakina yi lu samuni ne lu fwa mu masumu meno, mu diambu ne lweka ndimoko wuna yene, lu fwa mu masumu meno. ²⁵ Na wen? ba n'kambi. Yezu ba kabusidi mvutu: Wuna yeka lukamba yandi luyandiku. ²⁶ Yene ye mambu mingi ma ku hoya samu di beno, ye ku sambisa kati di beno; mana wuu ntumi kene masonga, ye ma ngwidi kwe yandi, yeka ma hoya mu n'toto. ²⁷ Ba zeyeko ne ka ba hoyidiki tata. ²⁸ Yezu phe ba kambi: Hana lu n'tombula mwana mutu, hakana lu zaya wuna yene, phe yi salaku kima mu philaama; kasi yi hoyaka kutala mana ka ndonga tata. ²⁹ Wu ntuma kene ye mene; ka tsisiiku mene bu hika, mu diambu yeka sala koso tangu mambu mana ma n'sepidisaaka. ³⁰ Mu diambu Yezu ka hoyiki bwabuna, batu biingi ba kwikidi mu kati di yandi. ³¹ Ye hoyi kwe ba yuda ba ba kwikidi lu kati di yandi: Ne lu kwikama mu kati di ndinga mene, lwene mu masonga ba longoki ba lene; ³² Lu zaya masonga, phe masonga ma lu nungisa. ³³ Ba n'hele mvutu: Ntwene ba tekulu ba Abalayami, ye ntu seleko ku kala mi hika mi mutu; nki phila weka hoya ne : lu katuka muki hika? ³⁴ Mu masonga, ye masonga, yeka lukamba, ba kabusidi Yezu, konso mutu wuna di yambudila ku masumu ka kuma n'hika masumu. ³⁵ Mu ku tala, n'hika ka zingilaku kaka mu kati di nzo; mwana ka zingilaka mwo konso tangu. ³⁶ Ne mwana ka lu kangula, lukatuka ye masonga muki hika. ³⁷ Nzeye ne lwene makitani ma Abalayami; mana lweka dinga lu phonda, mu diambu ndinga mene yeka kotoko mukati di beno. ³⁸ Yeka hoya mambu ma mbweneke kwe tata; ye beno, lweka sala mana lu mwene kwe tateeno. ³⁹ Ba n'hele mvutu: Tata beto, kene Abalayami. Yezu ba kambi: Ne lukala bana ba Abalayami, lu nka sala bisalu bi Abalayami. ⁴⁰ Mana bu ntwene lweka dinga lu phonda, mene wu yi lukambi masonga ma ngwidi kwe nzambi. Abalayami kasadiku buna. ⁴¹ Lweka sala bisalu bi tateeno. Ba n'kambi: Ntweko bana ba makangu, ntwene ye tata mosi, Nzambi. ⁴² Yezu ba kambi: Ne nzambi ka kala tata beno, lu nka nzola, samu ntuki kwe nzambi phe yisi; yi di yisidiku menene, yandi ntumi. ⁴³ Nki kikuma lweka simbiloko phoyidi mene? Mu diambu lu fweneko lu wa ndinga mene. ⁴⁴ Tata beno kene Diabulu, ye lu zodi lu lungisa phusa tata beno. Ka kala n'hondi tuuka luyandiku, ye ka telemaku mu kati di masonga, mu diambu mweko ye masonga kati di yandi. Ha ka hoyaka bungumba, ka hoyilaka ku tsi mbundwandi; mu diambu kene kingumba ye tata bungumbu. ⁴⁵ Ye mene, mu diambu yeka hoya masonga, lweka nkwikiloko. ⁴⁶ Na ha kati di beno ndunga mu disumu? Ne yeka hoya masonga, nki kikuma lweka nkwikiloko? ⁴⁷ Wuna wena wu nzambi, ka waka ma hoya ma nzambi; lweka woko, mu diambu lweko ba nzambi. ⁴⁸ Ba yuda ba n'hele mvutu: Ntweko ye kinunga mu ku hoya ne wene mu samadiya, ye wene ye pheve mbi? ⁴⁹ Yezu kabusi mvutu: Yeko ye pheve zi mbi; mana yeka kumisa tata mene, ye lweka ntukuna. ⁵⁰ Yeka dingoko nkembo mene; Kene kaka mosi wu weka yi dinga ye sambisaka. ⁵¹ Mu masonga, ye masonga, yeka lukamba, ne mutu ka batila ndinga mene, ka monoko mu dibele lufwa. ⁵² Bu ntwene, ba yuda ba n'kambi, ntu yebe ne wene ye pheve zi mbi. Abalayami wu fwa, ba mbikudi phe, ye weka hoya: ne mutu ka batila ndinga mene, ka monoko lufwa. ⁵³ Wene mbuta ku hioka tata beto Abalayami, wuna wu fwa? Na weka zola wu kuma. ⁵⁴ Yezu kabusi mvutu: Ne yi di heka nkembo menene, nkembo mene yeko kima. Nde tata mene pheka nkembo, wu lweka hoya ne kene nzambi beno, ⁵⁵ ye wuna lu kondi zaya. Samu di mene, yi zeye; ye ne yi hoyani ne yi n'zeyeko, nka pfwana beno, ki ngumba. Mana yi n'zeye, ye yi batilaka ndinga yandi. ⁵⁶ Abalayami, tata beno, ka sepidi mu tangu di kamona kilumbu ki mene: ka mwene kio, ye ka sepidi. ⁵⁷ Ba Yuda ba n'kambi: Lungisieko ata mvula makumi ye matana, ye weka hoyi ne wu n'mwene Abalayami! ⁵⁸ Yezu ba kambi: Mu masonga, ye masonga, yeka lu samuna, ku ntwala Abalayami ka kala, Yi kala. ⁵⁹ Ki kuma kiakina ba mongi diaka matadi samu di ku n'basula, mana Yezu we swama, ye lubuki mu tempelo.