¹ Aphangi a akhetu nu a mala, gu ndaga idi mu talela makapho a gi pheve, nga tshigina mu jiye ndaga phila ya nu khala. ² Jiyenu egi tangwa mwa khalele aphanyi, itege ya mi totesele njila, uvi itege yene idi gu mi twameza. ³ Henyaha, nga tshigina mu jiye egi muthu yonu wa nu zwela ndaga jia pheve ya Nzambi gwa jiyile go gu zwela egi: " Yesu udi wa gu shinza! Ata muthu gwa jiyile nji go gu zwela egi, " yesu udi Fumu," gula gwa nu zwelela go Pheve Santu. ⁴ Makapho a nu hana Pheve santu adi a vula a phila nu phila, ⁵ njila jia gu salela Nzambi jidi jia vula, uvi Fumu udi kaka mu moshi. ⁶ Isalo idi ya vula, uvi kaka Nzambi mu moshi, mwene wa nu hana ngolo gwa muthu mukima. ⁷ Muthu mukima wa nu zula makapho a pheve ya Nzambi mukunda nu mambote a athu akima. ⁸ Gwa athu ako pheve ya nu hana mayele a gu zwela ndaga jia mayele, gwa muthu muko gu jiya gu zwela nu mayele, kaka pheve. ⁹ Gwa muthu muko pheve ya nu hana lukwikilu, gwa muko makapho a gu belula enya misongo, ¹⁰ gwa muthu muko makapho a gu kita idimbu ya khumbwa, gwa muko makapho a gu jiyisa sango ya Nzambi, gwa muko mayele a gu swasugisa pheve, gwa ako gu jiya gu zwela, gwa muko mayele a gu tendula ndinga. ¹¹ Uvi pheve yene imoshi idi mu sala mu ndaga jikima, idi mu hana mayele gwa muthu mukima mu luzolo lwenji. ¹² Mu phila mwila umoshi udi nu itshidi ya vula, itshidi yene idi ya mwila umoshi, kilistu nji udi kaka mu phila yene inyi. ¹³ Pheve idi imoshi, ta zudile mbotiga mu katshi diawo mu mwila umoshi, ba yuda, ba greki, muhiga nga ndo yonu gwa shi go muhiga,ta nu nwa mu njila ya pheve imoshi. ¹⁴ Mwila u shi go nu gitshidi gi moshi, uvi itshidi ya vula. ¹⁵ Gula kulu dia zwela egi, " mukunda ngu shi nga koko go, ngu shi nga gitshidi gia mwila go, " gu shi go nu gitshidi gia mwila gidi gia konda funu. ¹⁶ Gula ditshi dia zwela egi," ngu shi nga iso go, ngu shi nga gitshidi gia mwila go, " itshidi ya mwila ikima idi nu funu. ¹⁷ Gula nga mwila ukima udi diso, phila khi mwila wa jiya gu nwa? Gula nga mwila ukima udi ditshi, phila khi mwila wa jiya gu vwa vumba? ¹⁸ Nzambi wa hagele itshidi ya mwila, mu mwila mu luzolo lwenji. ¹⁹ Gula nga mwila udi kaka nu gitshidi gi moshi, mwila wa jiyile gu khala mwila go. ²⁰ Lulu ngagi, itshidi idi ya vula, uvi mwila umoshi. ²¹ Diso dia jiyile go gu leza koko egi, " ngu shi nu funu yaye go." Nga mutwe u leze malu egi, " ngu shi nu funu yaye go." ²² Uvi itshidi ya mwila idi mu monega ya konda funu yene idi nu funu. ²³ Itshidi ya mwila ta nu yindula egi yene idi nu funu, nu gu i hwa lukumu, itshidi ya mwila inyi tu di mu mona phamba yene ta nu hwa lukumu lwa vula. ²⁴ Lulu ngagi, itshidi ya mwila ta nu mona egi idi nu funu ishi nji go nu funu ya lukumu mukunda idi gale nu lukumu. Nzambi wa vugishile itshidi ya mwila hama ha moshi, wa hanele lukumu gwa itshidi inyi ya konda lukumu. ²⁵ Wa kitile nganyi mukunda mwila gudi kapha ndo, uvi mukunda itshidi ya mwila iko i hane lukumu gu itshidi iko, nu gu di tshigina. ²⁶ Gula gitshidi gi moshi gia mwila gidi mu kata, itshidi ikima ya mwila ya nu kata; nga ndo gula gitshidi gi moshi gia mwila gia zula lukumu itshidi ikima ya nu mona kiese. ²⁷ Lulu ngagi, mudi mwa mwila wa Kilistu, ebuna konso muthu udi gitshidi gia mwila wa Kilistu. ²⁸ Mu dibundu, Nzambi wa hagele ha thomo a thumwa, gu nyima a longi nu wanyi adi nu makapho a gu kita idimbu ya khumbwa, gu hata wanyi a nu belula, nu wanyi a nu salesa athu ako wanyi a nu twalesa, wanyi a nu zwela mu ndinga jiko, keti tu di akima a thumwa? ²⁹ Keti tu di akima ba profeta? Keti tu di akima malongi? Ta nu kita idimbu ya khumbwa? ³⁰ Keti ta nu belula athu? Keti ta nu zwela mu ndinga jiko? Keti ta nu tendula ndinga jiko? ³¹ Di zalulenu ha gu kamba makapho a gu balega funu.