¹ Eme pholo nga tamegeye gwa Yesu Kilisto ha gu khala thumwa mu lozolo lwa Nzambi, nu phangi'etu Sostene, ² gu dibundu dia Nzambi dinyi didi gu dimbo dia Kolinto, nu gwa enwe athu wanyi a phoneye gwa Yesu Kilisto ha gu khala a santu, nu wanyi akima a nu tamega tangwa dikima jina dia Yesu Kilisto. ³ Luzolo nu ngemba ya Nzambi Sha Fumu wetu Yesu Kilisto ikhale mu katshi dienu. ⁴ Tangwa dikima ngu mu vutula matondo gwa Nzambi wami mukunda nu luzolo lwenji lwa bonga adi mu tu leza mu njila ya Yesu Kilisto. ⁵ Wa mi sagumunile mu ndaga jikima, mu ndaga jia nu zwela, nu mu mayele a gu jiya ndaga, ⁶ mu phila sango ya Kilisto ya kituga ngolo mu katshi dienu. ⁷ Lulu ngagi mu shi mu konda mabula a gi kilisto go, tangwa mu di mu nenga nu nzala ikima tangwa dinyi dia guza gwa Fumu wetu Yesu Kilisto. ⁸ Mwene wa nu mi hwa ngolo nu ha suga mukunda gu le gu khala ndo nu muthu mba u mona gikuma gia gu mi funda mu gilumbu mba gi tu sambesa Fumu wetu Yesu Kilisto. ⁹ Nzambi yonu wa mi tamegele ha gu khala mu gimvuga nu munenji Yesu Kilisto udi nu ngolo. ¹⁰ A phangi'ami ngu mu mi bondila mu jina dia Fumu wetu Yesu Kilisto yonu mwa tshiginile, mu phila mwa tunyile ha gudi kapha mu katshi dienu, egi mu khale gibeni mwa di bungisa mu ngindu ji moshi nu mu mabanza a moshi. ¹¹ Mukunda nga vile gwa athu ako a gu dimbo dia Kolowe egi mudi mu mana mu katshi dienu. ¹² Lulu ngagi nga tshigina gu zwela egi athu akima mu katshi dienu a nu zwela egi, eme ngudi nga muthu wa pholo," ako egi ngu di nga muthu wa Apholosi," ako nji egi nga muthu wa Sefasi", ako egi nga muthu wa Kilisto". ¹³ Keti kilistu udi wa gu di kapha? Keti pholo wa shiyiye ha khulunji mukunda nu enwe? keti mwa zudile mbotiga mu jina dia pholo? ¹⁴ Ngu mu vutula matondo gwa Nzambi mukunda nga botigile go ata muthu mu moshi mu katshi dienu katula kaka Krispusi nu Gayusi. ¹⁵ Mukunda gule gu zwela ndo ata muthu mu moshi egi mwa zudile mbotiga mu jina diami. ¹⁶ Nga botigile nji athu akima a mu gisapha gia Stefani. Gwa wanyi ako a bega ngu shi mu bambuga go gula nga botigile athu ako. ¹⁷ Mukunda kilistu gwa ngu tumile go ha gu botiga, uvi wa ngu tumile ha gu longa sango ya bonga, nu mayele a gu zwela egi ndo mukunda khulunji ya phashi jia Kilistu jile gu kituga ndo gima gia phamba gia konda funu. ¹⁸ Mukunda nu athu ako wanyi a fwa, sango ya lufwa lwa Yesu ha khulunji idi ndaga ya uzoba, uvi mukunda nu etwe athu wanyi Nzambi a gulushile, sango yene idi ngolo jia Nzambi. ¹⁹ Mukunda ya sonegeye gu mukanda wa Nzambi egi: " mba ngu mu shiya mayele a athu a tema, mba ngu a katula mayele. ²⁰ Muthu wa tema mu digi? Muthu wa longuga mu digi? muthu wa jiya gu zwela mwa bonga mu digi? keti Nzambi gwa jiyishile go egi mayele a tangwa didi adi a uzoba? ²¹ Katuga tangwa athu a mayele a jimbidile Nzambi, hene Nzambi a monele egi wa feto gulusa athu a nu tshigina sango ya uzoba inyi ta nu longa. ²² Bayuda a mu lomba idimbu ya khumbwa, ba greki adi mu kamba mayele. ²³ Uvi etwe tudi mu longa Yesu Kilistu yonu wa shiyiye holu dia khulunji, nu gu longa sango inyi ya nu hwa bayuda phashi, ebuna ba greki adi mu mona sango yene gifwa idi uzoba. ²⁴ Uvi athu wanyi a phoneye gwa Nzambi, bayuda nu ba greki, tudi mu a longa sango idi ngolo nu mayele a Nzambi. ²⁵ Mukunda ndaga inyi idi mu monega uzoba gwa Nzambi, idi mayele a gu balega mayele a athu. ²⁶ Aphangi a mala nu a akhetu,yindulenu egi mu katshi dienu enwe mwa phoneye gudi nu athu a vula adi nu mayele a gi musunyi, to athu a ngolo to athu a lujingu lwa bonga. ²⁷ Nzambi wa phonele kaka ndaga jinyi athu a nu mona egi jidi ndaga jia uzoba, ha gu monesa athu a mayele sonyi. ²⁸ Wa phonele ndaga jinyi athu adi mu mona egi jidi jia bola, ndaga jinyi a nu vweza, nu jinyi a nu yindula egi jia phamba, mukunda nu gu shiya ndaga jinyi athu a nu yindula egi jidi jia funu. ²⁹ Ndaga jinyi jidi mu leza egi gu shi go nu muthu wa jiya gudi monesa gu meso a Nzambi. ³⁰ Uvi Nzambi wa mi haga mu gimvuga gi moshi nu Kilistu Yesu. Wa kitudile Kilistu mayele etu, mukunda nu Kilistu, Nzambi wa tu tshiginile, wa tu kitudile athu enji ha khenji, wa tu katudile mu gihiga gia masumu. ³¹ Hene gu mukanda gwa sonegeye egi: " Muthu yonu wa tshigina gudi monesa, wa feto gudi monesa kaka gu ndaga jia Fumu Nzambi.