¹ Mbimbi idi nu gudi fuelela gula muthu watshigina gukhala ngambi ya Nzambi ya koma, watshigina midimo ya gosa(holu), muthu gashigo nu gujimbila. ² Udi n"ayo gukhala nu khethu mumoshi, udi n"aye gukhala nu muho watangana, handuedi nu mutadi ya athu, udi naye gukhala muenya ndunge agulongesa. ³ Gashigo n"ayo gukhala mukuatewi ya matombe, gukhala muenya ngingolongolo ndo. uvua guhumina gakhadigo muenya gulomba. ⁴ Udi n"ayo gutuamesa giphuta dienji nu anenji adi n"ayo gumutumbuisa. ⁵ Gula muthu gajilego guwendesa giphuta dienji, luhotshi mba awendesa inzo ya Nzambi? ⁶ Gakhadigo muthu muhe muhe muenya gudikhalela, gashigo n"ayo gubua mugubola gifua muthu ya satana. ⁷ Aheteji themua ya bonga gudi adi, gashigo amukhatshi, agula gabuigo mugubola, nga mu mu haheto wa mulodi. ⁸ Akulu adinaye gukhaka abonga, lengienu ndaga jia bola. ⁹ Adi n"ayo gubamba giamatshidia giawambelewe, mugutshigina guadiago. ¹⁰ Adi n"ayo gukhala a gujiyiwa gu ngima dia ndaga, ya adi ashigo mugubola mba atshita midimo. ¹¹ A khethu hene amoshi, adi n"ayo gukhala a bonga ashigo n"ayo gukhala enya izuele zuele. adi n"ayo gukhala atagana nu adi gudi hana gu ndaga jia gasue. ¹² Akulu adi n"ayo gukhala enya mukhethu mugoshi, adi n"ayo guwenda iputa yawo muabonga nu anaho. ¹³ Ndaga ya atshitshile muabonga ahetele gunemesewa nu gudi hana gua vula nu gutshigina nu Klisto Yesu. ¹⁴ Gudi gumifudila ndaga hehi na gudi gumifudila ha guza gudi aye luenyelu. ¹⁵ Uvi gula gudi mushiya mukunda nu gujiya egi: muhotshi udi n"ayo guwenda mu giphuta gia Nzambi, idi gikombelelo gia monio udi nu jingolo jia gutshiginisa giamatshidia. ¹⁶ Nu idi giamatshidia ya zuelewe, idi khenda jidi mupagama: «wamonengene mu huthu, wajiyishi mu givule, wamonengene gudi muajelo wazuelewe gudi giphuta, watshiginywe ha mavu, wa khadueshiwe mugutumbuga.»