¹ Mwenyemo egi phetelo nu yone wakhalele muzuela gu iphuta, guajile mafumu a guhana mukhuala gudi iphuta nu enya iphapha. ² Akhalele agujiyiwa ndaga ya phetelo nu yone alongesele iphuta mukunda nu yesu nu akhalele mulondolola guzuga guenji gua gufua mukatshi dia agufua. ³ Akhalele nu gu amba mu bologo unu hamenedienji mugimenegena ndaga yakhalele diago mu ngueze. ⁴ Uvi avula a iphuta avile jimbimbi jiawo atshiginyine nu nomba ya athu atshiginyine ya khalele hehi nu midi itano. ⁵ Hamene dienji, yakhalele egi mafumu awo, athu akulu nu enya mulobo adibungishile gu yelusalema. ⁶ Ana, Fumu ya gikombelelo wakhalele hene Kaifa, yone, Alexandele nu agasue a muvumo dia Fumu gikombelelo. ⁷ Hahagele ene phetelo nu yone ha katshi na katshi a ahudile agi: Nu ngolo tshi nga nu mujina dia nanyi mudi mutshita ima yeyi? ⁸ Luenyelu phetelo ya guzala pha nu givule - giabonga, wa wambelele: Enue atuameji a iphuta nu akulu, ⁹ Gula tudi muhudiwa mihu mu masugu awa holu dia gubonga gutuatshitshi mukunda nu muenya misongo, luholo tshi muthu yowu gasagewa? ¹⁰ Idi nayo yakhala yagujiyiwa gudi enue agasue nu gudi iphuta ya gasue ya isalele egi idi mu jina dia yesu Kilisto ya gu Nazaleta yago u mwa yegale ha mutshi wa gudikikisa nu Nazambi wa muzugijile mukatshi dia agufua idi mukunda nu muene muthu you udi mumagana gutuama dienu nu muila wa bonga. ¹¹ Yesu -Kilisto seso imwabishidile gifua atungi, uvi ya khalele seso ya hakhomo. ¹² Gushigo guhuluga nga gua muthu mukunda gushigo nu jina diko gosha dilu diahanewe mukatshi dia athu mukunda nu guhuluishiwa. ¹³ Hamwenene gudihana gua phetelo nu Yone angulugile egi, akhalele athu gifua athu agasue, akhalele athu alongesewe go, akhalele gu dihula muavula gu luholo lua khalele phetelo nu Yone akhalele nu Yesu. ¹⁴ Ndaga ya amwenene muthu yago ya sagewe mumagana nu ene akhalele go nga nu gima gia guzuela. ¹⁵ Gu ngima dia guzuela egi Apostolo azogele mu hungu diawo adizuelesele mukatshi diawo. ¹⁶ Azuelele: itshi tuajiya gutshita nu athu wawa? Mukunda ndaga yagushimana ya tshitshiwa gudi ene, yene inyi ya gujiyiwa gudi athu agasue ana sala mu yelusalema; tuajiyilego gutuna. ¹⁷ Uvi mukunda nu ndaga eyi imwanganago mukatshi dia iphuta yague, tuawambedienu egi guzuela ndo nga gua muthu mu moshi mu jina diene. ¹⁸ Atamegene Phetelo nu Yone awambelele egi guzuela ndo nga gandambo nga gulongesa mu jina dia Ysu. ¹⁹ Uvi Phetelo nu Yone atayele ha guawambela. Mudelumbuise enue hakhenu gula yajiya gukhala ya bonga gu meso a Nzambi ha gumutumaga enue mu fundo dienji. ²⁰ Ndaga tuajiyilego gula guzuela ndo ituamwenene nu ituavile. ²¹ Gu ngima dia gusagesewa gua phetelo nu Yone mahugo avula, abembele. Akhalelego atagana ha gu hetagufundjiwa guawa mukunda nu guahua ndola; ndaga ya iphuta ya gasue ya khalele mu kombelela Nzambi mukunda nu ndaga inyi ya tshitshiwe. ²² Muthu wa mwenene yagasue ya gushimana yabalegele ya gusangewa gua thu wa khalele nu ivo makumi a wana ²³ Gu ngima dia gubembewa guenji phetelo nu yone ayile muhete gudi awo nu guzuela yagasue ya tshitshile apheshiedi nu akulu azuelele: ²⁴ Havile ngenyi, azumbuile agasue diji dia Nzambi muzuela: Fumu, aye wa fugile madilu; mavu nu meya, nu yasue idi mwene; ²⁵ Aye munjila ya givule gia bonga; nu mukano gua ashetu Davidi muenya mudimo wawe udi wazuela: mukunda nu itshi iphuta ya atunyi a mikuala adi agulonda nu munda nu itshi athu adi mutangiza ima ya githuhu? ²⁶ Ma fumu a havu adizugisa agasue nu atuameji adihaga mu milongo gutuna Fumu nu gutuna Kilisto yenji. ²⁷ Ha ndaga eyi helode nu philato adi halele mu milongo mu membo a masamba nu athu agasue enya isalele ha gutuna fumu wenji wabonga yesu yago wazalesele nu jingolo. ²⁸ Adi bungijile ha tshita ya gasue ya koko guaye nu matangi aye awamagesele hathomo. ²⁹ Luenyelu, Fumu tale gusagesewa guawo nu hana gua atshitshi a mudimo waye ha guzuela mbimbi yaye nu gudihala gua vula . ³⁰ Ndaga ya hugusununa koko guaye mukunda nu gusaga, gukhale nu ijiyilo nu ndaga jia gushimana mu jina dia mutshitshi waye wa bonga wa mudimo waye, Yesu. ³¹ Gumanesela gukombelela, mafundo ago guakhalele mudibungisa adigitshile nu guzala pha nu givule giabonga nu ulongesele mbimbi ya Nzambi nu manyinyi avula. ³² Nomba ya koma ya ago atshiginyine akhalele mutshima umoshi nu akhalele muzuela egi ima yenji ya khalele khuta yenji. Uvi akhalele muhaga ima yawo mukunda nu ene agasue. ³³ yakhalele nu ngolo jia vula apostolo alongesele ndaga jiamuene nu jiavile jia guzuga gu gufwa gua Fumu Yesu, nu jikhenda jienji jiabuile holu dia agasue. ³⁴ Guakhalelego nga muthu mumoshi wakhalele mu malamba a guheta nga gima gimoshi ; mukunda mukunda nu ya gasue yakhalele ene mubamba mavu a ilanga nga jinzo, ayidigile abatele jifanga jia ima ya adigile nu akhalele mu jihaga gu malu a Apostolo ³⁵ Nu gukhaphewa guakhalele mukunda nu enya gutshigina agasue muthu nu muthu gu ya khalele mwene nayo ndaga. ³⁶ Yozefi mwenya levi nu gu chupre, watamegewe egi Barnaba gudi Apostolo( idi muzuela egi mona yala ya gulongesewa). ³⁷ Wa khalele nu luphango, waludigile nu wabatele ji falanga nu wahagele gu malu a Apostolo.