¹ Ndiinga yi yene yi kukwila: Na muutu keke zola ka kuma Pfumu wumbuta mukisalu ki Nzaambi, kazodi kisaalu ki mbuta. ² Haakana kafweti kaala muutu wukonda disumu, ye bikalulu bi bunkeete. Kafweti kaala ye n'keeto mosi. Kafweti kala ye lutondo, wubwisa mbundu. Phe kazaya kulonga. ³ Kakadiku muutu kunwa malafu, m'buulu, kaasi kakala muutu ngemba, kiesi phe kakadiku lukusu. ^{4 5} Ka fweti zaya kunatisa kandadiandi, phe baana bandibefweti m'lemvukilaka ye luzitu. Mudiambu na muutu kazeyeko kunatisa nzuandi, nkii piila kazaya kunatisa nzoo Nzaambi. ⁶ Ka kadiku muutu wubaludi mbundu wumpa, na lowa lulendu lu naata mu nzila satana. ⁷ Tomina baatu ba kunzila bahoyila diambu du bunkeete, samu kabwiku mutsoni ye mi tambu mi satana. ⁸ Badiacona phe bafweti kala ba fwaana, ba kadiku baatu ba nziila zole, kanwiku malafu, kuyhiokakana to lukusu. ⁹ Masonga ma lukwikilu ka fweti baatila mo ye kusukisama ku mbundu yi kasema. ¹⁰ Ba feweti bazaya na beku ye maambu ma mbi, kunima bayandiki kunsadila Nzaambi. ¹¹ Ba nkeetu phe piila mosi, ba fweti kala ba fwana. Bakadiku ye ndinga mbi, bakala baatu ba lembisa mbundu phe ba kangama mu mambu maakulu. ¹² Ba Diakona phe ba fweti kala yakala di n'keeto mosi. Ba fweti zaya kunatisa baana ba bawu ye ma kaanda ma bawu. ¹³ Saamu bana basadidi bubu nkeete, ba mongi kipfumu ki luzitu mu lukwikilu lu Yezu Klistu. ¹⁴ Yikusoniki mambu ma, yeka zola yisa kuna we ngeyi. ¹⁵ Na yisiku tswalu, yikusoniki mukushia wuzaya nkii piila fwene wukala mu kaanda di Nzaambi, diene Nzoo Nzaambi moyi, n'tii wusimbi masonga. ¹⁶ Tufweneko tubusa na masonga malubuki mukukangama me ma mbuta: "Lubuki muki n'suni, bikisami mu mpeve santu, ba mwene ba wanzio, longi mu ma haata, ba kwikidi mu tsii yakulu, tombuki mu nkeembu."