¹ Gu ngima dia phoso imoshi, mu gimenegena gia lusugu lua gudiangela lua phoso, Maria ya gu Magadala nu Maria muko ajile mutala malumba. ² Tala gua khadi gudigita guakoma gua mavu, ndaga ya muanjelo ya Fumu wabulumugine gukatuga mu dilu, wajile nu wakatuile iseso nu waditumbigile holu diayo. ³ Phala yenji yakhalele mumuenega ya guhenya nu milele iplaphe gifua neji. ⁴ Akengeledi adigitile mukunda nu abuile gifua athu agufua. ⁵ Muanjelo wawambelele akhetu nu guzuela egi: «Mukhadigo nu woma, ndaga ya ngajiya egi mudi mukamba Yesu, wahagewe ha mutshi wagudikikisa. ⁶ Gashigo haha uvi wazugi gu gufua gifua muazuelele. Jienu nu tadienu bugu diakhadi Fumu ya gubanda. ⁷ Ndienu muphushi wambedienu alongi enji egi: «Wazugi mukatshi dia a gufua: nu tadienu, mudiangele gutuama dienji mu Galileya. Guene gunu mudi gulumona.» Tala, ngudi gumiwambela. » ⁸ Ngenyi akhetu akatugile gu malumba gatshididi. Akhalele nu woma uvi nu gusuanguluga. Ayile muphushi mukunda nu guwambela alongi enji. ⁹ Tala Yesu wataganene n'awo nu wazuelele egi: «Guhuima gudi nu enue.» Akhetu ajile, amukuatele gu malu enji, amukombelele. ¹⁰ Luenyelu Yesu wawambelele egi: « Mukhadigo nu woma. Ndienu muwambele aphanjiami ha guya gu Galileya; guene gunu mba angumona.» ¹¹ Hakhalele Akhetu muya, tala akengeledi anginyine mu dimbo dia musamba nu awambelele Fumu ya atshitshi a mudimo wa Nzambi ima yagasue yabalegele. ¹² Hatagenene nu akulu nu azuelele mukunda nu ndaga yene, ahanene falanga jiavula gudi masalayi ¹³ nu guzuela egi : << Zuedienu egi alandudi a Yesu ayi mu phipha hene akuya mvumbi yenji mukumbi dituakhala agubanda. ¹⁴ Gula ndaga eyi yaheta gu Guverenere, mbatumukotelesela nu mbatukatula dilamba diajiya gumihuwa.» ¹⁵ Ngenyi; masalayi azanguile jifalanga nu atshitshile gifua mualongesewe. Lungu lunu luamuangunugine gudi enya Yuda nu lungu luene lua nalandula unu mangino ou. ¹⁶ Uviwanyi kumi nu mumoshi ayile gu Galileya gu mulundu guadijigile Yesu. ¹⁷ Ha amumuenene, amukombelele uvi ako akhalele gudihula. ¹⁸ Yesu wasuenene hehi nu ene, wawambelele egi : «Ufumu wagasue wanguhuwe mu dilu nu holu dia mavu. ¹⁹ Ndienu, mujiyise athu agasue alongi ami, mu abatize mu jina dia Tata, dia mona nu dia Nyuma wabonga. ²⁰ Mualongese ha gutumaga yagasue ingamiwambelele. Nu tala, ngudi nu enue masugu agasue unu gu gisugishilo gia mavu.»