¹ Na ntangu ba pusanaka na Yelusalemi, mpe ba kumaka na Bethfange, peneni ya mongo ya Olive, Yesu fidisaka minlongoki nandi zole, ² Na ku tubilaka bau : Beno kuenda na buala kena ntuala ya beno ; beno ke kutana mpunda ya kukanga mpe na muana mpunda na yandi, beno zibula bau mpe beno nata bau na munu. ³ Kana muntu me tubila beno diambu, beno vutudila yandi : Mfumu kena yau mfunu. Mpe na yau ntangu ba kebika yau kuenda. ⁴ Nzoka, yayi salama samu ti yina mbikudi samunaka kuiza salama. ⁵ Tuba na muana ya nkento ya Siyoni: Tala, ntinu na nge kena kuiza na nge, ya kufuka na nlembami, mpe yandi tentamaka na zulu ya mpunda, na zulu ya muana mpunda, muana kibulu ka nataka bima. ⁶ Minlongoki kuenda mpe ba salaka yina Yesu zabisaka bau. ⁷ Ba nataka mpunda na muana nandi, ba tulaka bilele na zulu ya yau, mpe ba vuandisakayandi na zulu ya yau. ⁸ Bantu nionso ba zalaka bilele ya bau na nzila, baya nkaka zengaka ma ndalala mpe ba tulaka yau na nzila. ⁹ Ba yina tuamaka mpe ba landaka Yesu bokaka, «Hosana na muana Davidi bika yandi vuanda ya ku sakumunua yina me kuiza na nkumbu ya Mfumu ! Hosana na bifulu ya kuzangama! » ¹⁰ Na ntangu yandi kotaka na Yelusami, mbanza ya mvimba me kuma zengele zengele, mpe ba vuandaka tuba : «Nani yina ?» ¹¹ Nkonga vutulaka : «Ya kele Yesu, Mbikudi, muntu ya Nazaleti ya Ngalili.» ¹² Yesu kotaka na kinlongo ya Tata Nzambi. Yandi kukaka ba yina vuandaka teka mpe kusumba bima na kati ya kinlongo; yandi tengulaka ba meza ya minsobi ya mbongo, mpe bivuandulu ya minteki ya mabembe. ¹³ Bosi yandi tubilaka bau: Ya sonamaka: Yinzo na munu ke bokudulua yinzo ya lusambulu. Kansi beno, beno me kitula yau yinzo ya miyibi. ¹⁴ Ba mpofo na mimvanguki finamaka na ntuala ya Yesu na kati ya kinlongo. Mpe yandi belusaka bau. ¹⁵ Kansi ba ngudia nganga na minsoniki vuandaka nionga, ntangu ba monaka bimngu ya mbote yandi salaka, mpe bana vuandaka boka na kinlongo: Hozana na Muana ya Davidi! ¹⁶ Ba tubilaka yandi: Yina ba kena kutuba, nge kena kuwa yau e? Yesu vutudilaka bau, ingeta. mambu yina, beno salaka tanga nntete ve mambu yayi e? Nge bakaka nzitusu na yinua ya bana na ya ba yina kuyema e? ¹⁷ Bosi ntangu yandi bikaka bau, yandi bimaka na mbanza samuna kukuenda na Betania, kuna yandi lekaka. ¹⁸ Na nsuka,, ntangu yandi vutukaka na mbanza, yandi monaka nsatu. ¹⁹ Ntangu yandi monaka yinti ya mungiengie na nzila, yandi finamaka, kansi yandi monaka kaka matiti ya mpamba, mpe matuba na yinti: Nge ke buta ata mbuma mosi diaka ve! Mpe kilokula yina kaka, yinti ya mungiengie yumaka. ²⁰ Minlongoki, monaka mambu yina, yitukuaka, mpe tubaka : «Wapi mutindu kuyu yayi me tumbu yumina?» ²¹ Yesu vutudilaka bau : «Me zabisa beno na kedika, kana beno kele na kiminu mpe beno vuanda na ketiketi ve, ve kaka beno ke sala ve yina me salama na kuyu yayi, kansi beno ke tuba na mongo : katuka awa mpe kuenda ku kilosa na yibu, yina ke salamana beno. ²² Nionso beno ke lomba na kiminu na lusambulu, yake pesamana beno.»» ²³ Yesu kuendaka na kinlongo, mpe, na ntangu yandi vuandaka longa, ba ngudia nganga na minsoniki ya nkangu kuizaka tubila yandi: Na lulendo ya nani nge kena kusadila bimangu yayi, mpe nani pesaka nge kilendo yina e? ²⁴ Yesu vutudilaka bau: Mu ke kudia beno kuivu mosi, mpe, kana beno me vutudila munu, mu ke tubila beno, na kilendo ya nani mu kena kusadila mambu yayi. ²⁵ Mbotokolo ya Yoane, nanani ya katukaka? Na dizulu, to na bantu ? Bau na bau yindulaka mutindu yayi: ²⁶ Kana beto me vutudila yandi ti na dizulu, yandi ke tubila beto: Samuna inki beno lekilaka yandi kiminu ve? mpe kana beto me vutudila yandi: ti ya bantu beto ikele na wonga ya nkangu, samu bantu nionso tulaka Yoane na kifulu ya Mbikudi. ²⁷ Na yau, ba vutudilaka Yesu: Beto zaba ve. Bosi yandi me tubila bau/ Munu mpe mu ke tubila beno ve kana na kilendo ya nani mu ke sadilaka mambu yaydi. ²⁸ Inki beno kena kubanza e? Tata mosi vuandaka bana zole, mpe me tuba na muana yantete: Muana na munu, bubu yayi kuenda sala na bilanga na munu ya vinia. ²⁹ Yandi vutulaka: mu ke kuenda ve. Kansi, yandi vilulaka ntima, mpe yandi kuendaka. ³⁰ yandi tubaka na muana yina yankaka, yandi tubaka mutindu mosi. Mpe muana yina vutulaka: Mu ke kuenda, mfumu. Kansi yandi kuendaka ve. ³¹ Nani na bau zole sadilaka luzolo ya tata e? Bau vutudilak: muana yina ya ntete. Bosi Yesu tubilaka bau: Ye kedika me tubila beno, mimfutisi mpaku na ba nsuza ke tuamina beno na kimfumu ya Tata Nzambi. ³² Samu Yoane kuizilaka bano na nzila ya lunungu, kansi beno lekilaka yandi kiminu ve. Kansi mimfutisi mpaku na ba nsuza lekilaka yandi kiminu; bosi beno, yayi monaka mambu yina, beno vilulaka mintima va samuna kulekila yandi kiminu. ³³ Beno kuwa kingana yankaka. Ya vuandaka muntu mosi, mfumu ya yinzo, kunaka bilanga na yandi ya vinia. Yandi zungaka yau na kati ya lupangu, yandi timunaka kikamunu ya vinia, mpe yandi yinzo ya kuzangama; yandi tuidisaka yau na mimvati, mpe yandi katukaka na yinsi. ³⁴ Ntangu ya ngionzokolo kuizaka, yandi tindaka bisadi ya yandi na mimvati, samuna ku baka mbutu ya bilanga na yandi ya vinia. ³⁵ Ntangu mimvati ya vinia builaka bisadi na yandi, ba bulaka mosi mpe ba kufuaka yina yankaka, mpe ba lozilaka yina ya tatu mabanga. ³⁶ Yandi tindaka diaka bisadi yankaka, na ntalu yabantu kuluta ya ntete; Kansi mimvati ya vinia salaka bau mutindu mosi kaka. ³⁷ Na nsuka, yandi tindilaka bau muana ya yandi mosi, na kutuba ti: ba ke vuanda na luzitu na muana ya munu. ³⁸ Kansi, ntangu mimvati ya vinia monaka muana, ba tubasanaka: Beno tala yandi yayi mvingi ya difua; beno kuiza, beto kufua yandi, mpe beto ziona difua ya yandi. ³⁹ Mpe ba builaka yandi, ba lozaka yandi na nganda ya bilanga, mpe ba kufuaka yandi. ⁴⁰ Na kilokula yayi, ntangu mfumu ya bilanga ke kuiza, inki diambu yandi ke sala mimvati ya vinia e? ⁴¹ Ba vutudilaka yandi: Yandi ke kufua bau yimbi bantu yayi ya yimbi, mpe yandi ke pesa bilanga na yandi ya vinia na mimvati yankaka ya vinia, ba yayi ke pesa yandi mbutu na ntangu ya ngionzokolo. ⁴² Yesu tubilaka bau: Beno tanga ntete ve na Masonukua :Dibanga yayi lozuaka na bantu vuandaka tunga, yau kitukaka ya ngudi na kikonko; Yau katukaka na Mfumu, mpe ya ikele ngitukulu na meso na beno. ⁴³ Na yau, mu kena ku zabisa beno, kimfumu ya Nzambi ya katulua na beno mpe ke pesama na makanda yina ke pesa ba mbutu. ⁴⁴ Yina ke ku bua na dibanga yina yandi ke toluka, mpe yina yandi ke buila yandi kosumuka. ⁴⁵ Na manima ya kuwa mambu yina, ba ngudia nganga na ba falisi kuizaka bakusa ti bau Yesu vuandaka tubila, ⁴⁶ mpe ba vuandaka sosa ba buila yandi; kansi ba vuandaka mona wonga ya nkangu, samu ba tulaka yandi na kifulu ya mbikudi.