¹ Na bilumbu yina nkangu ya nene kuizaka sanganaka diaka pe ya vuandaka na kima yaku dia ve, Yesu bokilaka minlonguki, pe yandi tubilaka bau : ² Mukena nkenda mingi samuna nkangu yayi samu bake na munu bilumbu tatu, kasi bakele na kima yaku dia ve. ³ Kana beno me bika bau ba kuenda na nsatu, bake zanga ngolo na nzila samu ba yankaka kati na bau bakatukaka ntama. ⁴ Minlonguki na yandi vutudila yandi wa mutindi beto lenda yukutisila bau na mampa, awa beto kena bisika yaku yuma? ⁵ Yesu me yuvusa bau : Mampa yikua kele na beno ? Bavutulaka, Nsambuadia. ⁶ Na yau yandi vuandisaka nkangu na ntoto, yandi bakaka ba mampa nsambodia, pe na manima ya kuvutusa matondo, yandi bimisaka yau pe yandi pesaka yau na minlongoki na yandi, samu bakabula ; pe bakabulaka yau na nkangu. ⁷ Ba vuandaka diaka na mua ndambu ya mbizi pe Yesu vutula matondo ; pe bame kabudila bau yau. ⁸ Ba kudiaka pe bayukutaka, pe balokutaka ba bitunga nzambuadia ya kufuluka na bitini yina bikanaka. ⁹ Ba vuandaka pene pene mafunda yiya ya batu. Boso Yesu me sindika bau. ¹⁰ Na mbala mosi yandi kotaka na nlungu na minlonguki na yandi, pe yandi kuenda na kizungu ya Dalamanuta. ¹¹ Ba falisi biminaka yandi pe babandaka kutubasana samuna ku meka yandi, balombaka yandi kidimbu mosi me katuka na dizulu.

¹² Yesu vumuka na ngolo na mpeve na yandi, pe yandi me tuba : Samuna nini mbandu yayi kena ku lomba kidimbu e ? Mume zabisa beno na kedika, kidimbu mosi diaka ve ke buela pesama na mbandu yayi. ¹³ Na manima, yandi bikaka bau pe yandi vutukaka na nlungu samuna ku kuenda na disimu ya nkaka. ¹⁴ Ba minlonguki zimbanaka ku baka mampa ba vuandaka na dimpa mosi kaka na kati ya nlungu. ¹⁵ Yesu tubaka na bau : Beno keba na lufunusu ya ba Falisi na ya Elode. ¹⁶ Minlonguki vuandaka yindula bau na bau pe ba tubaka : Samu beto kena mampa ve. ¹⁷ Awa Yesu zabaka yau, yandi tubilaka bau : Samuna nini beno kena kuyuvasana ti beno kena mampa ve ? Beno ke kaka na myele ve ? Pe beno kena ku visa ve ? ¹⁸ Beno kele na ntima ya ngolo ? Beno kena meso beno kena ku mone ve ? Beno kena makutu, beno kena kuwa ve ? Bosi beno kena tonzo ve ? ¹⁹ Ntangu mu bukunaka mampa tanu samu na babakala mafunda tanu, bitunga yi kua beno lokutaka na bitini ? Bavutusilaka yandi, bitunga kumi na zole. ²⁰ Bosi ntangu mu bukukana mampa nzambuadia samu na mafunda yiya ya babakala, bitunga yi kua ya bitini beno lokutaka ? Ba vutusilaka yandi, Nzambuadia. ²¹ Bosi yandi me zabisa bau : Beno kena kuvisa kaka ve ? ²² Bakuendaka na Batesayida ; batu nataka mpovo mosi na Yesu, mpe ba lombaka samu yandi simba yandi. ²³ Yandi me baka mpovo na diboko, yandi me bimisa yandi na dibuala ; yandi me pakula yandi madita na meso, yandi me tudila yandi maboko yandi me yuvusa yandi kana yandi kena ku mona kima. ²⁴ Yandi talaka, pe yandi me tuba : Munkena ku mona batu kasi mukena monina bau lokola ba yi nti kena ku tambula. ²⁵ Yesu tulaka yandi diaka maboko na meso ; ntangu mpovo me sungamana, yandi belukaka pe yandi yandi bandaka ku mona mbote. ²⁶ Bosi Yesu me vutusa yandi na inzo na yandi, pe me zabisa yandi ti : Kukota ve na buala. ²⁷ Yesu kuendaka na minlonguki na yandi na ba buala ya Nkayisali ya Filipi pe yandi yuvula bau ngiuvula yayi na nzila : Batu kena kutuba mu ikele nani ? ²⁸ Ba vutusaka : Yoane mbotiki, ba yankaka Eliya, pe samuna ba ya nkaka, nge ikele mosi na ba minkudi. ²⁹ Pe yandi vutudilaka bau : Kasi na beno, nani munu ikele ? Petelo vutudilaka yandi : Ngeyo ikele Klisto. ³⁰ Yesu kebisaka bau na ngolo nionso na kuzabisa yau na mutu. ³¹ Bosi yandi bandaka ku longa bau ti Muana ya mutu fueti mona mpasi mingi ; bake yekula yandi na maboko ya bakulutu kati na batu, na bakulutu ya banganga Nzambi pe ba minsoniki, bake ku fua yandi, kasi yandi ke futumuka na bilumbu tatu. ³² Yandi vuandaka zabisa bau mambu yayi na meso ya bau nionso. Bosi Petelo, nataka yandi pembeni pe sembaka yandi. ³³ Kasi Yesu me baluka sika ya minlonguki na yandi pe yandi me tala bau, pe me banda ku semba Petelo : Satana katukila munu ! Samuti nge kena mabanza ya Nzambi ve, kasi mabanza ya kimutu.

³⁴ Bosi yandi bokila nkangu ya batu na minlonguki na yandi, yandi zabisaka bau : Kana mutu zola landana munu, yandi fueti kuki manga, yandi nata dikulusi na yandi, pe yandi landa munu. ³⁵ Samuti mutu yi zona vukisa moyo na yandi, yandi ke zimbisa yau, kasi mutu yina ke zimbisa moyo na yandi samuna mutu pe samu na nsangu ya mbote, yandi ke vukisa yau. ³⁶ Pe inki nvunu na mutu na kubaka bima nionso ya yinza, kana yandi me vidisa muela na yandi ? ³⁷ Inki kima mutu lendaka pesa na kifulu ya muela na yandi ? ³⁸ Pamba ve mutu nionso yina ke mona nsoni samuna munu, samuna na mambu na munu, na mbandu yayi ya kindumba pe yaku sumuka, Muana ya mutu pe ke monina yandi nsoni, ntangu yandi ke kuiza na nkembo ya Tata na yandi, na ba mbasi na yandi ya nlongo.