¹ Uvi givule gidi muzuela ha phelo egi: mu masugu agisugishilo, avula mba abemba gutshigina mukunda nu guhata luholo lua madiabulu, ² Nu mambo akola mukatshi dia ujiyi wawo. ³ Ene mba 'atunyisa mahata nu ima ya gudia yago Nzambi gafugila ha yane guzanguwa nu guhana hamba dia hana mukatshi dia enya gutshigina ago ahetele mu ujiyi wa giamatshidia. ⁴ Ndaga ya, yagasue yafugiwe gudi Nzambi idi yabonga nu gushigo nga gima gimoshi gi tuanazangula nu guhana hamba dia hana gidi gia gubishidiwa. ⁵ Ndaga ya , yagasue idi ya guwovewa gu mbimbi ya Nzambi nu mu gulomba Nzambi. ⁶ Gula udi mulongesa ima yeyi gudi anetu, mba ukhala mutshitshi wabonga wa mudimo wa Yesu-Kilisto, ya gudishiwa mu mbimbi jia gutshina nu jia malongo abonga azanguile. ⁷ Uvi, bishila ima ya ashigo enya gutshigina, yago yana tshiginyiwa gudi akhetu agukola ha aye gukhala mukatshi dia unzambi. ⁸ Ndaga ya midimo ya muila yana khala nu funu ndo, uvi unzambi wanakhala nu funu gu ima yagasue, nu wana tagenesa gutendelewa gua monyo wa luenyelu nu gua monyo udi muza gu matuama. ⁹ Mbimbi yeyi idi ya giamatshidia nu yatagana nu ginemua ha guzanguwa. ¹⁰ Idi gudi ene tudi mulua nu gutshita muavula ndaga ya, esue tuahagele gudifuelela guetu mukatshi dia Nzambi ya monyo, yago udi muhuluishi ya'athu agasue, gu gishina ago adi mutshigina. ¹¹ Zuela ndaga jiji nu jilongese. ¹² Muthu galelulago uvuala waye, uvi khala mutuameji wa ndaga jiabonga mukunda nu ago adi mu gutshigina, mu guzuela, mu utuameji, mu guzumba, mu gutshigina, nu mu unzambi. ¹³ Unu mbanguza, dihane mu gutanga, mu gukolesa nu mu gulongesa. ¹⁴ Ushabululago guhua gudi mukatshi diaye, nu gua guhuwe mu ndaga jia gutuama nu gushiwa gua mago gudi akulu. ¹⁵ Dihane gu ima yeyi, sala mukatshi diayo hagula egi guya gutuama guaye gukhale muagasue. ¹⁶ Ukhale gudi jiya aye muene hakhaye nu dilongo diaye, dindamana mu ima yeyi yagasue mba udihuluisa aye hakhaye nu mba uhuluisa ago adi guguvua.