¹ Mu bakaka lukanu munu mosi ti muleda vutukila beno na kiadi ve. ² Samu kana me monisa beno kiadi, nani lenda yangidika munu, kana muntu yayi ve me monisa kiadi e? ³ Mu sonikaka mutindu mu salaka samuna ngizulu na munu, mu mona ve ti bantu yina lendaka pesa munu kiese ba vuanda na kiadi, na ntangu mu kele na kivuvu na beno nionso ti, kiese na munu yau kuandi kele kiese na beno nionso. ⁴ Ya kele na mpasi nionso, na ntima ya kingongo, mpe na mansanga mingi mu kena kusonikina beno, samu beno vuanda na kiadi ve, kansi samu beno zaba ti, mu kele na kiese ya kuluta samuna beno. ⁵ Kana muntu kele ntukisi ya kiadi, beno zaba ti munu ve yandi muesaka kiadi, kansi samuna kukuenda ntama ve, na beno nionso. ⁶ Kitumbu muntu yayi bakaka yina katukaka na bantu mingi me fuana, ⁷ ya me luta mbote na kulemvukila mpe kubomba yandi, samu yandi vuanda na kiadi ya kuluta ve. ^{8 9} Mu kena kulomba beno na kuvuanda na zola na ntadisi na yandi, samu mu sonikaka na dituku ya kutala beno, kana beno ke tumamaka na mambu nionso. ¹⁰ Samu muntu yina beno me lemvukila, me lemvukila yandi mpe; muntu yina mu lemvukilaka, kana mu lemvukilaka diambu, ya kele samuna beno, na ntadisi ta Klisto, ¹¹ samuna kubika nzila na Satana ve yandi vuanda na zulu ya beto, samu beto me zaba mabanza na yandi. ¹² Yankaka, ntangu mu kumaka na Toloa samuna Nsangu ya Mbote ya Klisto, Mfumu zibudilaka munu kielo, ¹³ mpe mpeve na munu dingamaka ve, samu mu vuandaka mona mpangi na munu Tito ve; yau yina ntangu mu bikaka bau, mu kuendaka na Makedonia. ¹⁴ Matondo na Tata Nzambi ke nungisaka beto ntangu nionso kati na Klisto, mpe yandi kena kudukudila beto nzayilu na yandi kisika nionso! ¹⁵ Kansi samuna Tata Nzambi, beto kele nsunga ya mbote ya Klisto, kati na bayina vulusuaka mpe na ba yina kena kuzimbala: ¹⁶ na ba yayi, nsudi ya lufua, ke pesaka lufua, nsunga ya moyo, ke pesaka moyo. Bosi nani kele ya kufuana na samuna mambu yina e? ¹⁷ Samu beto kena kufuatikisa mambu ya Tata Nzambi ve, mutindu kena kusala bantu mingi yankaka; kansi ya kele na kedika, mpe na nkumbu ya Tata Nzambi nde beto kena kutuba samuna Klisto na ntuala Tata Nzambi.