¹ Bana bene mu misinga neeti ba boyi batalaka ba pfumu ba bawu neeti ba fweene mukubaka lukumu lwakulu. Ba fweti sala bwabubu saamu zina di Nzaambi ye malongi ba tukuni moko. ² Baboyi bana bene ye pfumu baatu baba kwikila, baba tukuniku, baba sia luzitu, saamu bene ba sambilaka; kaasi ba baheka buna bubunkeete, saamu ba pfumu baba beka sadisa mukisalu kibawu bena baatu ba kwikila phe ba tondama. longa phe hoya mambu ma. ³ Neti muutu keka longa piila hiika mana keka tambusoko mitsiku, disongidila ndinga Pfumu Nzaambi Yezu Klistu. Neti katambusaku malongi mana ma naata baatu ku lukwikilu. ⁴ Muutu wuna kene lulendo phe kazeyoko kima. Phe kene muutu beela mukuyumana ye kubalula mitwa midiambu. Mahoya ma yandi mene ma bizola-zola, mu masota, kutukuna, ⁵ Phe kimbeni ye baatu phe ye mpeve dikuzola mambi. Bazolaku masonga. Bayindulaka na kuzola Nzaambi kwene samu wukuma muutu mbongo. ⁶ Kuzola Nzaambi ye kusepila ku mbundu kwene kima kimboti. ⁷ Saamu ntwisa natako kima mu tsi n'toto, haana tukwenda tukwendo phe ye kima. ⁸ Kaasi, tumona kiesi twu yangalala mu madia phe mileele bina ntwe biwu. ⁹ Kaasi bana bazodi kimvwama ba bwa mu mimekanu, mu mitambu. Ba bwa mibi zola-zola bi bazoba, ki gonsa mu maakulu ma meka nata batu mu nzila zi bulu phe zi kubeba. ¹⁰ Saamu kuzola ku mbongo kwe nzila yi mambi maakulu. Bahika balanda biesi bina bwa mu masumu bakuma kiana ye lukwikilu phe badibebisa bwene ye kiwayi. ¹¹ Kaasi ngeyi, muutu Nzaambi, tiina bima bi sosa masonga ma Nzaambi, kuzola ndinga Nzaambi ye lutondo, lembiku, lepika mbundu. ¹² Nwana bintumba bi bunkete bi lukwikilu. Kwata luzingu lu konda tsuka lu bakutedila. Saamu di bima biabi pfunguni ye lukwikilu ha ntwala ban'moni mambu biingi kikuma ki mambu ma bunkete. ¹³ Yiku sisi kumoku ma Nzaambi, yandi hana luzingu kwe bima biakulu, phe kuntwala Yezu-Klistu, yandi wuhoyi mu masonga makulu kuntwala Pilatu: ¹⁴ Sweka buna bukitoko mitsiku, bwiku mu mambu mambi ye kuna ka kwisila Pfumu betu Yezu-Klistu. ¹⁵ Nzaambi ka songila ku kwisa kuyandi mu ntangu mboti, Nzaambi kaku sakumuna, Pfumu wuzinga, Pfumu wuzakala ha kiiti ki kipfumu. ¹⁶ Yandi konda fwa phe kazinga mu mishi miba simvbaku. Hankatu muutu humonaka phe fwene ka mona, kwe yandi lukumu ye ngolo zikonda tsuka. Bwabuna! ¹⁷ Bakamba ba mvwama ba tsi yayi bakadiki lulendu, bashiku mu mbongo kitu ki bawu zi salaku kima. Kaasi ba kwikila ku Nzaambi. Yandi katuheka nkatika ki mvwama samu tu yangala kiawu. ¹⁸ Bakamba basala mamboti, bakala ba mvwama bakusala mambu ma bunkeete, bakala ye lutondo phe bazaya ku haana. ¹⁹ Mu bwabuna, ba sala luyandiku lu bunkeete mu luzingu lukwisa phe ba monga luzingu lu mboti. ²⁰ Timoté, batila bina bakuheka. Kala kiana ya mahoya ma buzobo makonda munzila ye kuyumana mu malongi mambi. ²¹ Baatu bahika b eka hoya mambu ma bakuma kiana ye lukwikilu. Ma mboti ma Nzaambi makala ye ngeyi.