^{1 2} Paulu, kele ntumua ya Yesu Klisto na luzolo ya Tata Nzambi, mpe mpangi Timoteo, na dibundu ya Tata Nzambi kele na Kolinto, mpe na ba nlongo, nionso kene na Akaya ya mvimba: bika nlemvo ya mpe yenge me katuka na Nzambi Tata na beto na ya Mfumu na beto Yesu Klisto vuanda na beno. ³ Bika Nzambi zitusua, Tata ya Mfumu na beto Yesu Klisto, Nzambi ya nkenda mpe ya mbombolo nionso, ⁴ yayi kena kubomba beto na ba mpasi na beto nionso, samu ti, na mbombolobeto ke bombuaka na Tata Nzambi, beto lenda bomba ba yina kele na mpasi! ⁵ Samu, mutindu mosi ba mpasi ya Klisto kena kufuluka na beto, mutindu mosi na nzila ya Klisto mbombolo na beto kena kunieka. ⁶ Kana ba kena kumuesa beto mpasi, ya kele samuna mbombolo na beno mpe mpulusu na beno; kana beto kena kubombua, ya kele samuna mbombolo na beno, yayi kena kusalama samuna kukanga ntima na mvibudulu kele na beto na ba mpasi beto kena kumona. ⁷ Mpe kivuvu na beto na ntadisi na beno kele ya kusiama, samu beto me zaba ti kana beno kele kintuadi na ba mpasi, mutindu yina mpe na mbombolo. ⁸ Bampangi, beto zola ve ti beno zimbakana nzungu yayi kuizilaka beto na Asia, kizitu yayi ba tuikilaka beto me luta ngolo na beto, samu beto vuanda na kivuvu ya luzingu yayi diaka ve. ⁹ Mpe beto vuandaka tala bonso ba yankaka nzengolo ya lufua na beto, samu beto kukitudila kivuvu, kansi beto tula yau na Tata Nzambi ke fulukisaka bafua. ¹⁰ Yandi kangulaka mpe ke kangula beto na lufua ya mutindu yayi, beto kena kutula kivuvu ti yandi ke kangula beto diaka, ¹¹ Beno mpe, beno sadisaka beto na tusambulu na beno, samu ti nkembo ba bakilaka beto na bantu mingi vuanda samuna bantu mingi ntangu ya kuvutula matondo samuna diambu ya beto. ¹² Samu kima kena kusala nkembo na beto kele kimbangi ya kimuntu na beto, ti kikadulu na beto na inza mpe na ntadisi na beno, vuandaka ya nlongo mpe ya kuvedila na ntuala Tata Nzambi, na nduenga ya kinsuni ve kansi na nlemvo ya Tata Nzambi. ^{13 14} Beto me sonikina beno mambu ya nkaka ve kaka yina beno kena kutanga, mpe yina beno me zaba. Mpe me tula kivuvu ti beno ke zaba yau ti na nsuka, mutindu beno zabidilaka ndambu ti beto kele nkembo na beno, mutindu mosi, beno ke vuanda mpe ya beto na kilumbu ya Mfumu Yesu. ¹⁵ Na kati ya kivuvu yayi mu zolaka kuiza na beno, samu beno baka nlemvo mbala zole; ¹⁶ mu zolaka lutila kisika beno kele samuna ku kuenda na Makedonia, bosi katuka na Makadonia mpe ku kuiza kisika beno kele, mpe beno zieta na munu na kukuenda na insi ya Yuda. ¹⁷ Na kusala mutindu yina, beno zola tuba ti mu lembisaka kilendo na munu e? Kana ve, ba mbombolo na munu, ya kele ba mbombolo ya kinsuni e, samu inga na ve vuanda kati na munu? ¹⁸ Ya tseleka ti Tata Nzambi kele ya kukuikama, mambu beto zabisaka beno vuandaka inga na ve ve. ¹⁹ Samu Yesu klisto, Muana ya Nzambi, yina beto vuandaka longa kati na beno, kubanda na munu, mpe na Silvano, mpe na Timoteo, vuandaka inga mpe ve ve, kansi inga vuandaka kati na yandi, ²⁰ kansi na yina me tala ba nsilulu nionso ya Tata Nzambi, yandi kaka kele na inga, yau yina yandi tubaka diaka Ameni mpe na beto samuna nkembo na Tata Nzambi. ²¹ Mpe yina kena kusiamisa beto na beno kati na Klisto, mpe yina kusaka beto mafuta kele Tata Nzambi, ²² yandi tulaka beto bidimbu mpe yandi tulaka na bantima na beto bidimbu ya kimpeve. ²³ Nzoka, me tula Tata Nzambi vuanda mbangi ya muela na munu, ti samuna kutanina beno nde mu kuendaka diaka na Kolinto ve; ²⁴ ya kele ve ti beto kena kuyala kiminu na beno ve, kansi beto kena kusadisa na kiese na beno, samu beno kele ya kusiama na kiminu na beno.